Wir Karl von gots gnaden Romischer keiser zu allen czeiten merer des reichs vnd kunig ze Beheim bekennen || uffinlich an diesem brieue vnd tun kunt allen leuten, die yn sehen odir horen lesen, daz wir den burgern gemein||lich der stad zu Rynegg⁴, dieselbe stad von vnsern voruaren an dem reiche kunigen vnd keisern vnd auch von || vns phant der etiln Albrechtes grauen zu Werdemberg vnd herren zu dem Heiligenberg des alten, Albrechtes sines sones vnd Hugen des jungen grauen Albrechtes son⁵, als sie mit iren brieuen wol bewisent, die gnade vnd freiheit gegeben haben vnd geben auch mit diesem brieue mit vnser keiserlicher macht, daz die burger derselben vnser vnd des richs stat Rynegg nymand angrifen pfenden no^eten heften noch bekrenken sol mit gerichte noch an gerichte an dheinen steten fůr die schulde, die die obgenanten grauen von Werdemberg schuldig sin, wan wir nyt wollen, daz die obgeschriben vnser burger von Rynegg wedir ir leip noch ir gut pfant sin sullent an dheinen steten fůr der vorgeschriben grauen gulte odir schulde. Mit vrkúnd ditz brieues versiegelt mit vnser keiserlichen maiestad ingesigel. Geben zu Budissin⁶ noch gots geburte drutzenhundert jar, dar noch in dem vier vnd sechtzigestem jare, an dem nehesten durnstage noch dem heiligen pingstage, vnsir reiche in dem achtzenden vnd des keisertums in dem tzehenden jare.

Source Fulltext: Chartularium Sangallense VIII, Nr. 4935, S. 130.