Wir^a) Geori von gottes gnâden abt des gotzhus ze sant Gallen¹, das ân alles mittel zůgeho^eret dem stůl ze Ro^vm, veriehen vnd tůn kunt mit disem brief allen, die in ansehent || lesent oder ho^erent lesen, das fúr v´ns kamen ze Wil² in v´nser stat, do wir offenlich ze geriht sassen, v´nser lieber getruwer Albreht von Lindenberg schulthaiss || ze Wil³ mit fro^vw Elisabethen siner elichen husfro^vwen Burkarts sa^eligen des Nagels elichen tohter vnd offenoten da mit fúrsprechen vnd sprachen, daz sú mit || gůter vorbetrahtung vnd beschaidenhait durch got vnd durch ir vnd ir vordem selen nutz vnd hailes willen willeklich vnd frilich redlich vnd reht geben hettin den zehenden ze Nidrenwille⁴ mit allen rehten nútzen vnd gewonhaiten vnd mit aller zůgeho^erd, der ir reht ledig aigen wa^er, swo^ester Claren von gottes verhengnúst abtissinne des conuentes ze Ta^ennikon⁵ des selben Albrehts von Lindenberg swo^ester iren nachkomen vnd dem selben conuent gemainlich ze Ta^ennikon, vnd wo^eltin inen den selben zehenden vfgeben vertgon vnd zů iren handen bringen, vnd baten v´ns ze erfarn an ainer vrtail, wie sú das tůn so^eltin, das es kraft hetti nu vnd hienach, do fragten wir vrtail vmb vnd ward ertailt mit gemainer vrtail, daz der vorgenemt^b) Albreht von Lindenberg das mit siner hand an des gerihtes stab tůn so^elt vnd das die vorgenemt Elisabeth na^em ainen vogt an dem ring, wen si wo^elt, mit des vorgenemten ir elichen mannes willen, vnd aber dann bescha^eh, als reht wa^er, do nam si ze vogt Eberhart Ko^vffman burger ze Wil mit des vorgenemten ir elichen mannes willen, dem o^vch wir die vogtye nach v´nsers gotzhus gewonhait verlihen vmb die sach, do batt ir aber die selb Elisabeth mit dem selben ir vogt ze erfarn an ainer vrtail, wie si nu farn so^elt, als reht wa^er, do fragten wir vrtail vmb vnd ward ertailt mit gemainer vrtail, daz si der selb ir vogt fu^eren so^elt ze drin malen vsser des gerihtes ring vnd si ze ieglichem mal fragen, ob si es vmbetwunglich ta^et vnd willeklich vnd gern tůn wo^elt, vnd dann mit ir vnd mit des selben ir vogtes handen an des gerihtes stab das tůn so^elt, vnd daz es also wol kraft hetti nach dem rehten, do fůrt si der selb ir vogt ze drin malen vsser des gerihtes ring vnd fragt si ze ieglichem mal, als im vormals ertailt ward, ob si es vnbetwungenlich ta^et vnd willeklich vnd gern tůn wo^elt, der sait o^vch ze dem dritten mal bi sinem aid, dz si im ze ieglichem mal gesait hetti, daz si es vnbetwungenlich ta^et vnd willeklich vnd gern tůn wo^elt, vnd gab do ze stet der vorgenemt Albreht von Lindenberg mit siner hand vnd o^vch die selb Elisabeth mit ir vnd mit ir vogtes handen den selben zehenden ze Nidrenwille mit allen rehten nútzen vnd gewonhaiten vnd mit allem dem, so von reht vnd von gewonhait darzů vnd darin geho^ert, ledklich vf an des gerihtes stab zů der vorgenemten swo^ester Claren vnd des conuents handen ze Ta^ennikon vnd sasten o^vch do die selben swo^ester Claren vnd den conuent gemainlich ze Ta^ennikon vnd setzent sú mit disem brief in gewalt vnd in gewer des selben zehenden, als reht sitte vnd gewonlich was vnd als mit rehter gemainer vrtail ertailt ward, vnd entzigent sich o^vch do ze stett die vorgenemten Albreht von Lindenberg mit siner hand vnd o^vch die vorgenemt Elisabeth mit ir vnd mit des selben ir vogtes handen vnd entsihent sich mit disem brief fúr sich fúr alle ir erben vnd nachkomen gen der selben swo^ester Claren gen ir nachkomen vnd gen dem selben conuent ze Ta^ennikon aller aigenschaft aller lehenschaft aller manschaft aller gewer aller kuntschaft aller zúgnúst lút vnd brief alles rehten gaistliches vnd weltliches gerihtes aller vordrung vnd ansprach, so si zů dem vorgenemten zehenden ald daran hatten oder hernach iemer gewinnen mo^ehtin von reht von gewonhait oder von dehainen andren sachen. Vnd des ze ainer warhait henken wir abt Geori dauorgenemt v´nser insigel an disen brief. Darnach veriehen wir die vorgenemten Albreht von Lindenberg, Elisabeth sin êlichi husfro^vw vnd Eberhart Ko^vffman vogt in diser vorgenemten sach ain gantz warhait aller diser vorgenemter ding vnd daz alles das war ist, das der erwirdig v´nser gna^ediger herr abt Geori dauorgenemt von v´ns veriehen hatt an disem brief, vnd ze merer sicherhait der selben ding henken wir o^vch v´nsri insigel an disen brief. Der geben ist ze Wil an dem na^ehsten donrstag vor sant Gallen tag in dem jar, do man zalt von gottes gebúrt drúzehen hundert jar vnd darnach in dem ain vnd sibentzigosten jar.

Source Fulltext: Chartularium Sangallense VIII, Nr. 5292, S. 488-489.