Wir Geori von gottes gnâden abt des gotzhus ze sant Gallen¹, das ân alles mittel zůgeho^ert dem stůl ze Ro^vm, veriehen vnd tu^en kunt mit disem brief allen, die in ansehent lesent oder ho^erent lesen, daz fúr || v´ns kam der edel herr Walther von der Alten Klingen² in Thurgo^e frie vnd ritter mit v´nserm vnd v´nsers gotzhus lieben getrúwen dienstman Hermann von Landenberg, den man nemmet von Wêrdegge³, vnd offenot da der selb || herr Walther von Klingen offenlich vor v´ns vnd sprach, das die widem gelegen ze Gozzo^vw⁴ vff dem berg bi der kilchen bi Gru^eningen⁵ mit dem kilchensatz der kilchen ze Gozzo^v, der von alter in die selben widem geho^eret vnd och || hinnenhin ho^eren sol, sin reht lehen wa^er von v´ns vnd v´nserm gotzhus, vnd hab och von siner redlichen not wegen vnd durch nútz sin selbes vnd och siner erben die vorgeschriben widem ze Gozzo^v mit dem kilchensatz der kilchen ze Gozzo^v mit andern widmen, die och darzů geho^erent, mit zehenden mit zinsen mit wingarten mit akkern mit wisan mit holtz mit veld mit wasen mit zwi mit wegen mit stegen mit wasser mit wasser flússen mit allen rehten nútzen vnd gewonhaiten vnd mit allem dem, so von reht vnd von gewonhait darzů vnd darin geho^ert, es sie benemt oder vnbenemt wissentz oder vnwissentz gesůchtz oder vngesůchtz, es sie funden oder es werd hernach funden, dem vorgenemten Hermann von Landenberg von Wa^erdegge vnd sinen erben mit gůter vorbetrahtung vnd nâh wisem rât aines rehten redlichen koffes ze koffenn geben vmb nún hundert guldin gůter an dem gold vnd swa^erer an der gewiht, vnd sie och der selben guldin nâh siner vergiht gantzlich vnd gar von im gewert an den stetten, da er sinen wachsenden schaden mit verkomen hât, vnd gab och do ze stet der vorgenemt her Walther von Klingen die vorgeschriben widem mit dem kilchensatz ze Gozzo^v mit allen rehten nútzen vnd gewonhaiten vnd mit aller zůgeho^erd, als vor geschriben stat, mit wolbedahtem můt vnd mit gůter beschaidenhait frilich vnd letklich vf an v´nser hand vnd batte, v´ns die selben widem mit dem kilchensatz ze Gozzo^v dem vorgenemten Herman von Landenberg lihen, do erhorten wir sin emsigen ba^et vnd haben die vorgeschriben widem ze Gozzo^v mit dem kilchensatz ze Gozzo^v, der darin geho^eret, mit allen rehten nútzen vnd gewonhaiten vnd mit allem dem, so von reht vnd von gewonhait darzů vnd darin geho^eret, als vorgeschriben stat, dem vorgenemten Hermann von Landenberg, den man nemmet von Wa^erdegge, reht vnd redlich verlihen vnd lihen im mit disem gegenw´rtigen brief ze rehtem lehen. Der vorgenemt herr Walther von Klingen hât och fúr sich vnd fúr sin erben gesworn ainen gelerten aid ze den hailigen mit vfgehepter hand, der vorgeschriben widem vnd des kilchensatz ze Gozzo^v vnd alles des, so darzů vnd darin geho^eret, wer ze sinne nâh reht gen ma^englichem, vnd bescha^eh, daz den vorgenemten Hermann von Landenberg sin erben ald nâhkomen die vorgeschriben widem ald den kilchensatz ieman gantzlich oder an dehainem tail anspra^ech nu oder hernâch mit gaistlichem oder mit weltlichem geriht, daz sú der vorgenemt herr Walther von Klingen vnd sin erben darumb sont verstân vnd versprechen gen ma^englichem ân fúrzug vnd widerred vnd ân allen iren schaden. Bescha^ech aber, daz sú der ansprach ze dehainem schaden ka^emin, von dem schaden sol der vorgenemt herr Walther von Klingen ald sin erben sú gantzlich lo^esen bi dem aid, so er gesworn hât. Der vorgenemt herr Walther von Klingen hât och den vorgenemten Herman von Landenberg gesetzet vnd setzet in mit disem brief in liplich vnd nutzlich gewer der vorgeschriben widem vnd des kilchensatzes ze Gozzo^v vnd aller der rechtung, so darzů vnd darin geho^erent. Darzů vnd darúber hât sich och der vorgenemt herr Walther von Klingen fúr sich selber fúr alle sin erben vnd nâhkomen offenlich vor v´ns willeklich verzigen vnd verzihet sich mit disem brief gen dem vorgenemten Hermann von Landenberg gen allen sinen erben vnd nahkomen aller aigenschaft aller lehenschaft aller manschaft aller gewer aller besatzung aller kuntschaft aller zúgnúst lút vnd brief alles rehten gaistlichs vnd weltlichs gerihtes aller vordrung vnd ansprach, so er von reht oder von gewonhait oder von dehainen andern sachen zů der vnd an der vorgeschriben widem vnd kilchensatz vntz her ie gehept hât oder er alder sin erben alder nâhkomen hinnenhin daran ald darzů iemer gewinnen oder erwerben mo^ehtin von ba^ebsten von bischoffen von kaissern von kúngen oder von den, die vnder inen sint. Bescha^ech aber, daz der vorgenemt herr Walther von Klingen sin erben alder nâhkomen oder ieman andrer von iro wegen oder an iro stat den vorgenemten Hermann von Landenberg sin erben ald nâhkomen von der vorgeschriben widem vnd kilchensatzes wegen anspra^echin mit dehainen gaistlichen alder weltlichen gerihten, daz vftriben vnd die ansprach sol vnkreftig sin vnd dem vorgenemten Hermann von Landenberg sinen erben vnd nâhkomen vnscha^edlich. Vnd ze offenem waren vrkûnd vnd sta^eten sicherhait aller diser vorgeschriben ding henken wir abt Geori da vorgenemt v´nser insigel an disen brief. Darnach vergich ich Walther von der Alten Klingen gelegen in Thurgo^e frie vnd ritter da vorgenemt ain gantz sicher warhait aller diser vorgeschriben ding vnd geding, vnd daz alles daz war ist, daz der erwirdig min gena^ediger herre abt Geori da vorgenemt von mir veriehen hât an disem brief, vnd ze merer sicherhait der selben ding vnd geding henk ich och min insigel an disen brief. Der geben ist ze sant Gallen in der stat in dem iar, do man zalt von gottes gebúrt drúzehenhundert jar, sehzig iar vnd darnâch in dem sehsten jare, an der na^ehsten mitwochen vor v´nser frowen tag ze dem ernde.

Source Fulltext: Chartularium Sangallense VIII, Nr. 5018, S. 207-209.