Wir Willehelm von gottes genaden abt des gotzhus ze den Schotten ze Costentz¹ tůnt kunt vnd vergehin offenlich || mit disem brief, das fúr v´ns kam der erber priester herr Johans Egli capplan v´nser frowen altars der cappelle || ze dem hailgen grab hinder v´nser frowen múnster ze dem thůme ze Costentz², vnd veriah da offenlich vor v´ns, das er || von dem erbern priester hern Hainrichen von Wile³ dem vnder custer in v´nser frowen múnster ze dem selben thůme ze Costentz vnd Johansen von Wile sinem brůder enpfangen hab drú pfunt vnd zehen schilling gůter pfenning Costentzer múns vnd das er inen baiden gemainlich vnd vnuerschaidenlich vnd iren erben vmb die selben pfenning, der er och gar von inen gewert sie, hab ze kôffent geben reht vnd redlich den garten, der ze Costentz in Schotten gassen gelegen ist vnd stosset ainhalp an des vorgenanten hern Hainrichs^a) von Wile des vndercusters garten vnd anderhalp an das ga^essli, das entzwischen Frideriches^a) des houes insiglers⁴ garten gelegen ist, der von v´ns vnd dem obgenanten v´nserm gotzhus ze den Schotten zinslehen ist vnd darab v´ns vnd dem selben v´nserm gotzhus ja^erlichs ie vff sant Jacobs tag des hailgen zwelfbotten ze rehtem zins gat aht pfenning Costentzer múns vnd dem spittale sant Maria Magdalenen vff der Rinbrugg ze Costentz⁵ anderhalp pfenning der selben múns och ja^erlichs fúr den zehenden. Vnd gab och da der selb herr Johans Egli den selben garten mit aller siner zůgeho^erde willeklichen vff an v´nser hant vnd verzeh^b) sich daran fúr sich vnd sin erben alles sins rehten, vnd batt v´ns, den selben garten mit aller siner zůgeho^erde lihen dem vorgenanten hern Hainrichen von Wile vnd Johansen sinem brůder. Der bett habin wir in willeklich gewert vnd habin den selben garten von im vffgenomen an v´nser hant vnd habin in mit aller siner zůgeho^erde gelihen vnd lihin in mit disem brief dem vorgenanten hern Hainrichen von Wile vnd Johansen sinem brůder inen baiden gemainlich vnd vnuerschaidenlich vnd iren erben ze ainem rehten sta^eten erbzinslehen in allem dem zins vnd dem rehten, als vorgeschriben stat. Vnd ze warem vnd offem vrkúnd aller dirr ding gebin wir vorbenempter abt Willehelm v´nser insigel an disen brief. Darnach vergihe ich der vorgenant Johans Egli ainer gantzer warhait alles des, so da vorgeschriben stat, vnd so^elin och ich vnd min erben des selben hern Hainrichs von Wile vnd Johansen sins brůder vnd ir erben des selben kôffes reht wern sin nach reht ane alle geuerde. Vnd des ze warem vnd offem vrkúnd hab och ich min insigel zů des obgenanten abt Willehelms insigel gehenkt an disen brief. Der ist ze Costentz geben, do man von Cristes gebúrt zalt drúzehenhundert jar, darnach in dem ain vnd sehtzigosten jar, an sant Nycolaus abent.

Source Fulltext: Chartularium Sangallense VII, Nr. 4773, S. 578-579.