Wir Katherina a^ebetischin vnd aller der conuent dez go^vtzhus ze Magginowe¹ in Costenzer || bistůme gelegen sant Bernhartz ordens kúnden allen den^a), disen brief ansehent oder || ho^erent lesen, ain erkantnúst der nach gescriben dinge. Wissent alle, den es ze wissent beschicht, || daz wir durch besserung vnd durch meren nutz v´nsers vorgenanten gotzhus ze schaffent ze ko^vffent geben habent vnd gent mit disem brief den erwirdigen gaistlichen herren dem comendúr vnd den brůdern dez huses ze Tobel² sant Johans ordens dez hailigen spitals ze Jerusalem in Costenzer bistum gelegen Ha^edinen dez Dietzis sa^elgen von Frowenuelt³ elichen to^vchter, die v´nsers vorgenanten closters reht aygen ist gewesen, mit allen den kinden, die sú úmer gewinnen sol ald mag, die wil sú lebet, vmb zwai pfunt gůter vnd gena^emer Costenzer pfenning, der wir von inen ga^entzlich geweret sint. Vnd lo^vbent o^vch daz mit gůten trúwen, den vorgenanten dem comendúr vnd den brůdern dez husez ze Tobel vmb die vorgenanten Ha^edinen enkainen krieg no^vch enkain ansprach an weltlichem no^vch an gaistlichem geriht niemer ze tůnne, da mitte der vorgenant ko^vffe verbo^eset oder geirret mo^eht werden in kain wis. Were aber daz, daz v´ch ald úwer gotzhus dehan krieg ald ansprach vmb die vorgenanten Ha^edinen vnd vmb irú kind, ob si dehainú gewinnet iemer, an gienge, da wellen wir v´ch fúrstan an allen stetten nach rehtte. Vnd dar vmb durch sicherhait aller dirre dinge, so hie vor gescriben sint, so geben wir Katherina von gottez genaden a^ebetischin ze Maggno^vwe den vorgenanten dem comendúr vnd den brůdern ze Tobel disen brief besigelt mit vnsers closters insigel. Dis geschach vnd wart dirre brief geben ze Magno^vwe in v´nserm closter in dem jare, do man von gottez gebúrtte zalt drúzehenhundert jar, dar nach in dem andern vnd sehtzigosten jar, an dem na^echsten samstag vor aller hailigen tag.

Source Fulltext: Chartularium Sangallense VIII, Nr. 4829, S. 46-47.