Allen^a), die disen brief ansehent oder ho^erent lesen, kv´nde ich Berhtolt ze dem Tvrn vnd vergihe des offenlich mit disem brief, das ich minen^b) herren || Růdolfen von Roschah dem alten vnd Eglolfen¹ sinem brůder gesworn habe ainen gelerten ayde ze den hailgen, das ich niemer fluhsame werden sol || weder mit minem libe noch mit minem gůt, ich sol och niena burger werder^c) weder ze Lindowe² noch ze Bregentz³ noch in kainer des riches statt || noch in kainen andren stetten, wa si gelegen sint ald wie si genant sint, âne alle geva^erde. Wa^er aber, das ich minen aide v´ber fu^ere vnd dú vorgenanten stuki nit sta^et welt lâssen, als ich gesworn han, so sol ich der egenant Berhtolt ze dem Tvrn den obgenanten minen herren verfallen sin zwaintzig pfvnt gůter pfenning Costentzer mv´nsse. Vnd hab inen dar vmb erlobt, alles min gůt ligendes vnd varendes ze nement, vntz das si der selben zwaintzig pfvnt pfenning gar gewert werdent. Vnd ze merer sicherhait hab ich den selben minen herren ze búrgen geben Aigelwarten den amman von Roschah vmb zwai pfvnt pfenning, Růdolfen von Dablat⁴, dem man sprichet Zerahoch, vmb drú pfvnt pfenning, Johansen Mangolt vmb zwai pfvnt pfenning, Berhtolten den Broger vmb zwai pfvnt pfenning, Cůnraten Aigelwart vmb zwai pfvnt pfenning, Cv^onraten Halmho^ew vmb zwai pfvnt pfenning, Hainrichen den Werler vmb zwai pfvnt pfenning, Růdolfen hinderm Stadel vmb ain pfvnt pfenning, Berhtolten Spa^eten vmb ain pfvnt pfenning, Cv^onraten Kra^essen vmb ain pfvnt pfenning, Růdolfen ab Egg⁵ vmb ain pfvnt pfenning, Hainrichen den Múller, dem man sprichet der Mu^ege, och vmb ain pfvnt pfenning. Die selben búrgen hant den vorgenanten minen herren von Roschach gelobt ieglicher mit siner trúwe, pfant ald pfenning ze gebent, die man getriben vnd getragen mag, vntz si der vorgenanten zwaintzig pfvnt pfenning gar gewert werdent, wenne die selben búrgen von inen oder von iren botten dar v´ber gemant werdent ze hus ze hof ald vnder o^vgen, wa^er das ich selbe die vorgenanten zwaintzig pfvnt pfenning nit rihti, ob es ze schulden ka^eme, als vor ist beschaiden. Wa^er aber, das die vorgenanten búrgen nit geben weltint noch ga^ebint den obgenanten von Roschach pfenning ald pfant, so sont die selben von Roschach vollen gewalt han, die vorgenanten búrgen an ze griffent ze pfendent vnd ze no^etent, wa vnd wie si mugent, es si mit geriht ald ân geriht, als lang vnd als verre, vntz das si der vorgenanten zwaintzig pfvnt pfenning gar gewert werdent. Die vorgenanten von Roschach gebrůder sont och mit namen den gewalt haben, das si die pfender verrehten versetzen vnd verko^effen mugent ze sant Gallen ze Arbon⁶ ald ze Rinegg⁷, ob si went. Es ist och bedingot, wele der vorgenanten búrgen so vil pfenning git vnd ab rihtet, dar vmb er búrg ist, als vor ist beschaiden, das der dannenhin mit der gúlt, die den vorgenanten von Roschach dannoht vss gestât an den vorgenanten zwaintzig pfvnt pfenningen, nit me ze schaffen haben sol in kaine wise, vnd sol och der selb von diser búrgschaft ledig vnd los da mit sin. Ich der vorgenant Berhtolt ze dem Tvrn hab gesworen^d) fúr mich vnd fúr min erben gelobt, die vorgenanten búrgen vnd ir erben ze lo^esent âne allen iren schaden, wie si von diser burgschaft wegen ze schaden koment. Ich vergihe och, das ich den vorgenanten minen herren von Roschach geben han das núwe hus, das vff dem gůt stât, das zů der staingrůbe ho^eret, fúr zwaintzig pfvnt pfenning, vnd wa^er, das inen dar an v´t ab gieng, das sol ich inen ervollen, vntz das si der selben zwaintzig pfvnt pfenning gar gewert werdent. Vnd ze offem vrkv´nde der warhait aller diser dinge gib ich der vorgenant Berhtolt ze dem Tvrn min insigel an disen brief. Dar nach veriehen wir die vorgenanten Aigelwart der amman ze Roschach vnd die búrgen ainer gantzer warhait aller diser vorgeschribner dinge, vnd des ze vrkv´nde gib ich der selbe amman Aigelwart min insigel an disen brief, vnder das selbe insigel wir die vorgenanten búrgen alle, won wir aigner insigel nit enhabent, v´ns bindent sta^et ze habent vnd ze laistent alles des, so hie vor von v´ns geschriben stât an disem brief. Der ist ze Roschach geben, do man von Cristes gebúrte zalt drúzehenhvndert jar, dar nach in dem sehs vnd sehtzigosten jar, an sant V^olrichs abent des hailgen bischofs.

Source Fulltext: Chartularium Sangallense VIII, Nr. 5031, S. 221-222.