Wir Eberhart von gottes gnaden abt des gotzhus in der Richen O^vw¹, das ân alles mittel dem Ro^emschen stůl || zůgeho^ert, sant Benedicten ordens gelegen in Costentzer bistům tůnd kunt vnd veriehin offenlich mit disem brief allen || den, die in ansehent oder ho^erent lesen, daz fúr v´ns kam vff disen húttigen tag, als diser brief geben ist, der bescheiden || man Peter von Dienberg² vnd offnot vor v´ns, daz er von v´ns vnd v´nserm gotzhus in der Richen O^vw ze rehtem lehen vntzher braht vnd gehept hett den hof ze Chelan³ gelegen zwúschent Bůch⁴ vnd Neftenbach⁵ den do^erfern mit allen sinen rehten nútzen vnd zůgeho^erden, der selb hof von v´ns vnd v´nserm vorgenanten gotzhus reht lehen gewesen ist vntz vff disen húttigen tag, vnd daz er sine elichen husfro^vwen fro^v Agnesen von Luterberg⁶ vormals darvf gewîset hett fúr ir heinstúr. Darnach offnot ouch der selb Peter von Dienberg, daz er mit gůter vorbetrahtung frilich vnd willeklich mit willen vnd gunst der vorgenanten siner elichen husfro^vwen vnd ir vogts Jacobs von Luterberg⁷ dem erbern geistlichen herren brůder Heinrichen von O^esterrich prior vnd sinen mitbrůdern allen gemeinlich des gotzhus ze v´nserr fro^vwen cell im Berraberg⁸ gelegen in Costentzer bistům sant Augustini ordens nach ordenung solicher korherren, die dv´ regel hant, ze kouffent geben hett redlich vnd reht einss ewigen ko^vffes⁹ den obgenanten hof ze Chelan mitt allen nútzen vnd rehten vnd mit aller zůgeho^erd. Nach disen vorgeschribenen offnungen gab v´ns der obgenant Peter von Dienberg den vorbenempten hof an sin selbs vnd an der vorgenanten siner elichen husfro^vwen statt vf an v´nser hand vnd verzeh sich daran aller vordrung vnd ansprach vnd alles des rehten, so er ald sin husfro^vw daran hatten ald ie gewunnen ald hernach iemer gewinnen mo^ehtin, vnd volfůrten ouch das selb vfgeben vnd verzihen mit aller der ordenung vnd krafft worten vnd werken, so darzů horten oder ho^eren solten nach gewonheit vnd nach reht. Darnach batt v´ns der vorgenant Peter von Dienberg, wan die obgenanten brůder Heinrich prior vnd sin mitbrůder nút lehen hettin noch han so^eltin, daz wir inen denn daz obgenant gůt den hof ze Chelan machotin vnd lihin von v´nseren gnaden ze einem rehten zinseigen. Die be^att habin wir erho^ert willeklich vnd gern luterlich durch gott vnd o^vch darvmb, das die vorbenempten herren der prior vnd sin mitbrůder vnd ir nahkomen dester bas in so^elichem geistlichen schin vnd sa^elgem leben bestân vnd ir notpfrůnd haben mugen vnd gott gedienen, vnd habin mit rate vnd ouch mit gemeinem vnd gůtem willen vnd gunst v´nsers conuentes gemeinlich des vorgenanten v´nsers gotzhus den selben geistlichen herren brůder Heinrichen von O^esterrich prior vnd den brůdern allen gemeinlich des gotzhus ze v´nserr fro^vwen cell im Berraberg vnd allen iren nahkomenn vnd dem selben iro gotzhus den vorgenanten hof ze Chelan gemachot ze einem rehten zinseigen, vnd habin inen den selben hof gelihen vmb einen sta^eten ewigen zins ein halb pfund wachs, also daz si vnd alle ir nahkomen den vorgenanten hof ze Chelan ân alles emphâhen sont han vnd niessen, geru^ewklich vnd fridlich ze einem rehten zinseigen vnd daz si v´ns vnd allen v´nsren nachkomen einem ieglichen . . abt in der Richen O^vw ja^erlich ze sant Martins tag von dem selben zinseigen ân alle widerred rihten geben vnd antwúrten sont ein halb pfund gůtz wachs. Vnd darvmb so habin wir v´ns gen den selben herren dem prior vnd den brůdern allen gemeinlich vnd gen ir nahkomen verzigen vnd verzihen vns fúr v´ns vnd v´nser nahkomen mit disem brief aller ansprach alles vszugs vnd alles rehten geistlichs vnd weltlichs gerihtz vnd aller anderr vszúg vnd fúnd, wie die genant sint, damit wir sv´ an den rehten, so wir inen mit disem brief gegeben habin, als vor ist bescheiden, bekrenken ald beswa^eren mo^ehtin dheinen weg ald mit dheiner slaht sach ân geua^erd. Vnd ist ouch dis alles beschehen vnd vollfu^ert mit allen den worten vnd werken, so darzů horten oder notdurftig waren nach gewonheit vnd nach reht. Vnd des alles ze warem vnd sta^etem vrkúnd habin wir vorbenempter abt Eberh. v´nser insigel gehenket an disen brief. Vnd wir der conuent aller gemeinlich des selben gotzhus in der Richen O^vw, wan dis alles mit v´nserm gůten willen vnd gunst beschehen vnd vollfu^ert ist, darvmb so habin ouch wir v´nsers conuentes insigel zů des selben v´nsers herren des abtes insigel gehenket an disen brief. Der ist geben in der Richen O^vw, do man zalt von Cristes gebúrt drúzehenhundert vnd sehzig jar, darnach in dem sehsten jar, an sant Hylarien tag.

Source Fulltext: Chartularium Sangallense VIII, Nr. 5007, S. 194-195.