Allen den, die disen brief an sehent oder ho^erent lesen, kúnd ich Albreht von Lindenberg schulthais ze Wil¹ vnd vergich offenlich || mit disem brief, das ich mit gůter beschaidenhait vnd vorbetrahtung fúr mich vnd fúr alle min erben Eglolfen von Golden||berg² vnd sinen erben ain sieht genossami geben han vnd gib inan mit disem brief ân allen den kinden, so Anna Hain||richs Hůbers tochter von Niderwille³, dú min ist von dem libe, ietz hett ald si hienach gewinnet bi Ru^edin dem Benker von Obra Wintertûr⁴ ir elichen man, der selb Ru^edi Benker des vorgenanten Eglolfs von Goldenberg ist von dem libe, mit solicher beschaidenhait, das dú selbú kind ha^elbú min vnd miner erben sint vnd sin sont vnd sint och ha^elbú des egenanten Eglolfs von Goldenberg vnd siner erben an wider rede. Vnd wenn dú selb Anna abstirbet, ist das si denn lib erben lât bi dem selben Ru^edin Benker, so sol ich vnd min erben nv´t me noch fúro nemen denn ainen slehten hoptual, wenn och der vorgenant Ru^edi Benker abstirbet vnd er och lib erben lât bi der selben Annen, so sol Eglolf von Goldenberg vnd sin erben och nút me noch fúro von im nemen denn ainen slehten hoptual, stirbet aber dú obgenand Anna ab ân lib erben, so sol ich Albr. von Lindenberg vnd min erben gen ir stan vnd beliben ân allen v´nsren rehten vnd gewônhaitten, als ander herren gen iro abgestorben lúten stant, nach des landes reht vnd gewônhaiten, also sol och der vorgenant Eglolf von Goldenberg vnd sin erben gen iro obgenanden man an iro rehten stan vnd beliben ân wider rede, ob der selb iro man ân lib erben abstirbet. Vnd ze ainer warhait vnd offem vrkúnd aller vorgeschribner ding vnd gedingde henk ich Albreht von Lindenberg da vorgenant min insigel offenlich fúr mich vnd fúr min erben an disen brief. Der geben ist ze Wil in der stat an sant Marien Magdalenen tag in dem jar, do man zalt von gottes gebúrt drúzehenhvndert jar, darnach in dem ainen vnd sibentzigosten jar.

Source Fulltext: Chartularium Sangallense VIII, Nr. 5285, S. 483.