Allen den, die disen brief ansehent oder ho^erent lesen, kúnd ich brůder Fridrich von Zolr sant || Iohans ordens des heiligen spitals von Iherusalem comendúr des hus ze Bůbikon¹ vnd wir die || couentbrůder gemeinlich des selben huses, das wir einhelleklich wolbedacht vnd durch meren || nutz v´nsers vorgenanten huses ze Bůbikon v´ber ein komen sin mit den erwirdigen geistlichen herren dem abt vnd couent gemeinlich des klosters ze sant Iohan² in Turtal sant Benedicten odern^a) einer rechter genosami enzwischent Adelheiden Růdolfs seligen tochter von Diegispach³, die des egenanten hus ze Bůikon eigen ist, vnd Růdolfen Werder von Húnwile⁴, der des vorgenanten klosters ze sant Iohan in Turtal eigen ist, der egenanten Adelheiden elichen man, mit der geding vnd bescheidenheit, was kinden vnd wie fil kinden^b) die egenant Adelheid gewinnet bi dem vorgenanten Růdolf Werder, es sin tohtern oder knaben, das die alle gemein sun sin beyder klo^ester vnd húser an alles fúrziehen v´nser vnd v´nser nachkomen vnd an alles sumen vnd wider reden. Ich der vorgenant comendúr vnd o^vch die couentbrůder gemeinlich des egenanten huses ze Bůbikon loben o^vch, die vorgeschriben gemeinsami vnd genosami stet ze han nu vnd har nach, fúr v´ns vnd alle v´nser nachkomen. Vnd des ze einem waren vrkúnd vnd meren sicherheit so gib ich der vorgenant comendúr disen brief besigelt mit minem^c) vnd o^vch des egenanten hus ze Bůbikon eigen ingesigeln. Das beschach vnd wart o^vch diser brief geben, do man zalt von gottes gebúrt drúzehen hundert vnd sechzig iar, dar nach in dem núnden iare, an sant Gregoriien tag.

Source Fulltext: Chartularium Sangallense VIII, Nr. 5166, S. 334-335.