Allen den, die disen brieff ansehend oder ho^erend lesen, kúnd vnd vergih ich Eglolf von Emptz¹ ritter, daz ich fúr mich vnd min || erben minem lieben brůder Růdolfen von Emptz² ritter ze ainem rehten redlichem ko^vff ze ko^vffen gib vnd geben ha^vn || min tail des wingarten ze Haslach³, den ho^vff ze Husen⁴ hin der der Egg⁵, der mir ze tail wart von minem vatter sa^elgen, || ich im geben ha^vn mit allen nútzen vnd rehten mit wasen mit zwi mit allen rehten nútzen vnd rehten benemptz vnd vnbenemptz mit holtz mit velt mit steg mit weg mit allen den rehten, als ich es inne gehebt ha^vn vnd min vordem an mich braht hant, vmb siben vnd viertzig pfund pfenning genger vnd gůter Costentzer múns, der ich gar vnd ga^entzlich von im gewert bin vnd in min nútz bewent ha^vn, dar vmb so entzih ich mich fúr mich vnd min erben gen dem egeschriben minem brůder Růdolfen vnd gen sinen erben aller reht vnd ansprach aller gewer, so ich oder min erben an dem egeschriben wingarten ze Haslach vnd an dem egenanten ho^vff ze Husen hinder der Egg hatten oder jemer gewinnen mo^ehtint an gaistlichen vnd an weltlichen gerihten vnd an allen stetten a^vn geuerd. Ich vnd min erben, ob ich enwere, sont dis kofs reht weren sin nach dem rehten an gaistlichen vnd an weltlichen gerihten vnd si an allen stetten vertretten vnd versprechen a^vn iren schaden, ob inen dis gůt jendert anspra^echig wird an im gar oder an ainem tail. Dez ze vrkúnd gib ich Eglolf der ebenempt von Emptz dem ebenempten minem brůder Růdolfen von Emptz vnd sinen erben disen brief besigelt mit minem aigen insigel fúr mich vnd alle min erben. Der geben ist ze Emptz, do man zalt von Cristus gebúrt drúzehenhundert jar, sehtzig jar vnd da nah in dem núnden jar, an dem nehsten samstag nach v´nser frowen tag ze der liehtmisse.

Source Fulltext: Chartularium Sangallense VIII, Nr. 5162, S. 331-332.