Wir Geori von gottes gnâden abt dez gotzhûs ze sant Gallen¹ kúnden offenlich an disem brieue allen, die in sehent lesent oder ho^erent lesen, || daz fúr vns kam Anna, Fluris dez Marschalks sa^elgen von Mainbrehtzhofen² elichi tohter, wîlunt Ru^edgers von Bůchenstain³ êlichi hûsfro^vw, do || wir offenlich ze geriht sâssen, vnd nam Jacob Růpreht burger ze sant Gallen ze fúrsprechen, der offenot offenlich vor vns vnd dem geriht, daz dú || selb Anna zwainzig mutt kernen vsser dem kelnhof ze Túffenbach⁴ vnd zehen mutt kernen vnd ain pfunt pfenning vsser dem kelnhof ze Berg⁵ vnd zwai pfunt Pfenning von Gaiserwald⁶ alles ja^erliches geltes von vnsren vordem vnd vnserrn gotzhus ze ainem gewerten pfant vntz her manig jar inne gehept vnd genossen hett vnd daz si sich dez erkandi, daz ez ir sêl nutz vnd hail wa^er, ob si daz selb pfant vnserm gotzhus ledig liess vnd daz si o^vch von der selben erkantnust wegen mit gůter vorbetrahtung, so si darúber vil vnd dik gehept hett, frilich vnd willeklich vns an vnsers gotzhus stat daz selb pfant vnd daz vorgeschriben kernen vnd Pfenning gelt gantzlich vnd gar durch ir sei willen ledig lassen vnd sich dez entzihen wo^elt, vnd bat vns der selb ir fúrsprech, daz wir erfu^erint an gemainer vrtail, wie si daz tůn so^elt, daz ez kraft hett nv^ vnd o^vch hie nâch. Daz tâten wir, vnd ward ertailt an gemainer vrtail, daz die êgenemt Anna ainen vogt nemen so^elt vor vns an dez gerilltes ring, wen si wo^elt, vnd mit dez hand an vnser hand daz tůn so^elt, vnd wenn daz bescha^ehi, daz o^vch daz wol kraft hett. Do nam die selb Anna Bartholome Blarrer ze vogt, vnd mit dez hand liess die selb Anna zwainzig mutt kernen geltes vsser dem kelnhof ze Túffenbach, zehen mutt kernen vnd ain pfunt pfenning geltes vsser dem kelnhof ze Berg vnd zwai pfunt pfenning geltes von Gaiserwald, die ir gewert pfant wârent von vnseren vordem vnd vnserm gotzhus, vns vnd vnserm gotzhus mit dem pfantschatz gantzlich vnd gar ledig vnd lôz vnd entzêch sich da mit dem selben ir vogt an vnser hand vnd ze vnsers gotzhus handen gar vnd gantzlich fúr sich vnd alle ir erben aller der reht vnd gewer vnd o^vch brief, so si hatt oder haben so^elt von ir oder von ir vordem wegen zů dem vorgeschribenen kernen vnd pfenning gelt von pfandes oder von dehainer ander sach wegen, also daz dú gewêr vnd och die selben brief, won si die niht wider geben moht, si werdent funden oder niht, ir vnd ir erben gantzlich vnd gar vnnútz vnd vnkreftig sin sont vnd vnserm gotzhus vnscha^edlich. Vnd swůr o^vch dú êgenemt Anna mit ir êgenemten vogtes willen, als o^vch ertailt waz, frilich vnd vnbezwungenlich ainen gelerten aid ze den hailgen fúr sich vnd ir erben, daz si noch ir erben wider den vorgeschribenen sachen vnd geta^eten niemer tůn noch komen sont mit gaistlichem noch mit weltlichem geriht noch ân reht noch mit enhainen sachen. Vnd ist diz alles beschehen vnd vollefu^ert mit allen den worten vnd werken, so darzů gehortent vnd notdirftig^a) warent von reht vnd von gewonhait vnd als an gemainer vrtail ertailt ward, daz ez kraft hett vnd haben so^elt nv^ vnd o^vch hienâch. Vnd ze ainer gantzzer sicherhait aller der vorgeschribenen dinge so haben wir abt Geori vnser insigel gehenkt an disen brief, won ez o^vch ertailt ward, daz wir daz tůn so^eltint. Wir die vorgenemten Anna Marschalkin, Jacob Růpreht ir fúrsprech vnd Bartholome Blarrer ir vogt in der vorgeschribenen sache veriehen offenlich, daz alles daz wâr ist vnd o^vch vollefu^ert vnd beschehen ist, daz da vor an disem brief geschriben stat. Vnd dez alles ze merer sicherhait so haben wir o^vch v´nserú insigel gehenkt an disen brief. Der geben ist ze sant Gallen an dem na^ehsten ma^entag vor sant Andres tag dez zwelfbotten in dem jâr, do man zalt von gottes gebúrt drúzehenhundert jâr, sehszig jâr vnd darnach in dem andern jâre.

Source Fulltext: Chartularium Sangallense VIII, Nr. 4835, S. 51-52.