Ich^a) Cůnrat von Sto^effeln custer dez gotzhûs ze sant Gallen¹ tůn kunt vnd vergich offenlich mit disem brieue allen, die || in sehent lesent oder ho^erent lesen, daz ich willeklich vnd frilich den ersamen in gotte der . . abtissennen vnd dem conuent || gemainlich dez closters ze Veltbach² luterlich durch got vnd von iro ernstlichen bet wegen reht vnd redlich geben han vnd || gib inen mit disem brieue gantzlich vnd gar a^ellú minú reht, die mich an geuallen vnd an erstorben sint von Johansen Hegbachs sa^elgen todes wegen, der ain rehter zinser waz, die wîl er lebt vnd in lip waz, vff sant Gallen altar in dem vorgeschribenen gotzhus ze sant Gallen, vff den selben altar dez obgenanten Johansen sa^elgen geswistrig noch hút tages reht zinser sint, also daz sú die selben minú reht, die mich an geuallen vnd an erstorben sint von dez obgenanten Johansen sa^elgen todes wegen, von miner gâbe, die ich in daran tůn vnd getan han, an miner stat vnd von minen wegen sont innemen vnd haben gantzlich vnd gar, Vnd darumb so han ich mich willeklich verzigen vnd verzieh mich mit disem brieue gantzlich vnd gar gen den vorgedahten vro^vwen der . . abtissennen vnd dem conuent gemainlich dez vorgeschribenen closters ze Veltbach gen allen iren nâchkomen aller der reht vordrung vnd ansprachen gaistlichs vnd weltlichs gerihtes, so ich an den zv^o den ald von der vorgeschribenen miner reht wegen, die mich von dez obgenanten Johansen sa^elgen todes wegen an geuallen vnd an erstorben sint, hatt ald hie nach iemer gehaben oder gewinnen mo^eht. Vnd ze vrkúnd der warhait aller diser vorgeschribenen dinge vnd vergiht so han ich Cůnrat von Sto^effeln custer da vorgenemt min insigel gehenkt an disen brief. Der geben ist ze sant Gallen an dem na^ehsten zinstag nach aller hailigen tag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem fúnften jâre.

Source Fulltext: Chartularium Sangallense VIII, Nr. 5002, S. 189-190.