Wir Karl von gots gnaden Romischer keyser tzu allen tzeiten merer des richs vnd kung || tzů Beheim embieten dem burgermeister dem rat vnd den burgern gemeynlich der stad || tzů sant Gallen vnsern vnd des heilgin richs lieben getrewen vnser hulde vnd alles gut. || Lieben getrewen, wan wir mit rat der fursten grafen vnd herren des heilgin richs mit wolbedachtem mute vnd mit rechter wizsen den hochgeborn Wentzela hertzogin tzů Lutzemburg tzů Brabant vnd tzu Lymburg² vnsern lieben brudir vnsern vnd des heilgen reichs gemeynen vicarien gemacht haben in Deutzschen landen vnd in allen andern landen vnd creizsen, die disseit des Lampartisschen gebirgis³ gelegin sind, vnd haben yme gantz macht gegeben tze tun vnd tze schicken alles, daz wir selbir getůn mochten, als in vnsern briefen sulche vnser meynung volkumelicher vnd gentzlicher begriffen ist, da von gebieten wir ewern trewen ernstlichen vnd vesteclichen bey vnsern vnd des richs hulden vnd manen euch der eyde vnd der gesworn trewe, do mit ir vns vnd dem heilgin reiche verbunden seit, das ir dem egenanten vnserm lieben brudir vnd vicarien oder wem er daz mit seynen briefen kuntlichen emphilhet, mit allir ewer macht nútzen gulten herscheften dinsten vnd allen andern sachen, die vns vnd daz reiche angehoren, wie man die mit sunderlichen worten genemnen mag, gehorsam vndertenig vnd wartende seit glicher weiz als vns selbir, an alle widderred vnd an alles widersprechen. Geben tzů Nuremberg vndir vnser keiserlichen maiestat ingesigel an der heilgin tzwolffboten abend Symonis vnd Jude, vnser reiche in dem eyn vnd tzwentzigisten vnd des keisertums in dem zwelfften jare.

Source Fulltext: Chartularium Sangallense VIII, Nr. 5044, S. 233.