Allen^a) den, die disen brief ansehent lesent oder ho^erent lesen, kúnd ich Johans von Stainach¹ statamman ze sant Gallen || vnd vergich offenlich mit disem brieue, daz fúr mich kament ze sant Gallen an dem na^ehsten ma^entag nach sant Valentis || tag, do ich an dez riches strâsse offenlich ze geriht saz, die êrbern vnd wolbeschaidnen Margaretha vnd Lucya Rů||dolf Spisers dez eltern êlichen tohtren vnd offenoten da mit fúrsprechen offenlich vor mir vnd dem geriht vnd sprâchent vmb daz gůt gelegen ze Obrawîlle an dem Honuirst, daz dez obgenanten Růdolfs dez Spisers iro vatters wîlunt reht ledig aigen wa^er, vnd die vogtye v´ber daz selb gůt ze Obrawîlle, daz selb gůt vnd die vogtye der selb Růdolf iro vatter mit allen rehten nútzzen vnd gewonhaiten vnd mit aller zv^o geho^erde redlich vnd reht verko^vft vnd ze ko^vffenn geben hett dem beschaidenn manne Jacob Růpreht Albreht Vo^elis tohterman burger ze sant Gallen vmb drissig phunt vnd vmb aht phunt phenning gůter vnd gena^emer Costentzzer múnse, alz der brief² wol bewîset, den er darumb von dem obgenanten irem vatter hât, daz der selb ko^vff mit iro baider gůtem willen gunst vnd verhengde beschehen vnd vollefu^ert wa^er, vnd wo^eltint sich o^vch baid willeklich verzihen gantzlich vnd gar aller der reht vordrung vnd ansprâchen gaistlichs vnd weltlichs gerihtes, so sú vnd iro erben, ob sú enwa^erint, an dem vnd zv^o dem vorgeschribenen gůt vnd vogtye ze Obrawîlle hattent ald hie nâch iemer gehaben oder gewinnen mo^ehtint, vnd bâtent mich mit irem fúrsprechen eruarn an ainer vrtail, wie sú daz tůn so^eltint vnd mo^ehtint, alz reht wa^er vnd daz ez kraft hett vnd haben mo^eht nv^ vnd o^vch hie nach. Daz tet ich, vnd ward ertailt mit gemainer vrtail, daz sú ainen vogt nemen so^eltint an dem ring, wen sú wo^eltint, vnd daz dann mit iro vnd mit dez selben iro vogtes handen vnd o^vch mit miner hant tůn so^eltint vnd daz ez dann also wol kraft vnd maht hetti nâch dem rehten. Do nament sú ze vogt Bilgrin Spiser iren vettern wîlunt burgermaister ze sant Gallen, vnd verzigent sich o^vch do die vorgenemten Margaretha vnd Lucya Růdolfs dez Spisers êlichen tohtren offenlich vor mir vnd dem geriht willeklich vnd gern gantzlich vnd gar mit iro vnd mit dez obgenanten Bilgris iro vettern vnd iro vogtes handen vnd o^vch mit miner hant vnd verzihent sich mit disem brieue fúr sich vnd alle iro erben gen dem obgenanten Jacob Růpreht gen allen sinen erben vnd nâchkomen dez vorgeschribenen gůtes ze Obrawîlle vnd der vogtye dez selben gůtes mit aller zv^o geho^erde aller aigenschaft aller manschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so sú oder iro erben an dem zv^o dem vnd von dez vorgeschribenen gůtes vnd vogtye wegen ze Obrawille ie gehattent ald noch hinnenhin iemer gehaben oder gewinnen mo^ehtint, vnd daz sú noch enkain iro erben noch nieman andre von iro wegen noch an iro stat den vorgenemten Jacob Růpreht noch dehain sin erben noch nachkomen von dez vorgeschribenen gůtes noch vogtye wegen niemer mê súllent noch wellent ansprechen v^f triben bekúmberren bekrenken noch in kain wîs beswa^eren weder mit reht noch ân reht noch mit enkainerlay ander sach. Die vorgenemten Margaretha vnd Lucya lobtent o^vch da mit dez obgenanten iro vogtes willen ietwedri besunder mit ir trúwe, dez vorgeschribenen gůtes vnd vogtye ze Obrawîlle vnd o^vch dez ko^vffes wern ze sinne nâch reht vnd o^vch den vorgenemten Jacob Růpreht vnd sin erben darumb ze versprechenn vnd ze versta^enne an allen stetten gen allerma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent, vnd wenn Růdolf Spiser iro brůder ze land kumpt, daz sú dann fu^egen vnd schaffen sont, daz er sich der vorgeschribenen gu^eter vnd vogtye o^vch verzich gen dem obgenanten Jacob Růpreht vnd gen sinen erben, ob er enwa^er, alz dann reht ist vnd sú sin nôtdurftig sint. Vnd ze vrkúnd der wârhait aller der vorgeschribenen dinge vnd vergiht so han ich Johans von Stainach amman da vorgenemt von dez gerihtes wegen min insigel gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Darnâch veriehent wir die vorgenemten Margaretha vnd Lucya die Spiserina geswo^estren vnd Bilgri Spiser iro vogt in der vorgeschribenen sache ainer gantzzer wârhait aller der dinge vnd gedinge, so von v´ns an disem brief da vorgeschriben stânt, vnd ze mêrer sicherhait der selben dinge so han ich Bilgri Spiser vogt da vorgenemt min insigel gehenkt an disen brief, vnder dez selben v´nsers vettern vnd v´nsers vogtes insigel wir die vorgenemten Margaretha vnd Lucya die Spiserina geswo^estran v´ns willeklich gebunden habent, won wir aigener insigel niht habent, wâr vnd sta^et ze lassenn alles daz von v´ns da vorgeschriben stât an disem brief. Der geben ist ze sant Gallen an dem vorgeschribenen ma^entag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem sehsten jâre.

Source Fulltext: Chartularium Sangallense VIII, Nr. 5013, S. 203-204.