Allen den, die disen brief ansehent lesent oder ho^erent lesen, tůn ich Albreht von Lindenberg schulthais ze Wil¹ kunt vnd vergich offenlich mit disem || brief, daz fúr mich kamen ze Wil in der stat des na^ehsten jargerihtz nâh sant Hylarien tag, do ich offenlich ze geriht saz, die ersam swo^e||ster Adelhait priolin des conuentes gelegen ze Wil² vor der stat ainhalb vnd Cůnrat der Wattendaler burger ze Wil andrenthalb, vnd offe||not da die vorgenemt swo^ester Adelhait mit fúrsprechen von ir vnd von des vorgeschriben conuentes wegen vnd sprach, wann sú iren wasser graben, der gat entzwischent des vorgenemten Cůnratz des Wattendalers wisen vnd des houes wisen, rumen wend, daz sú dann daz, so sú vsser dem vorgeschriben graben rument vnd tůnt, werfen vnd tůn súllen baidenthalb vf des vorgenemten Cůnratz des Wattendalers vnd des houes wisen. Do antwrt aber der vorgenemt Cůnrat der Wattendaler och mit fúrsprechen vnd sprach, er getrúweti got vnd dem rehten wol, daz sú vsser ir vorgeschriben graben vf sin wisen vtz werfen oder tůn súllen won mit sinem willen, vnd bat mich erfarn an ainer vrtail, was reht wa^er. Do fragt ich vorgenemter rihter vrtail vmb, vnd ward ertailt mit gemainer vrtail, daz sú baidenthalb ain kuntschaft darumb gen enander nemen so^eltin, vnd wes sich dann die kuntschaft gemainlich oder der mertail vnder inen erkandi, daz es och dabi beliben so^elti. Do nam die vorgenemt swo^ester Adelhait die priolin an des vorgeschriben conuentes stat vnd och der vorgenemt Cůnrat der Wattendaler mich vorgenemten Albrehten von Lindenberg ze ainem gemainen man vmb die sach, vnd daz och ich zwen erber man zů mir nemen so^elti, welh ich wo^elti, vnd dann wir drie ir baider kuntschaft verhortin, als vor ist geschriben. Do nam ich vorgenemter Albreht von Lindenberg zů mir die fromen manne Markus den Kamrer vnd Herman den Kupferscmit burger ze Wil, vnd verho^erten wir die vorgenemten Albreht von Lindenberg, Markus Kamrer vnd Herman Kupferscmit ir baider kuntschaft mit geswornen ayden, als reht sitte vnd gewonlich was, vnd dunkt vns alle drie gemainlich vnd sprechent och bi vnsern eren, daz der vorgenemten swo^ester Adelhait vnd des conuentes kuntschaft dú besser sie, also wann sú notdurftig sint den vorgeschriben graben ze rumenn, daz sú dann daz, so sú vsser dem graben rument vngeuarlich vffen des vorgenemten Cůnratz des Wattendalers wisen vnd des houes wisen baidenthalb hin tůn sont vnd werfen ân geua^erd. Vnd ze offenem waren vrkúnd vnd sta^eten sicherhait aller diser vorgeschriben ding henk ich Albreht von Lindenberg schulthais da vorgenemt min insigel an disen brief. Darnach veriehen wir die vorgenemten Markus Kamrer vnd Herman Kupferscmit ain gantz warhait aller diser vorgeschriben ding, so hieuor von v´ns an disem brief geschriben stat, vnd ze merer sicherhait der selben ding henken wir o^vch v´nsri insigel an disen brief. Der geben ist ze Wil in der stat in dem jare, do man zalt von gottes gebúrt drúzehenhundert jar, sechzig iare vnd darnach in dem andern jare, an der na^ehsten mitwochen nach sant Hylarien tag.

Source Fulltext: Chartularium Sangallense VIII, Nr. 4781, S. 2-3.