Allen den, die disen brieff an sehent oder ho^erent lesen, kúnd ich V^olrich Ro^etenberg stat amman ze Arbôn¹ vnd vergih offenlich mit disem brieff, dz fúr mich || kam, do ich offenlich ze geriht saz ze Arbon in der stat an offener strâz, der ersam V^olrich Gebhart burger ze Arbon vnd offenot vnd veriah da vor mir, dz er hetti || ze kôffent geben reht vnd redlich sinen zehenden ze Wa^eldi², der da gat vss Arnolds hôff, mit allen rehten vnd zůgeho^erde vnd zwô juchart akkers, die gelegen || sint in Dúffen Strâs³, die obna stôssent an den weg vnd nidna an den bach, ôch mit all(er) ir zůgeho^erde dem ersamen V^olrich Geltwiler burger ze Arbôn, der ôch do zemal vor geriht stůnd, vmb drissig pfunt vnd fúnf pfunt pfennig Costentzer múns gůter vnd gnamer, der ôch er von im ga^entzlich bezalt vnd gewert wa^er, vnd bat im der vorgenant V^olrich Gebhart do ze eruarend an einer offener vrtail, wie er den ietzbenempten zehenden vnd ôch die akker bra^eht in des vorgenanten V^olrichs Geltwilers hant, dz ez kraft vnd maht hett nach dem rehten nu vnd hie nach. Do wart ôch vmb gefragot vnd ainhelleklich ertailt vff den aid mit gemainer vnd gesampnoter vrtail, dz er den obgenanten zehenden mit den akkern bi zwein erberen mannen vnd die ôch der selben lehen hettind vff santi vntz an den rehten lehenherren vnd ez denn wol kraft vnd maht hetti, vnd do dz ôch also ertailt wart vnd vssgesprochen, do sant der vorgenant V^olrich Gebhart bi den ersamen lúten Albrehten Scherern vnd Hansen Geltwiler den júngern beid burger ze Arbon den obgenanten zehenden vnd ôch die akker vff an den rehten lehenherren, alz ôch do ertailt wart. Vnd ist diz allez beschehen mit worten vnd werken, so dar zů gehort oder geho^eren moht, vor offenem geriht nach der stat ze Arbon reht vnd gewonhait. Vnd dez ze ainem offenem vrkúnd vnd sta^eter warhait, dz ez stat belibe nu vnd hie nach, so hân ich V^olrich Ro^etenberg vorgenanter min aigen insigel gehenket an disen brieff, wan ez vor mir an offenem geriht beschehen ist. Dirr brieff ist geben ze Arbon in der stat, do man zalt von gotz gebúrt drúzehenhundert iar vnd vier vnd sehtzig iar, an dem na^ehstem samstag nach sant Ambrosien tag in dem aberellen.

Source Fulltext: Chartularium Sangallense VIII, Nr. 4927, S. 124-125.