Wir Geory von gottes gnaden abt des gotzhus ze sant Gallen¹ tůnt kvnt vnd vergehin des offenlich mit disem brief allen, die in ansehent || oder ho^erent lesen, das fúr v´ns kam v´nser lieber getrúwer Dietrich von Elnhofen², den man nempt Berli, vnd offnot vor v´ns, das er mit gůtem || willen vmbetwngenlich nach siner gůten frv´nd vnd ander erber lút rât fúr sich vnd sin erben sinem lieben tochterman Johansen von Scho^enôwe³ vnd || allen sinen erben ze koffent geben hett recht vnd redlich vnd ains rechten jemer werenden ewigen koffes dis hie nach geschriben ja^erlich gelt, das von v´ns vnd v´nserm gotzhus lehen ist, das ist vss dem kelnhof ze Hohenwiller⁴ sehs scho^effel haber, ain pfvnt Costentzer pfenning, ain swin ald aber siben schilling vnd vier pfenning Costentzer múnss da fúr, vss dem maygerhof ze Hohenwiller zwai malter habern, ain pfvnt Costentzer pfenning vnd zwai hu^enr ze weglo^esi, vnd ab des Gigers gůt hinder dem selben maygerhof sehtzehen schilling Costentzer pfenning geltes vnd swas zů dem selben ja^erlichen gelt geho^ert, als es an in komen vnd bracht ist vnd als er es gehebt vnd genossen hât her vntz an disen húttigen tag, als dirre brief geben ist, also vnd mit den selben rechten hât er dem selben Johansen von Scho^ennôwe das selb ja^erlich gelt geben vmb ahtzig pfvnt gůter pfenning Costentzer múnss, die er im zů siner tochter siner elichen frowen ze rechter hainstúr gelobt vnd verhaissen hett ze gebent, vnd ist och der selb Johans Scho^enôwe der selb ahtzig pfvnt Costentzer pfenning da mit ga^entzlich gewert, vnd gab och do der selb Dietrich von Elnhofen das obgenant ja^erlich gelt willeklich vff an v´nser hant vnd verzehe sich daran fúr sich vnd sin erben alles irs rechtz aller vordervng vnd ansprach vnd batt v´ns flehklich, das wir das selb ja^erlich gelt lihen woltint dem selben Johansen von Scho^enôwe. Darvmb habin wir angesehen die getrúwen dankna^emen dienst, so er v´ns dik nvtzlich getân hât, vnd habin das selb ja^erlich gelt von dem selben Dietrich von Elnhofen vff genomen an v´nser hant vnd habin es wider gelihen vnd lihin das selb ja^erliche gelt mit aller zůgeho^erd dem selben Johansen von Scho^ennôwe vnd sinen erben ze rechtem lehen mit disem brief, vnd ist och dirre koff vnd alles das, so an disem brief geschriben stat, mit v´nser hantgetât gůten willen vnd gvnst beschehen vnd vollefu^ert mit allen den worten werken vnd geta^eten vnd mit aller kraft, so darzů hort vnd notdúrftig was nach gewonhait vnd nach recht. Vnd ze warem vnd offem vrkv´nd vnd sta^eter sicherhait aller dirre vorgeschriben ding habin wir vorbenempter abt Geory des gotzhus ze sant Gallen v´nser insigel gehenkt an disen brief. Darnach vergich ich der vorgenant Dietrich von Elnhofen ainer gantzen warhait alles des, so an disem brief von mir geschriben stat, vnd hab och ich mit gůten trúwen verhaissen vnd gelobt, wa^er das dem selben Johansen von Scho^ennôwe das obgenant ja^erlich gelt gar ald an dekainem tail jeman anspra^ech fúr aigen ald fúr lehen ald mit dekainer ander ansprach, des so^elin ich vnd min erben in vnd sin erben verstan vnd versprechen an gaistlichem vnd an weltlichem gericht vnd an allen stetten, da si sin notdúrftig sint, vnd des ir recht wem sin fúr recht lehen von sant Gallen nach recht, âne alle geuerde. Vnd des ze warem vnd offem vrkv´nd der selben ding hab och^a) der selb Dietrich von Elnhofen min insigel zů des obgenanten mins gna^edigen herren abt Georyen des gotzhus ze sant Gallen insigel gehenkt an disen brief. Der ist ze Wile⁵ geben, do man von Cristes gebúrt zalt drúzehenhvndert jar, darnach in dem ain vnd sibentzigosten jar, an v´nser frowen abent ze der liechtmisse.

Source Fulltext: Chartularium Sangallense VIII, Nr. 5260, S. 453-454.