Allen den, die disen brief ansehent oder ho^erent lesen, kúnden ich Joh. von Langenhart vogt¹ vnd wir . . der || rate der statt ze Rapreswile², das fúr v´ns kamen an offen gerichte Cůnr. der Klieber vnd Margarete || sin elichú wirtenn einunt vnd Hans von Ho^engge³, dem man spricht Hanger, andrunt, vnd ofnotont da die || selben Cůnr. der Klieber vnd Margaret mit fúrsprechen, das si hettint ze ko^vffenne geben eins rechten redelichen ko^vfs dem vorgenanten Hansen dem Hanger hus vnd hofstat gelegen ze Rapreswile zwúschen Hermans Brunners hofstat vnd des egenanten Kliebers vnd Margar. siner wirtenn hus mit mistwúrfi mit benken in der kilchen vnd mit aller zůgeho^erde vnd den garten, der darhinder lit, als verre dú mure gat vnd begriffen het, dú an des eben(empten) Kliebers vnd Margar. hus stosset, ane geuerde, vmb fúnf vnd achtzig phunde gůter Zúricher pfenning vnd vmb daz hus vnd hofstat mit aller zůgeho^erde, das och ze Rapreswil zwúschen der Barfůssen vnd der Augustiner húser⁴ gelegen ist, der vorgeseiten pfenning si o^vch von dem obgenanten Hansen dem Hanger gantzlich gewert vnd betzalt sint nach ir vergicht, vnd dú vorgeschriben mure, dú an des Kliebers vnd Margareten siner elicher wirtenn hus sto^esset, ist a^ellú des obgenanten Hansen des Hangers ald wer denn daz vorgenant sin hus oder hofstat inne het, won als vil, das der Klieber vnd Margar. sin elichú husfro^vwe ald wer denne ir huse oder ir hofstat inne het, wol mugent in die selben mure tra^emeln vnd buwen, als denne dem hus vnd der hofstat notdúrftig ist, âne geuerde, vnd der mure vnwůstliche. Vnd vertgotont o^vch die eben(empten) Cůnr. der Klieber vnd Margar. sin elichú wirtenn dem egenanten Hansen dem Hanger das vorgenant hus hofstat vnd garten mit aller zůgeho^erde alsus, als da vor geschriben stat, mit des vogtz hant an sin hant, als gerichte vnd vrteile gabe vnd als vns vnd ander erber lút, die dar vmb erteilten vf den eide, důcht, das es billich kraft vnd macht hetti nu vnd hie nahe. Vnd des alles ze einem waren offenn vrkúnde haben wir die obgenanten der vogt vnd der rat der vorgenanten stat insigel ze Rapreswile nache rechter vrteile vnd dur beider teile bett willen gehenkt an disen brief. Der geben ist ze Rapreswil, do man zalt von gottes gebúrt drútzehenhundert iar vnd dar nache in dem einen vnd sechtzgosten iar, an dem nechsten mentag vor sant Johans tage ze súngichten.

Source Fulltext: Chartularium Sangallense VII, Nr. 4749, S. 555-556.