Officialis curie Const(anciensis) omnibus presencium inspectoribus noticiam subscriptorum cum salute. Ne gesta modernorum prolixitate temporis labilique memoria hominum inficiantur, utile est ea litterarum et subscripturarum testimonio prohennari^a). Noverint igitur presencium inspectores universi et singuli, quos nosce fuerit oportunum, quod constituti coram nobis anno domini M°CCC°LXIIII° feria secunda ante festum beati Jacobi apostoli proxima iudicii in figura dilectus in Christo Jacobus dictus Niessli sacerdos una cum discreto viro Alberto dicto Blarer civi Const(anciensi) sibi pro advocato ad infrascripta peragendum coram discreto viro ministro civitatis Const(anciensis) rite et legitime sententialiter et diffinitive servatis servandis deputato ex una, Bartholomeus et Johannes dicti Blarer et Johannes dictus Burgower cives et procurens^b) hospitalis domus pauperum opidi sancti Galli pro ipsi hospitali ex parte altera, prefatus Jacobus Niessli submittens se in hac parte ex certa scientia et causa nostre iurisdictioni non vi nec metu coactus nec dolo aliquo ut asseruit circumventes^c) sed sponte et libere bona et matura deliberacione et tractatu sollempni et sepius prehabitis fatebatur in iuris^d) coram nobis et publice confessus fuit et est pro se et heredibus suis universis se renunciasse et cessisse et presentibus eciam coram nobis de consensu expresso dicti Alberchti Blarer advocati sui renunciavit et cessit renunciat et cedit omni iuri actioni requisicioni et impeticioni sibi in omnibus et singulis bonis et possessionibus sitis in Almenstorff, que possessiones et bona olim abbatisse et conventui monasterii sanctimonialium in Kalkerren¹ et deinde quondam Anne olim uxori quondam magistri Nicolai phisici de Rúdlingen² iure proprietatis pertinuerunt et pertinere dinoscebantur et que pro^a) hereditariam devolucionem ex morte ipsius quondam Anne ad ispum Jacobum et conterinos^e) eiusdem sunt devolute, iuribus et pertinenciis possessionum earundem ex causis et racionibus quibuscumque usque in hunc diem competentibus seu quovismodo competere valentibus ad manus et potestatem Bartholomei, Johannis et Johannis procuratorum predictorum et nomine dicti hospitalis, et in reconpensam dicte renunciacionis et cessionis prefatus Jacobus Niessli fatebatur se ab ipsis procuratoribus nomine quo supra ex certa scientia habuisse et habere sexaginta et septem libr. den. Const. et illos numeratos recepisse et in numerata pecunia habere et in usus suos utiles et necessarios et evidentes convertisse et conversos fore. Promisit insuper dictus Jacobus Niessli fide ab ipso coram nobis etiam de consensu dicti Alberti advocati sui corporaliter prestita nomine sacramenti sollempni interposita stipulacione predictas renunciacionem et cessionem inviolabiliter ratas et gratas habere et tenere perpetuo atque firmas sub ypotheca et obligacione omnium rerum suarum pro se et heredibus ac successoribus suis universis et contra ipsas renunciacionem et cessionem ut premittitur rite et legitime factas numquam facere vel venire pro^a) se alium vel alios seu interpositas personas neque contra venire volenti aliqualiter consentire in iudicio vel extra iudicium inposterum vel adpresens de facto vel de iure quovis quesito ingenio vel colore directe vel indirecte. Cavit eciam dictus Jacobus de eviccione dicte renunciacionis et promisit predictis procuratoribus, si dictum hospitale occasione dictarum possessionum et bonorum quovis modo a quocumque seu quibuscumque turbaretur seu inquietaretur, fideliter et efficaciter assistere sub propriis suis dampnis periculis sumptibus et expensis et prestare de ipsis possessionibus et bonis dictis procuratoribus et eorum successoribus ac eciam ipso hospitali debitam et legitimam warandiam secundum consuetudinem civitatis Const(anciensis) et terre communem et generalem. Renunciavit quoque prefatus Jacobus et presentibus renunciavit de consensu dicti Alberti sui advocati pro se et heredibus suis singulis et universis in et super premissis excepcioni doli mali infactum accioni debite solempnitatis non adhibite decepcionis et excepcionis cuiuslibet peccunie non numerate non tradite non solute litteris graciis habitis seu obtentis vel in posterum obtinendis pro^a) se vel alios a sede apostolica vel aliunde necnon iuribus consuetudinibus et constitucionibus universis civitatum oppidorum villarum et locorum quorumcumque editis et edendis omnique iuris auxilio canonici atque legum, mediante ipse Jacobus vel eius heredes iuvari facere vel venire aut quovis modo attemptare possent contra ea, qui^f) in presentibus litteris continentur, in toto vel in aliqua sui parte adhibitis in premissis omnibus et singulis verborum et gestuum sollempnitatibus et renunciacionibus debitis et consuetis necnon excepcioni, qua dicitur quod generalis excepcionum renunciacio inefficax existat, supplentes insuper omnem defectum auctoritate nostra ordinaria, inquantum possumus, si quis in huiusmodi negocio postmodum forsitan appareret seu reperiretur. Et in premissorum omnium et singulorum testimonium et rotorum firmitates^g) sigillum curie Const(anciensis) ad instantes dicti Jacobi renunciantis preces una cum sigillo ipsi^f) Jacobi et Alberti dicti Blarer advocati sui predicti propriis presentibus duximus appendendum, quibus et nos prefati Jacobus dictus Niessli sacerdos et Albertus dictus Blarer civis Const(anciensis) ipsi Jacobo ut prefertur pro advocato deputatus ad maiorem certitudinem firmitatem et cautelam omnium premissorum recognoscentes premissa omnia et singula per nos videlicet per me Jacobum prefatum et de consensu mei Alberti expresso modo premisso esse facta meque Jacobum predictum et heredes meos universos ad ratihabicionem et inviolabilem observacionem omnium et singulorum premissorum firmiter astringens sigilla nostra propria una cum sigillo prelibati domini officialis curie Const(anciensis) duximus appendenda. Datum et actum Const(ancie) anno et die quibus supra, indictione secunda.

Source Fulltext: Chartularium Sangallense VIII, Nr. 4950, S. 145-147.