Allen den, die disen brief an sehent lesent oder ho^erent lesen, tůn ich Cůnrat Atze ain burger ze Costentze kunt vnd vergihe || offenlich an disem brief, sit min lieber sweher Růdolf von Anwille¹ mir die genade vnd trúwe erzo^eget vnd getan het mit dem vnd || an dem, daz er mir den hof ze Sorendal² vnd den zehenden ze V^otenwille³ ze ainem rehten vnd schlehten gema^echt gefu^eget vnd gema||chet het mit dez êrwirdigen mines gena^edigen herren hand abt Gerijen dez gotzhus ze sant Gallen⁴, dar vmb han ich willeklichen gesworn ainen gelerten ayd ze den hailgen, daz ich noch niemen von minen wegen den selben Růdolf von Anwille minen sweher noch Angnesun sin elichun wirtenne mine swiger noch Hansen iro baider elichen sun, alle die wile sú a^ellú drú oder ir dehaines vnder inen lebet, an dem vorbenempten hof noch zehenden, sú wellint sú verkoffen versetzen besetzen ald entzetzen oder lernen andern fu^egen ald machen, mit Worten noch mit werchen noch mit kainerhande sachen sus noch so haimlich noch offenlich sumen ierren bekumbern noch bekrenken sol noch wil mit geriht gaistlichem noch weltlichem noch ane reht dehainen weg, won sú sont vnd mugent allú drú ald weles denn vnder inen lebet mit dem vorgenanden hof vnd zehenden schaffen vnd tůn sont, die wîl sú lebent, waz inen komenlich nutzlich ald fůgklich ist, ane alle wider rede vnd sumsali min vnd miner erbun, Vnd ze merer sicherhait aller vorgescribener ding henk ich Cůnrat Atze burger ze Costentze min aigen insigel offenlich an disen brief Dirre brief geben wart ze Biscofzelle⁵ in der stat, an dem na^ehsten ma^entag vor dem zwelften tag ze winna^ehten, in dem jar, do von Cristes gebúrt warent drútzehenhundert jar, dar nach in dem zwai vnd sehtzigosten jare,

Source Fulltext: Chartularium Sangallense VIII, Nr. 4778, S. 1.