Allen den, die disen brief an sehent lesent oder ho^erent lesen, tůn ich Eppo von Eppenstain¹ kunt vnd vergih dez offenlich mit || disem brief, daz ich von miner redlichen nôt wegen die nachgenemten erber lút Herman den Keller von Mezzikon² || vnd Ma^ehthilten sin elichen husfrowen wilent dez Veltmans tohter baidú ha^elbú mit lib vnd mit gůt, so sú ietz || hand ald noch iemer gewinnent, vnd alle die manschaft vnd lehenschaft, die ich hatte an der búnten gelegen ze Mûren³, die man nemt dez Gúnthers Búnt, vnd an der hofstat gelegen ze Mezzikôn, die man och nemt dez Gúnthers hofstat, fúr mich vnd min erben redlich vnd reht verkoft vnd ze koffenn geben han dem fromen kneht Bartholomen dem Bo^eschen burger ze Wil⁴ vnd sinen erben, ob er nit wa^er, vmb vier pfunt pfenning allez gůter vnd gena^emer Costenzer múns, dero ich nach minem willen vnd nach miner vergiht gar vnd gantzlich von im bin gewert vnd in minen redlichen nutz han bewent vnd bekeret, die vorgeschriben lút vnd och die manschaft vnd lehenschaft min lehen gewesen sint von dem edeln herren graf Friderich von Toggenburg⁵, vnd han im sú och geuertegot vnd vf geben, als reht sitte vnd gewonlich waz, vnd dar vmb verzih ich vorgenemter Eppo von Eppenstain mich vnd han mich ôch verzigen mit disem brief fúr mich vnd alle min erben vnd nachkômen der vorgeschriben lút ir libes vnd ir gůtez vnd ôch der vorgeschriben manschaft vnd lehenschaft aller aigenschaft aller manschaft aller lehenschaft aller besatzzung vnd kuntschaft aller gewer lút vnd brief alles erbes vnd erbschaft aller gemaind vnd tailez aller zúgnust aller reht rehtung vordrung vnd ansprach, so ich an den zů den vnd von der vorgeschriben lút vnd ôch der manschaft vnd lehenschaft wegen ie hatte gewan ald nôch iemer gewinnen mo^eht vff gaistlichem ald vff weltlichem geriht^a) oder an reht ald mit kainer laig ander sach, vnd daz ich nôch enkain min erben noch nieman andre von minen wegen noch an miner stat den selben Bartholomen Bo^eschen noch sin erben da von niemer me sont ansprechen vf triben bekúmberron noch bekrenken noch in kain wise beswa^erren noch dar an sumen weder mit reht noch an reht noch mit enkainen andren sachen. Ich Eppo von Eppenstain da vorgenemt han ôch gelobt vnd loben mit disem brief fúr mich vnd alle min erben, die ich herzů binde mit disem brief, der vorgeschriben lút vnd ôch der manschaft vnd lehenschaft wer ze sinne nach reht vnd och den vorgenemten Bartholomen Bo^eschen vnd sin erben dar vmb ze versprechenn vnd ze versta^enn an allen stetten an allen iren schaden gen aller maniglichem, wenn wa oder wie dik sú dar vmb angesprochen geschadgot oder vf getriben werdent, an alle geuerd. Vnd dez ze ainer warhait vnd offem vrkúnd aller diser vorgeschribener ding vnd bedingde henk ich Eppo von Eppenstain da vorgenemt min insigel fúr mich vnd alle min erben an disen brief. Der geben ist ze Wil in dem iar, do man zalt von gottez gebúrt drúzehenhundert iar, sehzig iar, dar nach in dem vierden iar, an sant Niclaus abent.

Source Fulltext: Chartularium Sangallense VIII, Nr. 4970, S. 162-163.