Wir Geori von gottes gnâden abt¹ vnd daz cappittel gemainlich dez gotzhus ze sant || Gallen kúnden offenlich mit disem brieue allen, die in sehent lesent oder ho^erent lesen, || daz Burkart von Ramswâg² hern Burkartz sa^elgen sun von Ramswag³ vns || noch vnserm gotzhus sinen tail noch enhainú sinú reht, so er hât an der burg ze Blattun⁴, die reht burgsa^ess von vnserm gotzhus ist, niht v^f geben noch ledig gelassen hât mit dem noch in dem v^f gebenn dez halben kelnhofes vnd dez halben kylchvnsatzzes ze Waltkylch⁵ vnd aller der lút vnd gu^eter, so darzů geho^erent, sú sient benemt ald vnbenemt, so er vns vnd vnserm gotzhus v^f geben vnd ledig gelâssen hât⁶. Vnd sol o^vch daz selb v^f geben dez vorgenemten kelnhofes vnd kylchunsatzzes vnd waz darzů geho^ert dem êgene[mt]en^a) Burkarten von Ramswâg noch sinen erben an dem tail noch an den rehten, so der selb Burkart hât an der vorgenemten burg ze Blattun, enhain schad sin, aber was ander reht wir vnd vnser gotzhus zů der selben burg habent, die behalten wir vns vnd dem êgenemten vnserm gotzhus. Vnd ze ainem wâren vrkúnde vnd gantzzer sicherhait aller der vorgeschribenen dinge vnd vergiht henken wir abt Geori da vorgenemt vnser vnd vnsers conuentes insigel an disen brief. Der geben ist ze sant Gallen an sant Andres tag dez zwelfbotten in dem jâr, do man zalt von gottes gebúrt drúzehenhundert jâr vnd darnâch in dem ain vnd sehszigosten jâre.

Source Fulltext: Chartularium Sangallense VII, Nr. 4770, S. 574-575.