Universis sancte matris || ecclesie filiis, ad quos presentes littere pervenerint, nos miseracione divina Cosmas Saraensis¹, || Jacobus Leopatrensis², Nicolaus Laicisanensis³ archiepiscopi, Albertinus Surmenensis⁴, Lazarus Botron||tinensis⁵, Philippus Lauatensis⁴, Robertus Dauatensis⁴, Raphael Archadensis⁶, Egidius Fauariensis⁴, Johannes Armirotensis⁴, Franciscus Vrehenensis⁷, Augustinus Salubriensis⁸ episcopi salutem in domino sempiternam, Splendor paterne glorie, qui sua mundum illuminat ineffabili claritate, pia vota fidelium de clemencia et eins maiestate sperancium tunc enim favore benigno prosequitur, cum devota ipsorum humilitas sanctorum meritis et precibus adiuvatur. Cupientes igitur, ut ecclesia parrochialis sancti Michaelis in Lutenspurg⁹ Constanciensis diocesis congruis honoribus frequentetur et a Christi fidelibus iugiter veneretur, omnibus vere penitentibus contritis et confessis, qui ad dictam ecclesiam in singulis beate Marie virginis festivitatibus ac omnibus aliis infrascriptis videlicet natalis domini, circumcisionis, ephiphanie, per totam quadragesimam parasceves, pasche, ascensionis, penthecostes trinitatis et corporis Christi, invencionis et exaltacionis sancte crucis, sancti Michaelis, sanctorum Petri et Pauli apostolorum et omnium aliorum apostolorum, sancti Johannis Baptiste et Ewangeliste et omnium aliorum ewangelistarum et quatuor sancte Romane ecclesie doctorum, in die omnium^a) sanctorum et commemoracione omnium animarum dicteque ecclesie dedicacionibus, sanctorum Stephani, Georgii, Laurencii, Martini, Nicolai, Erasmi ac sanctarum Marie Magdalene, Marthe, Anne, Margarete, Vrsule, Dorothee, Barbare, Elizabeth, Katherine et per octavas omnium festivitatum predictorum octavas habencium singulisque diebus dominicis et festivis, causa devocionis oracionis aut peregrinacionis accesserint seu qui missis vesperis predicacionibus aut aliis divinis officiis ibidem interfuerint vel corpus Christi seu oleum sacrum infirmis cum portantur secuti fuerint aut qui in serotina pulsacione campane flexis genibus ter Ave Maria dixerint vel qui ad fabricam dicte ecclesie luminaria ornamenta libros calices aurum argentum animalia tam in eorum testamentis quam extra donaverint legaverint seu donari legari procuraverint seu quovis alio modo dicte ecclesie manus porrexerit^b) adiutrices vel qui pro salubri statu domini episcopi presencium confirmatoris necnon pro Johanne de Wittenwile¹⁰ plebano ibidem et Bertoldo eins fratri clerico dicte diocesis harum impetratorum ac pro animabus amicorum et benefactorum suorum et aliis Christi fidelium in purgatorio existentibus pie deum oraverint, quandocumque quocienscumque vel ubicumque premissa vel aliquod premissorum devote fecerint, de omnipotentis dei misericordia et beatorum Petri et Pauli apostolorum eius auctoritate confisi singuli nostrum quadraginta dies indulgenciarum de iniunctis eis penitenciis misericorditer in domino relaxamus, dummodo diocesani voluntas ad id accesserit et consensus. In quorum omnium testimonium sigilla nostra presentibus sunt appensa. Datum Auinion(e), anno domini millesimo trecentesimo sexagesimo secundo, indictione quintadecima, die decima mensis decembris, pontificatus domini Vrbani pape quinti anno primo.

Source Fulltext: Chartularium Sangallense VIII, Nr. 4839, S. 54-55.