Wir die . . ra^ete gross vnd klain vnd alle burger gernainlich der stat ze Costentz tůnt kvnt vnd vergehin offenlich an disern gegenwúrtigen brief allen, die in ansehent alder ho^erent lesen, vmb alle die sto^esse vnd misshellvng, die || beschehen vnd vfgeloffen sint zwischen v´ns vnd den erwirdigen herren abt Eberharten vnd sinem conuente des gotzhus in der Richen Ow¹, svnderlich gen hern Mangolten von Brandis² vnd Eberharten von Clingen³ klosterherren des selben gotzhus in der || Richen Owe, von Matheus des Vischers wegen von Petershusen⁴, von der húser ho^ef vnd ander gůt wegen, dv´ den selben klosterherren darvmb gewu^estet sint vnd darvmb och der obgenant Mangolt von Brandis vnser burger V^olrich von Rogwile⁵ || der stetamman vnd sinen vettern Johansen von Rogwile geuangen hatt, daz wir der selben sto^ess alle mit ainberem rat willeclich vnd gern komen sint vff vnser aidgenossen, die wir och darvmb gen V´berlingen⁶ gemant hatten, daz sint die von sant Gallen von Lindow⁷ von Wangen⁸ von Rauenspurg⁹ von V´berlingen vnd von Bůchorn¹⁰, dv´ selb botschaft, die och von den selben obgenanten stetten gen V´berlingen geschikket warent, die hant v´ns och alle lieplich vnd frv´ntlich verrihtet vnd verainbert, als hie nach geschriben stat, also daz wir alle mit gůtem willen vmbetwungenlich fúr v´ns vnd alle burger ze Costentz vnd vnser helfer vnd diener vnd fúr alle die, v´ber die wir ze gebietent hant vnd die ze der selben sach gehaft sint, des selben vnsers herren von Ow, des conuentes vnd des gotzhus vnd svnderlich hern Mangoltes von Brandis vnd hern Eberhartes von Clingen vnd aller iro helfer vnd diener vnd aller der, die ze der selben sach gehaft sint ald die mit worten werken geta^eten stúr ald helf darzů getân hant, vmb die selben sto^ess vnd missehellvng, wie die genant sint, si sigin benent ald vnbenent, die vntz vff disen hv´ttigen tag zwischen vns beschehen vnd vfgeloffen sint, iro aller reht getrúwe gůt frv´nd sin vnd wesen sont, vnd haben och die selben frv´ntschaft vnd sůn mit gůten trúwen gelobt sta^et ze hend luterlich âne alle geuerde. Wir lassent vnd sagent och mit vrkv´nd dis brieues den obgenanten vnsern herren abt Eberharten ledig vnd loss aller der aid vnd gelúbd, die er von der selben sto^essen vnd sachan wegen gesworn hatt. Wir haben im och wider geantwúrt vnd ledig gelassen dis flekken Ow¹¹, Alaspach¹², Stekboren¹³, Bernang¹⁴ vnd Mannenbach¹⁵ vnd och darzů alle sin lúte vnd gu^eter, der setzent wir in in nutzlich gewer vnd habent si och ledig gelassen vnd wider gegeben in aller der wise, als er vnd sin conuente v´ns die von der selben sach wegen in gesetzet hatte in pfandes wise vnd als er si des selben tages hatt, do er v´ns dv´ selben lút vnd gu^eter in satzt. Wa^er och, daz wir v´t erfu^erint ald das v´ns v´t gezaigot wurde, das noch vor handen wa^er vnd nit gewu^est wa^er, daz dem obgenanten hern Mangolten von Brandis vnd hern Eberharten von Clingen zů gehorti vnd das vnser burger genomen hettin, darzů so^elln wir mit bette vnd mit gůten trúwen v´nser bestes tůn, ob wir es wider bringen mv´gent, mo^ehtint wir es aber mit bette nit wider geschaffen, so sigin wir inen nv´t da fúr gebunden ze tu^ende vnd so^elin och darvmb och von inen ledig sin. Ez ist och beredd vnd mit ta^edingen begriffen, wenne V^olrich von Rogwile v´nser stetamman ledig wirt von der vanknv´ss, als in her Mangolt von Brandis geuangen hat, âne schaden, so sol er vnd och sin brůder Hainrich von Rogwile vnd och der obgenant Johans von Rogwile swerren gelert aid ze den hailigen vmb die selben sach vnd vanknv´ss ain sleht vrfeh vnd ain luter frv´ntschaft, vnd sont inen och ir frv´nde ze frv´nd darvmb gewinnen luterlich âne alle geuerde. Vnd haben v´ns dar v´ber verzigen vnd verzihent v´ns mit disem brief fúr v´ns vnd alle vnser erben vnd nachkomen vnd fúr alle die, v´ber die wir ze gebieten hant, aller hilf gaischelichs vnd weltlichs gerihtes aller priuilegy brief frihait vnd gnade, die wir von kv´ngen vnd kaisern hant ald die wir ald ieman von vnseren ald vnser stette wegen gewinnen ald erwerben mo^ehtin vome stůle ze Rôme, vôme riche ald anderswannan, da mit wir nv^ ald hernach v´t vinden ald erdenken kv´ndin alder mo^ehtin, daz wider dis lieplichen frv´ntlichen rihtung wa^er ald da mit wir die selben klosterherren ald das gotzhus ze Ow ald wer ze der selben sach gehaft ist, fúro bekrenken bekv´mberen oder angesprechen mo^ehtin, wen daz disv´ rihtvng gantz beliben sol, als dirre brief vnd och der brief wiset, den si v´ns von der selben rihtvng wegen besigelt geben hant. Vnd ze warem vnd offeme vrkv´nd vnd sta^eter sicherhait aller dirre vorgeschriben dinge geben wir v´nser stett insigel von vnser vnd vnser burger wegen an disen brief. Der ist ze Costentz geben, do man von Cristes gebúrt zalt drv´zehenhundert jar, darnach in dem ffv´nf vnd sehtzigosten jar, an sant Jacobs abende dez zwelfbotten.

Source Fulltext: Chartularium Sangallense VIII, Nr. 4989, S. 178-179.