Wir Růdolf von gotes gnaden hertzog ze O^ester.¹ ze Styr vnd ze Kernden vnd graf ze Tyrol etc. bekennen vnd tůn kunt, || daz wir in narnen vnd an statt v´nser selbers vnd vnsrer bru^edern, der vollen gewalt wir haben, vnd fúr v´nser aller erben || dem erwirdigen geistlichen vnserm getrewen andechtigen abt Niclausen von Einsidellen² solich fryheit geben haben vnd geben || ouch von sundern gnaden wizzentlich mit disem brief, daz vnser getrewen lieben . . der vogt . . der rat vnd die burger von Ratprêchtswile³ vff sin vnd sines gotzhuses hus, das er in derselben vnsrer statt ze Raprêchtzwile hat, noch vff sin eigenlich gesinde oder amptlúte, die er in demselben sinem huse ietzunt wonende hat oder hie nach gewinnet, kein stúr noch wacht vflegen sullent vnd daz man ouch nieman in dem selben sinem huse anvallen verbieten noch verheften sol vmb dheinerley sache noch schulde, es si denne vmb solich sache, die einem an den lip gat, ane geuerde. Were aber, daz der egenant abt oder sin nachkomen das vorgenant huse iemann hinlihe oder ze kouffende gebe, der ein werbender man vnd ein offen wirt we^are, der sol von sinem libe vnd gůte stúren vnd dienen, alz ein ander ingesezzen burger daselbs nach siner mazze tůt. Vnd sol ouch denne die vorgeschriben vnser friheit vnd gnad an dem selben huse von des verbietendes vnd anuallens wegen, alz vorbescheiden ist, dannanthin ab sin gentzlich ane geuerde. Wir haben ouch in dem namen alz da vor dem egenanten abt von Einsideln zů sins selbers vnd siner nachkomen an der abtye handen ze ergetzung des schaden, den er von vnsern wegen an sinem var zen Hurden⁴, das im von vnserr núwen brugge ze Ratprezwile v´ber den se vnv^ebig vnd vnnutzlich worden ist, emphangen hat vnd noch fúrbazz nemen vnd emphahen mag, solich gnad getan vnd solich friheit gegeben vnd geben ouch mit disem brief, daz er vnd sin husgesind vnd amptlút vnd diener v´ber dieselben vnser brugg ze Raprêchtzwile hin noch her von ir selbs liben noch gu^etern, daz si dar vber fu^erent, keinen zol geben sullent nu noch hie nach ewiklich. Dar vmbe in dem namen alz da vor fúr vns vnserr bru^eder vnd erben emphelhen vnd gebieten wir allen vnsern gegenwúrtigen vnd kúnftigen vo^egten rat vnd burgern zollern vnd amptlúten ze Ratprêchtzwile, daz si den egenanten abt von Einsidellen vnd alle sine nachkomen an der abtye ewiklich bi allen den vorgeschriben vnsern fryheiten vnd gnaden, die wir inen geben vnd getan haben, alz vorbescheiden ist, halten vnd ru^eweklich beliben lazzen ane allerschlacht widerrede oder irrung vnd ane alle geuerde, wan ouch wir si da bi halten vnd gnediklich beliben lazzen wellen. Mit vrkúnd dizz briefs, der mit vnserm eigen ingesigel versigelt vnd durch hende des erwirdigen pischof Johanse von Gurk⁵ vnsers lieben kantzlers vnd lantvogtes ze Swaben vnd in Elsazz gegeben ist ze Baden⁶ in Ergew an fritag vor vsgandem meyen nach gots geburt tusent drúhundert vnd sechtzig jaren vnd darnach in dem dritten jare.||
Transeat.

Source Fulltext: Chartularium Sangallense VIII, Nr. 4878, S. 86-87.