Allen, die disen brief sehent oder ho^erent lesen, kúnde ich Hainrich der Seriant burger ze Winterthur¹, daz ich ze Winterthur offenlich ze gerichte sass || an Hainrich Geue^atterlis statt schulthais² ze Winterthur, vnd kamen da fúr gerichte die erbern lúte brůder Egbrecht Geue^atterli klosterherre || ze Wettingen³ in namen vnd an statt der erwirdigen gaistlichen fro^vwen . . der e^aptischen vnd des conuentes gemainlich des klosters ze Maggno^vwe^a)4 || des ordens von Zitel gelegen in Costenzerre bistům ze ainem tail vnd brůder Walther von Mesikon⁵ schaffner der erwirdigen gaistlichen fro^vwen der priorin vnd des conuentes ze To^ezze⁶ an der selben siner fro^vwen statt ze dem andern tail, vnd offente da der vorgenant brůder Egbrecht Geue^atterli, daz dú eptischenn vnd der conuent des klosters ze Maggno^vwe^a) recht vnd redlich ze ko^vffenne geben hant der priorin vnd dem conuent des vorgenanten klosters ze To^ezze ain gu^ettli gelegen ze Rorbos⁷, daz man nemmet vnd haisset des We^achters schůposs, fúr zinsaigen vmb zwen phenning an sant Petern gen Emerrach⁸ mit holtz vnd mit ve^alde mit wisan mit ackern vnd mit allen sinen rechten nútzen vnd zůgeho^erden vmb drú vnd drissig phunt phenning hallerre, der die klosterfro^vwen ze Maggno^vwe^a) gantzlich von dien klosterfro^vwen ze To^ezze gewert sint, als der egenant brůder Egbrecht ir gewisser botte vor gerichte veriach, vnd zo^egte o^vch da der selb brůder Egbrecht ain offennen brief besigelt mit der eptischenne vnd mit des conuents insigeln des klosters ze Maggno^vwe^a), der selb brief daz vrkundete vnd wisete, daz die selben klosterfro^vwen ze Maggno^vwe^a) dem selben brůder Egbrecht irem getrúwen bichter vollen gewalt geben hatten vnd gaben mit dem brief, dien klosterfro^vwen ze To^ezze daz vorgenant gu^ettli ze vertigenne vnd vfzegebenne an ir statt, vnd do der brief gelesen wart, do batt er im erfarn an ainer vrtail, wie er dien klosterfro^vwen ze To^ezz daz selb gu^ettli vertigen so^elte, daz es nu vnd hernach kraft hette. Da fragte ich vrtail vmb vnd wart ertaillot mit gesamnoter vrtail, daz die klosterfro^vwen ze Maggno^vwe dem selben brůder Egbrecht iren gewalt vmb dú vertigung mit ir brief vnd insigel so willeklich geben hetten, daz er es an ir statt wol vertigen vnd vfgeben mo^echte, vnd wo er sich des gu^ettlis da vor dem gerichte verzige mit gelerten worten an des egenanten schaffners hand zů der klosterfro^vwen wegen gemainlich ze To^ezz vnd daz die klosterfro^vwen ze Maggno^vwe des gu^ettlis wer weren nach rechte, daz es denne billich nu vnd hernach kraft hette. Vnd also stůnt der vorgenant brůder Egbrecht dar fúr gerichte vnd vertigote vnd gab vf an der klosterfro^vwen statt ze Maggno^vwe^a) daz vorgenant gu^ettli mit aller siner rechtung vnd zůgeho^erde vnd verzech sich des selben gu^ettlis an des egenanten schaffners hand ze To^ezze zů der priorin vnd des conuents wegen gemainlich des vorgenanten klosters ze To^ezze mit gelerten worten, als gerichte vnd vrtail gab. Vnd des alles ze warem vrkunde han ich, als mir vor gerichte ertailt wart, des egenanten schulthaizzen insigel von des gerichts wegen gehenkt an disen brief. Wir dú eptischenn vnd der conuent gemainlich des klosters ze Maggno^vwe^a) vergehen o^vch an disem brief ainer gantzen warhait aller der ding, so vor von v´ns an disem brief verschriben stant, vnd loben, o^vch dú vertigung ste^atte ze habenne, dú der egenant brůder Egbrecht an v´nserre statt vmb daz vorgesaite gu^ettli getan hat, vnd da wider mit enhainen sachen niemer ze tůnne, vnd verzihen v´ns aller frihait rats vnd helf gaistlicher vnd we^altlicher gerichten, da mit wir die klosterfro^vwen ze To^ezze oder ir nahkomen an dem vorgenanten gu^etlin in kain wise bekúmberren oder beswe^arren mo^ehten, vnd loben o^vch fúr v´ns vnd v´nser nachkomen, des selben gůtes wer ze sinne nach rechte fúr zinsaigen, als vor beschaiden ist, fúr alle ansprach, wo des die klosterfro^vwen ze To^ezze oder ir nahkomen notdurftig sint vff gaistlichen vnd we^altlichen gerichten, ane guerde. Vnd des alles ze vrkúnde vnd meren sicherhait haben wir vnsers conuents vnd vnserre eptischenn ingesigel gehenkt an disen brief. Der geben wart ze mittem brachode nach Kristi geburt drúzehenhundert vnd sechtzig iar, darnach im dritten iare.

Source Fulltext: Chartularium Sangallense VIII, Nr. 4881, S. 88-89.