Wir Geori von gottes gnâden abt des gotzhus ze sant Gallen¹, das ân alles mittel zůgeho^ert dem stůl ze Ro^vm, veriehen vnd || tůn kunt mit disem brief allen, die in ansehent lesent oder ho^erent lesen, das fúr v´ns kam v´nser lieber getrúwer Albreht von || Lindenberg schulthais ze Wil² vnd fůgt vnd macht da mit gůter vorbetrahtung vnd beschaidenhait mit v´nser hand getat || gůten willen gunst vnd verhengd vnd fu^egt vnd machet reht vnd redlich mit disem brief Claren vnd Elisabethun sinen swo^estren closterfrowen ze Ta^ennikon³ das gůt ze Gundeltswille⁴ vnd das gůt ze Hasla⁵ mit allen rehten, die selben gu^eter von v´ns vnd v´nserm gotzhus sin lehen sint, ze ainem rehten lipding vnd in lipdinges wis mit so^elicher beschaidenhait vnd geding, das die vorgenanten Clara vnd Elisabeth dú vorgeschriben gu^eter mit allen rehten nútzen vnd gewonhaiten vnd mit aller zůgeho^ert haben niessen besetzen vnd entsetzen sont alle die wil sú bald lebent, vnd wenn aini vnder inen abstirbet, so sol die ander, die dannoht lebet, dú vorgeschriben gu^eter mit allen rehten vnd nútzen haben vnd niessen besetzen vnd entsetzen ze gelicher wis vnd in allem dem rehten, als ob sú baid lebtin, vnd sont och wir noch v´nser nachkomen noch der vorgenant Albreht noch sin erben noch nieman andrer von v´nsern noch von des vorgenemten Albrehtz wegen sú daran nút sumen irren noch bekrenken weder mit geriht noch ân reht, vnd wann sú baid absterbent, so sont dú vorgeschriben gu^eter wider an den vorgenemten Albrehten von Lindenberg ald an sin erben vallen. Vnd ist dis alles beschehen vnd volfu^ert mit allen den worten vnd werken, so nâh gewonhait vnd nâh reht darzů gehorten vnd notdurftig waren vnd als reht sitt vnd gewonlich was. Vnd ze offenem waren vrkúnd vnd sta^eten sicherhait aller diser vorgeschriben ding henken wir abt Geori da vorgenant v´nser insigel an disen brief. Darnach vergich ich Albreht von Lindenberg da vorgenant ain gantz warhait aller diser vorgeschriben ding vnd das alles das war ist, daz der erwirdig min gena^ediger herre abt Geori da vorgenant von mir veriehen hat an disem brief, vnd ze merer sicherhait der selben ding henk ich och min insigel an disen brief. Der geben ist ze Wil in dem iar, do man zalt von gottes gebúrt drúzehenhundert iar, sehzig jar vnd darnach in dem vierden iar, an dem na^ehsten zinstag vor sant V^olrichs tag.

Source Fulltext: Chartularium Sangallense VIII, Nr. 4946, S. 142.