Allen^a) den, die disen brief ansehent, lesent oder ho^erent lesen, kúnd ich Johans von Gêrswendi burger ze Costentz vnd vergich offenlich mit disem brieue fúr mich, || fúr dú nâchgenemten kint Hainrichen vnd fúr Angnesen, V^olrichs sa^elgen ab Kellerberg mines brůders êlichú kint, der rehter vogt ich bin, vnd fúr alle v´nser || erben, daz ich mit gůter vorbetrahtung vnd mit rât der vorgenemten kint na^ehsten vatter vnd můter magen vnd o^vch von der selben kind redlicher nôt we||gen disú nâchgeschribenen gu^eter, den wingarten, den man nemmet der Hu^enlisbach, gelegen an dem Kobel bi Bernang in dem Rintal, der ainhalb stôsset an Hainrich Tegans wingarten, mit hûs mit hof mit stadel mit torggel mit akkern mit bo^vmen mit wasen mit zwi mit holtz mit veld vnd mit aller zv^o geho^erde, den wingarten dar ob gelegen, den man nemmet der Grass, vnd den wingarten, den man nemmet dez Heldes wingart, der ainhalb stôsset an dez von Zwingenstain¹ wingarten vnd anderthalb an der von Swartzzach wingarten, mit dem akker, alz der zûn begriffen hât, mit grunt mit grât mit allen rehten nútzzen vnd gewonhaiten vnd mit allem dem, so von reht ald von gewonhait darzv^o vnd darin geho^ert, ez sie genemptz oder vngenemptz, gesůchtz oder vngesůchtz, wissentz oder vnwissentz, an der vorgenemten kind stat vnd von iro wegen redlich vnd reht verko^vft vnd ze ko^vffenn geben han dem êrbern vnd wolbeschaidenn Hainricen Garnleder dem schriber burger ze sant Gallen vnd sinen erben, ob er enwa^er, vmb sehszig phunt phenning gůter vnd gena^emer Costentzzer múnse, der ich gantzlich von im gewert bin vnd enphangen han vnd an der vorgenemten kind offenn nutz bewendet an den stetten, da ich iren grôssen wahsenden schaden mit verkomen han, die selben vorgeschribenen wingarten hus hof stadel torggel holtz vnd veld mit allen rehten vnd mit aller zv^o geho^erde der vorgenemten kind lehen wârent von dem êrwirdigen gotzhus ze sant Gallen, dannen ich im o^vch die selben wingarten mit hus mit hof mit stadel mit torggel mit akkern mit bo^vmen mit wasen mit zwi mit holtz mit veld mit allen rehten nútzzen vnd gewonhaiten vnd mit aller zv^o geho^erde an der vorgenemten kind stat vnd von iro wegen redlich vnd reht geuertgot vnd zv^o sinen handen brâht han, alz reht sitte vnd gewonlich waz vnd alz ez kraft vnd maht sol vnd mag han, Vnd darumb so han ich mich an der vorgenemten kind stat willeklich verzigen vnd verzieh mich mit disem brieue gantzlich vnd gar fúr mich fúr dú vorgenemten kint vnd fúr alle v´nser erben der vorgeschribenen wingarten hus hofes stadels torggels akker bo^vm wasen zwi holtz vnd veldes mit aller zv^o geho^erde aller aigenschaft aller manschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprâchen aller reht vnd rehtung, so ich vnd dú vorgenemten kint vnd v´nser erben, ob wir enwa^erint, an den zv^o den vnd von der vorgeschribenen wingarten hûs hofes stadels torggels akker bo^vm wasen zwi holtz ald veldes wegen ie gehept habent ald hie nâch iemer gehaben oder gewinnen mo^ehtint, vnd daz ich noch dú vorgenemten kint noch v´nser erben, ob wir enwa^erint, noch nieman andre von v´nsern wegen noch an v´nser stat den vorgenemten Hainricen Garnleder noch dehain sin erben noch nâchkomen von der vorgeschribenen wingarten hus hofes stadels torggels akker bo^vm wasen zwi holtz noch veldes wegen niemer súllent noch wellent ansprechenf v^f triben bekúmberren bekrenken noch in kain wîs beswa^eren weder mit gaistlichem noch mit weltlichem geriht noch ân reht noch mit enkainer lay ander sache, ân alle geua^erde. Ich der obgenant Johans von Gêrswendi han o^vch gelobt mit miner trúwe vnd loben mit disem brieue fúr mich vnd alle min erben, der vorgeschribenen wingarten hus hofes stadels torggels akker bo^vm wasen zwi holtz vnd veldes mit allen rehten vnd mit aller zv^o geho^erde reht wer ze sinne fúr dú vorgenemten kint vnd dez ko^vffes vnd o^vch den vorgenemten Hainricen Garnleder vnd sin erben darumb ze versprechenn vnd ze versta^enne an allen stetten gen den vorgenemten kinden vnd gen aller ma^englichem ân allen iren schaden, wenn wâ vnd wie dik sú darumb an gesprochen geschadgot oder v^f getriben werdent. Vnd wenn dú vorgenemten kint zv^o iren tagen koment, daz ich danne vnd min erben, ob ich enbin, an fúrzug vnd ân alle wider red fu^egen vnd schaffen sont, daz dú vorgenemten kint dem êgenemten Hainricen Garnleder vnd sinen erben, ob er enwa^er, die vorgeschribenen wingarten hv^s hof stadel torggel akker bo^vm mit wasen mit zwi mit holtz mit veld mit allen rehten vnd mit aller zv^o geho^erde, alz vorgeschriben stât, vertgen vnd zv^o iren handen bringent, alz dann reht ist vnd sú sin nôtdurftig sint. Ta^et ich oder min erben, ob ich enwa^er, daz niht, so hât der obgenant Hainrice Garnleder vnd sin erben, ob er enwa^er, vnd ir helffer, wer die sint, friges vrlob vnd vollen gewalt, darnâch, wenn sú wellent, mich vnd min erben, ob ich enbin, ze phendenn ze no^etenn ze heftenn vnd an ze griffenn an ligendem vnd an varendem gůt vff dem land vnd in den stetten mit gaistlichem vnd mit weltlichem geriht vnd ân geriht ân klag vnd ân zorn, wie vnd wâ sú daz getůn mugent, alz vil vnd alz dik, vntz daz in die selb vertgung gantzlich vollefu^ert vnd vsgeriht wirt, vnd o^vch alz vil vnd alz lang, vntz in der schad, in den sú vnd iro helffer von dez selben phendenns no^etenns heftenns vnd an griffenns wegen koment, gantzlich vnd gar ab gelait vnd vergolten wirt, vnd sol mich noch min erben hie vor noch hie wider niht schirmen noch gůt sin weder gaistlichs noch weltlichs geriht noch enkainer lay ander sach noch fúrzug. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nâch gewonhait vnd nach reht darzů gehortent ald ho^eren soltent vnd notdurftig wârent vnd alz ez kraft vnd maht sol vnd mag han. Vnd ze ainem wâren vrkúnde vnd gantzzer sicherhait aller der vorgeschribenen dinge vnd gedinge so han ich Johans von Gerswendi da vorgenemt fúr mich vnd fúr dú vorgenemten kint vnd fúr alle v´nser erben min insigel gehenkt an disen brief. Der geben ist ze sant Gallen an dem na^ehsten donstag vor sant Martis tag in dem jâr, do man zalt von gottes gebúrt drúzehenhundert jâr, sehszig jâr vnd darnâch in dem ahtoden jâre.

Source Fulltext: Chartularium Sangallense VIII, Nr. 5154, S. 323-324.