Wir fraw Ite gra^euin von Hohenberg¹ genant von Tockenburg vnnd wir graue Fridrich, graf Donat, graf Krafft vnnd graf Diehtalm von Dockenburg² gebrueder veryehen vnnd tuen kund allen den, die disen brieue sehend lesend oder horn lesen, daz weder wir noch vnnser erben noch yemand von vnnsern wegen die ersamen burger von^a) Horw³ noch ir nachkomen nimer weder luzl noch vil irrn noch bekumern sollen wider die freyhait, die innan gethan hat der edl herre graf Ruedolff von Hohenberg⁴, als ir brief sagend, die sy von demselben graf Ruedolffen inne hanndt, vnnd geloben vnnd veryehend auch mit disem briefe, daz weder wir noch vnnser erben noch niemand von vnnsern wegen inen nichzit sollen zumueten noch von inen begern weder yez oder hinach vber lanng oder vber kurz klain oder gross luzel oder vil, das wider ir freyhait seye, die inen der egenant graue Ruedolff von Hohenberg gethan hat vnnd des sy brief von im innehand. Vnd des zu ainez waren vrkund so haben wir die egenant fraw Ite von Hohenberg genant von Tockenburg vnnd wir graf Fridrich vnnd wir graf Tonat vnnsere aigne insigl gehenngt an disen brief, vnnd wir graf Krafft vnnd wir graf Diethalm von Dockenburg veryehen vnnd geloben, das alles war vnnd stete zuhaltend, das von vnns vorgeschriben steet, vnd gelobend das vnnder vnnser geswistergit insigl, wann wir noch vor jugend aigner insigl nit enhabend. Der brief ward geben, do man zalt von Cristy geburt dreuzehenhundert jar vnnd darnach im ainenvnndsechzigesten jar an sannd Maria Magdalena tag.

Source Fulltext: Chartularium Sangallense VII, Nr. 4753a, S. 529-530.