Ich^a) Johans von Langenhart vogt ze Rapreswil¹ miner gena^ediger herren von O^esterrich tůnt mit || Wernher Wind(er)ger^b) vnd V^olrich Frigen allen den, die disen brief an sechent oder ho^erent lesen, ze || wissen, dc fúr v´ns kamen mit klag die erberen geistlichen frowen swester Fren abtischin des || closters ze Wrmspach² mit andren frowen vs ir convent vnd an dem andern teil V^olrich Strúbi von Wagen³ mit sinen súnen vnd klagten beit teil v´ns vonn ein andern, si heten enander gescagtet an holz vnd an velt, des scaden vnd aller sto^esen si v´ns getrv´wten willeklich wol bedacht vnd lopten v´ns sta^et ze haben, wes wir v´ns erkandin vmb ir beider sto^es. Do erkanden wir v´ns nach beider teilen ansprach vnd wider red, dz V^olrich Strúbi vnd sinú kint vnd ingowmen an den egenanten geistlich fro^vwen an ir holz vnd ir velt fast het v´ber grifen vnd misse tan, vmb dz sprachen wir beiden teilen vs, dz scad gen scaden wer quid vnd ein ganzer sůn. Wer o^vch, dv die obgenanten fro^vwen oder ir gesint dem obgenanten Strúbin oder sinen kind scaden ta^eten an holz oder an velt, den son si im aleklich ab legen nach v´nser erkantnust oder ander drigen v´nsers rates, ob wir nit enwerin. Wer o^och, dc der obgenant Strúbi oder sinú kint oder ingo^vmen den obgenanten fro^vwen an holz an velt ir klosters misse ta^et vnd scaden brecht, den son si dem kloster genzlich ab legen vnd besren, als sich^c) zwen erber man darum erkennt, den ze gelo^vben ist, vnd sind vmb den scaden vnd v´ber grif v´nser gena^edigen herschaft von O^esterrich gefalen ze bůs fúnf phunt phening Zúricher munz. Vnd dis alles sta^et vnd fest belibe, so gib der obgenant Iohans von Langenhart vnd Wernher Windiger burger ze Rapreswil den ob genanten fro^vwen vnd ir convent disen brief besigelt mit v´nsern eigen ingesigeln. Ich der obgenant Frig burger ze Rapreswil bind mich willeklich vnder disú^d) bedú ingesigel gehenket an disen brief. Der geben wart des iars, do man zalt von Cristes geburt drúzehen^e) hundert iar, dar nach in dem achteten vnd sechzesten iar, an sant V^olrichs des biscofs tag vor vil erberen lúten.

Source Fulltext: Chartularium Sangallense VIII, Nr. 5137, S. 308-309.