Ich graf Hainrich von Montfort herr ze Tetnang¹ tůn kunt allen den, die disen brief ansehend oder ho^erend lesen, als ich mit lieplicher ta^eding || úber ain komen bin mit minem lieben brůdern grafAlbreht von Werdenberg dem jungen vnd mit graf Hugen² sinem sun vmb vierze||henhundert pfund pfenning Costentzer múntz, die si mir schuldig sint vnd gelten so^end, als min brief³ dar vmb vrkúndent vnd sagent, dar || vmb si mir versetzet hant na^vch allem reht Altstetten⁴ die stat vnd die baid kelnho^eff ze Bernang⁵ vnd ze Marbach⁶ vnd lút vnd gůt, die dar zů geho^erent, dar vmb so ha^vn ich bi gůten trúwen verhaissen vnd gelobt vnd verbint mich des mit disem brief gen den vor genanten grauen baiden vnd gen allen iren erben, ist daz si daz vor genant pfant Altstetten die stat vnd die egenanten kelnho^eff von mir ald von minen erben, ob ich enwa^er, wider lo^esent vor disem na^ehsten kúnftigen sant Martins tag mit vierzehenhundert pfunden pfenningen Costentzer múns vnd mit drissig pfunden der selben múntz ald ie zwen haller fúr ainen pfenning, als vil sich denne des gebúrt von den egescribnen pfenningen, a^vn geua^erd, vnd wenne si daz getůnt vnd mich ald min erben, ob ich enwa^er, des gůtes nach miner brief sag also gewerent vnd bezalent vor disem na^ehsten sant Martins tag, so sollin ich oder min erben, ob ich nit wa^er, den egescribnen grauen oder iren erben, ob si nit wa^erint, die vor genanten statt Altstetten vnd die baid kellnho^eff Bernang vnd Marbach mit lút vnd mit gůt vnd mit aller zů geho^erd vnd alle ir brief, die si mir dar vmb geben ha^vnt, wider geben vnd antwrten vngeuarliche vnd a^vn alle wider red, alz wir si denne ze ma^vl inne ha^vnt, a^vn alle geua^erd. Vnd des ze vrkúnd gib ich der e genant graf Hainrich von Montfort den e gescribnen minem lieben brůdern graff Albrehten dem jungen vnd graf Hugen sinem sun vnd iren erben, ob si nit wa^erint, disen brief besigelt mit minem aigen hangenden insigel. Der geben ist an dem na^ehsten ma^entag na^vch des hailgen crútz tag, als es funden wart, do man von Cristus geburt zalt drúzehenhundert jar, sehtzig jar vnd dar nach in dem andren jare.

Source Fulltext: Chartularium Sangallense VIII, Nr. 4807, S. 27-28.