Allen denen, die disen brief ansechent lesend oder hören lesen, künd ich Johans von Stainach stattaman zů sant Gallen¹ vnd vergich offenntlich mit disem brief, das für mich kament zů sant Gallen an dem nechsten frytag vor sant Lorentzen tag, da ich offentlich zů gricht sas, dis nachgenenten erbaren lüth Růdolff Behaim burger zů sant Gallen vnd Cathrina sin eliche wirtin, vnd verjachend offentlich vor mir vnd dem gricht für sich selber vnd für all iri erben vnd nachkomen vmb die gnad, die inen der erwürdig min gnediger her abt Geori abt des gotzhus zů sant Gallen² gethon het an dem, das er inen von gnaden vnd nit von dehains rechten wegen erloupt vnd sinen willen vnd gunst dartzů geben, das sy an dem hus glegen ze sant Gallen an Spisergassen³, das ainthalb stost an des Nidren Müllers hus vnd anderthalb an Johansen des Bisers hus, das iro lechen were von dem obgenanten minem gnedigen herren abt Georien vnd dem vorgeschribnen gotzhus zů sant Gallen, hinden gegen des obgenanten mines herren bomgarten, an dem selben hus ainen gang machen vnd vschiessen^a) soltind, der on alle geuerd fünff schůch brait were, das er inen dieselben gnad gethon het mit söllicher beschaidenhait vnd in dem rechten, das sy denselben gang vnd fürschutz von siner gnade, die er inen daran gethon het, haben vnd niesen söltind, alle diewyl sy baide leben oder ains vnder inen. Vnd wenn sy dann baide absterbent vnd ensint von todes wegen, wann er danne der obgenant min her abt Geori oder sin nachkomen, ob er enwär, fürbas nit enbern wellent, das dann iri erben vnd nachkomen, in deren hend denne das vorgeschriben hus wäri, denselben gang vnd fürschutz one vertzug vnd one alle widerred abbrechen sond vnd dartzů dehaines rechtens fürbas sprechen. Beschech ouch, das sy dasselb hus by irem leben jemant zů kouffen gebint, wer die werint, es sigen frowen oder man, dieselben söllen ouch dannethin den vorgeschribnen gang noch fürschutz nit fürbas haben noch niesen dann mit des obgenanten mins hern abt Georien willen vnd gunst oder siner nachkomen, ob er enwer. Vnd zů ainem waren vrkund vnd gantzer sicherhait aller obgeschribner ding vnd vergicht so han ich Johans von Stainach aman davor genempt von ernstlicher pitt der vorgenenten Růdolffs des Behaims vnd Catrinen siner elichen wirtinen vnd ouch von des grichtz wegen min insigel gehenckt an disen brief, wann es ouch mit gemainer vrtail ertailt ward, das ich es thůn solt. Dis beschach vnd ward diser brief geben zů sant Gallen an dem vorgeschribnen frytag in dem jar, do man zalt von gottes gepurt dryzechenthundert jar, sechtzig jar vnd darnach in dem sechsten jar.

Source Fulltext: Chartularium Sangallense VIII, Nr. 5036, S. 226.