Allen den, die disen brief sehent oder ho^erent lesen, kúnde vnd vergihe ich Chůnrat Bachmeiger genant der || Schmit von V^tzna¹ fúr mich vnd alle min erben, daz ich mit wolbedahtem můt han getan einen wehsel mit || den geistlichen herren dem abt vnd dem convent des gotzhus ze Rúti² Wisses ordens gelegen in Kostentzer || bischtom, den ich mit disem brief lidklich vff gibe zwên mút habern geltes Zúrich mess, die ich hatte in dem hofe, den man nemmet ze Nidren Húsern³ vnd vff Vnderbach⁴ in iro vogti gelegen ist, den selben hof ze disen ziten buwet der Kuster ab Vnderbach, won die selben geistlichen herren mir vnd minen erben och hand lidklich vff geben zwen mút habern geltes des egenanten mess, die si hatten in dem hofe, den man nemmet V^elis V^etlenburgs vnd Elsi V^etlenburgs gůt vnd zem endern Erlaswil⁵ gelegen ist. Vnd dar vmb daz die obgenanten geistlichen herren der abt vnd der conuent vnd ir nahkomen vnbekúmbert vnd vngesumt beliben nu vnd har nach von mir dem egenanten Chůnr. Bachmeiger vnd von minen erben, so gib ich inen disen brief besigelt mit mines genedigen herren grâf Friderichs von Toggenburg⁶ insigel, dar vnder ich mich vnd min erben binde, won ich eigens insigels nit enhan.||
Ich graf Fridrich von Toggenburg vergihe, daz ich dur ernstlicher bette willen des vorgeseiten Chůnr. des Bachmeigers min insigel han heissen henken an disen brief ze merer sicherheit der vorgeschriben dinge. Der geben wart ze Vtzna des jares, do man zalte von gottes gebúrte drúzehen hunder^a) jar, dar nah in dem ein vnd sehzigosten jare, an der vffart abent.

Source Fulltext: Chartularium Sangallense VII, Nr. 4739, S. 547-848.