Ich^a) Hainrich der Bader Cůnratz sa^eligen des Baders sun burger ze Costentz kúnd vnd vergih des offenlich mit disem brief allen, || die in ansehent oder ho^erent lesen, das ich gesunt libs vnd můtz von den erwirdigen in got vnd gaischlichen frowen fro Claren vnd || fro Angnesen geswestran Bartholomeus sa^eligen Goldasts ains burgers ze Costentz elichen tohtran, die ze Veltpach¹ in dem closter || begeben sint vnd pfrůnd da hant, enpfangen hab sehs vnd zwainzig pfund gůter pfenning Costentzer múns, der ich gar von inen gewert bin vnd die ich in minen redlichen nutz geben vnd bekert hab, als ich vergih mit disem brief, vnd das ich inen vnd allen iren erben vnd nachkomen fúr mich vnd alle min erben vnd nachkomen nach miner gůter frúnd vnd ander erbrer lút rat mit gůtem willen vnbetwungenlich vnd mit gůter vorbetrahtung vmb die selben pfenning hab ze kôffent geben reht vnd redlich den wingarten, der ze Stekboren² vff Schaitingen³ zwischen des Franken gůt von Bollingen⁴ vnd Jacob Růprehtz gůt von sant Gallen gelegen ist vnd stosset vndenan an mins herren gůt von Owe⁵ vnd obnan an Hansen des Brotbeken gůt von Ratolfzelle⁶ vnd ain reht zinsaigen ist von dem conuent vnd dem gotzhus ze Maggnowe⁷ ja^erlich vmb ainen vierdung wahses Costentzer gewihtes, der inen darab gat ie vff sant Martins tag ze gebend, vnd hab inen och den selben wingarten mit allen nútzen gewonhaiten vnd rehten vnd mit aller siner zůgeho^erde gefertget vnd vffgeben vff offner lantstras des riches fúr ain reht zinsaigen mit allen den Worten werken vnd geta^eten vnd mit aller kraft, so darzů hort vnd nottúrftig was nach gewonhait vnd nach reht, vnd hab mich darúber verzigen vnd verzihe mich offenlich mit disem brief fúr mich vnd alle min erben vnd nachkomen gen den vorgenanten fro Claren vnd fro Angnesen den Goldastinen vnd gen allen^b) iren erben vnd nachkomen an dem obgenanten wingarten vnd was darzů ho^ert aller aigenschaft aller lehenschaft aller vordrung vnd ansprach vnd alles rehtes gaischlichs vnd weltlichs gerichtes. Ich vnd min erben so^elin och iro vnd ir erben vnd nachkomen des selben wingarten reht wern sin fúr ain reht zinsaigen nach reht ane alle geuerde. Doch sol man wissen, wer disen wingarten inne hat, der ist gebunden, dem obgenanten minem herren ze dienend mit ainer beggelhuben mit ainer schlappen vnd mit zwain kettenhentschochen vnd nit anders ze tu^end noch ze gebend. Vnd ze warem vnd offem vrkúnd aller dirr vorgeschriben ding gib ich der selb Hainrich der Bader fúr mich vnd fúr alle min erben vnd nachkomen den selben fro Claren vnd Angnesen den Goldastinen vnd allen iren erben vnd nachkomen darúber disen brief mit minem aigen insigel besigelten, das ich offenlich daran gehenkt hab. Dirr brief ist ze Costentz geben, do man von Cristes gebúrt zalt drúzehenhundert jar, darnach in dem zwai vnd sehtzigosten jar, an sant Margareten abent.

Source Fulltext: Chartularium Sangallense VIII, Nr. 4817, S. 34-35.