Ich^a) Hainrich der Waibel von Wattenberg¹ ain frye lantrichter ze Schattbůch² in der grafschaft ze dem Hailigenberg³ vergich vnd tůn kunt mit disem brief allen, die in ansehent lesent oder || ho^erent lesen, das ich offenlich ze gericht saz vff dem lantgericht ze Schattbůch vff disen tag, als dirr brief geben ist, vnd stůnt da vor mir vnd vor offem gericht der beschaiden man || Walther von Langen Egg⁴ mit fúrsprechen vnd zogt da ainen brief, der mit des lantgerichtes ze Schattbůch insigel besigelt was, das dis nachbenempten lút V^olrich Ha^ech amman ze Appazelle⁵, || Walther der Waibel amman ze Huntwile⁶, Entz Ha^ech, Gerwig Beringer am Berg⁷ genant der Herr, Cu^eni Burst zem Hailigen Brunnen⁷, Wa^elti Hůber, Gerwig Steger, Wa^elti Hůber der elter, Jacob am Egglin⁷, Herman Bopphart, V^eli Bopphart, Marti ze dem Hof⁷, V^olr. Landenberg, Margaretha sin elichú wirtenne, Anna Herman Landenbergs elichi wirtinne, Cu^eni Loser, V^eli Trât, Gerwig ze Gvnta⁸, V^eli in dem Schlatt⁹, Jacob in der Ôwe⁷, Hans Kês, Cu^eni vnd V^eli Enderli, der Tôd der schmit, Hans Můmensun, Gerwig Hesse, . . der Binder ze dem Hof, Ja^eggli A^enderli, V^eli Bretheller, V^eli Vetter, Ja^eggli Spêk, Herman Braitenower, Cu^eni im Mo^eslin, Cu^eni Sutur, V^eli Gniper, Dietrich Stober, Haini Studer, V^eli Koppenhain, Hans Wachter, Cu^eni Lanker, Cu^eni Riem, Hans Kaltermans sv^n, Hans Ha^ech vnd alle, die sesshaft sint ze Appatzell vnd ze Huntwile, man vnd frowen, iung vnd alt, si sigint benempt oder vnbenempt, vnd die lender gemainlich ze Appatzell vnd ze Huntwile vor mir vff recht vsser a^vch komen warent vff disen hútigen tag gen Peter Brysing, vnd bewist och als recht was, das er das verkúnt het ze hus vnd ze hof, vnd zogt och dar vff ainen brieff, der mit des erwirdigen herren herr Georien abt des gotzhus ze sant Gallen¹⁰ hangenden insigel besigelt was, der bewist, daz die vorbenempten lút vnd lender dem vorbenempten Walther von Langen Egg enpholhen vnd vollen gewalt vnd volkumen recht geben hatten alle^b) gamainlich vnd ieglichen besunder gegen dem vorbenempten Peter Brysing vnd gegen allen den, die von sinen wegen zů inen ze sprechen hettint, sú vor mir vnd vor offem gericht ze verstan ze versprechen vnd recht ze nemen vnd ze tůn ze gewin vnd ze verlust ze gelicher wis vnd in allen dem rechten, als ob si selb ze gegen stu^endint. Vnd do die brief gelesen wurdent, do batt er mich mit sinen fúrsprechen ze eruaren an ainer urtail, ob er die vorbenempten lút vnd lender vor mir versprechen vnd dar vmb recht tůn vnd nemen mo^eht. Do fragot ich vorbenempter richter vrtail vmb vnd wart ertailt mit gesamnoter vrtail, das er sú nach des briefes wisung wol versprechen mo^eht vnd och recht dar vmb wol nemen vnd tůn mo^eht. Vnd do im das ertailt wart, do offenet der vorbenempt Walther mit sinen fúrsprechen vnd sprach, er stu^endi da vor offem gericht vnd wartetti, ob der vorbenempt Peter Brysing oder Cůnrat sin brůder ald ieman andere von sinen wegen zů den vorbenempten luten vnd lendern iht sprechen weit, vnd batt mich ôch eruaren an ainer vrtail, was recht wa^er. Do fraget ich vorbenempter richter och vrtail vmb vnd ward ertailt nach miner frag mit rechter vnd mit gesamnoter vrtail, das der vorbenempt Walther wartteti, alle die wile ich vff disen hútigen tag ze gericht sa^ez. Wa^er aber, das der vorgenant Peter ald Cůnrat sin brůder ald sin erben ald ieman andere von sinen wegen zů dem vorbenempten Walthern von der vorbenempten lút vnd lendern wegen niht klegti noch spra^ech, daz dann der vorbenempt Walther vnd och die vorbenempten lút, si sigint benempt oder vnbenempt, die ze Appatzell vnd ze Huntwile gesessen sint, vnd och die selben lender ze Appatzell vnd ze Huntwile alle gemainlich vnd ieglicher sunderlich von aller a^vcht von dem vorbenempten Peter Brysing, von Cůnrat sinem brůder vnd von allen sinen erben gentzlich vnd gar ledig vnd los sin sont vnd von aller der clag vordrung vnd ansprach, so der vorgenant Peter, Cůnrat sin brůder ald sin erben zů den vorbenempten lúten vnd lendern vntz vff disen hútigen tag gehebt hant, vnd das och der selb Peter Brysing noch Cůnrat sin brůder noch ir erben noch nieman andere von ir wegen die vorbenempten lút noch lender gemainlich noch enkainen svnderlich darvmb niemer mer vfftriben noch ansprechen sônd weder mit gaistlichem noch mit veltlichem^c) gericht, e das sú vor den vorbenempten lúten vnd lendern den schaden, den si von des vorbenempten Peter Brysings vnd von Cůnrat sins brůders wegen gehept hant oder noch von sinen erben gewinnent, gantzlich ab legent vnd wider kerent a^vn geuerde. Des warttet och der vorbenempt Walther von Langen Egg, als im ertailt was, vnd kam och do des selben tages, als ich do ze gericht sass, niemen weder Peter Brysing noch Cůnrat sin brůder noch sin erben noch niemen andere von sinen wegen, die zů dem vorbenempten Walther von Langen Egg von der vorbenempten lút vnd lender wegen klegtint ald spra^echint. Dar vmb so lass ich die vorbenempten lút, es sigin man oder frowen, iung oder alt, si sigint benempt oder vnbenempt, die ze Appatzelle vnd ze Huntwile sesshaft sint, vnd die lender gemainlich ze Appatzell vnd ze Huntwil vsser aller der a^vcht, darinn si von des vorbenempten Peter Brysings wegen gewesen sint vntz vff disen hútigen tag. Wa^er och, das si hernach von des vorbenempten Peter Brysings wegen in dem a^vchtbůch ze Schattbůch wurdint verschriben vunden von dehainer sach wegen, das sol doch den vorbenempten lúten noch lendern kainen schaden bringen nu noch hernach in kainen sachen. Vnd ze offem vnd warem vrkúnd aller dirr vorgeschribener ding han ich der vorbenempt richter des vorbenempten lantgerichtes ze Schattbůch insigel gehenkt an disen brief. Der geben ist an dem na^ehsten ma^entag nach vssgender phingstwochen, do man zalt von gottes gebúrt drúzehenhunder jar, sibentzig jar vnd darnach in dem ersten jar. Ind. IX^a.

Source Fulltext: Chartularium Sangallense VIII, Nr. 5279, S. 476-478.