Allen^a) den, die disen brief ansehent oder ho^erent lesen, kúnde ich Johans von Langenhart vogt ze Rapreswile¹ vnd ver||gich offenlich an disem brieue vmb die sto^esse vnd missehellung, so die lantlúte ze Einsidellen² ze einem teil mit den || erberen lúten vss der Nidren Mârch³ ze dem andern teil gehept hant von des vnderganges wegen vff Egg⁴, der selben || sto^esse sú ze beiden sîten gar vnd gantzlich vff mich komen sint, vnd hant o^vch ze beiden sîten bi gůten trúwen gelo^vpt sta^et ze habenne, wes ich mich nâch beider teile kuntschaft red vnd widerred von des selben vndergangs wegen erkenne vnd v^ssprich. Sol man wisson, daz ich beider teile kuntschaft red vnd widerred vnd wes iêderman geniessen moht von des selben vnderganges wegen verho^ert han, sag vnd sprich v^s also, waz vff der Egg hin von sant Mainratz kylchen⁵ vntz an die Krinegg⁶ vnd dannanhin obrenthalb von sant Mâinratz kylchen, als vêrre die Egg langot, haldet in hin werd gen Einsidellen, daz sol o^vch in hin werd gen Einsidellen stúren vnd dienon, vnd súllent die vorgenanten erber lút vss der Nidren Mârch da mit nit ze schaffenn han. Was aber der gu^eter ist, dú vormâls her v^s gedienot hant vnd haldent gegen den ho^euen ze Pha^effikon⁷, ze Wolro^vw⁸ vnd ze Ba^echi⁹, von sant Mainrâtz kylchen vntz an die Krinegg, vnd dannanhin obrenthalb von sant Mainrâtz kylchen, als vêrre dú Egg langot, dú súllent o^vch her v^s in die vorgenanten ho^ef in der Nidren March stúren vnd dienon âne geuerde. Vnd sol einwedra teil den andern an sinen gu^etern, die im v^sgesprochen sint, als vor ist beschaiden, fúrbas nit sûmen noch irren mit keinen sachen âne geuerde. Vnd des ze einem wâren vrkúnd so han ich der obgenant Johans von Langenhart min êigen insigel offenlich gehenkt an disen brief ze einer bezúgnúste aller vorgeschribenen dingen. Der geben ist ze Rapreswile an dem na^ehsten do^vnstag nâch sant Gallen tag im dem jâr, do man zalt von Cristus gebúrt drútzehenhundert vnd sêchtzig iâr vnd darnach in dem sibenden jâre.

Source Fulltext: Chartularium Sangallense VIII, Nr. 5097, S. 274-275.