Ich^a) Růdolf von Walsse¹ von der durlúchtigen hochgebornen fúrsten miner gnedigen herren der hêrtzogen von O^ester(rich) wegen des heiligen Ro^emschen riches lantvogt in Elsazze vnd || ir selbs landen ze Swaben ze Ergo^ew ze Thurgo^ew vnd ze Brissgo^ew tůn kunt allermenglichem mit disem briefe vrnb alle die sto^esse vnd missehellung, so der êrwirdig herre herr Georig || abt des gotzhuses ze sant Gallen² ze einem teile vnd herr Walther von der Alten Klingen³, herr Albrecht vnd Friderich von Bussnang⁴ fryien von ir^b) selbs von V^olrichs vnd Johans ir bru^eder || klosterherren ze sant Gallen⁵ vnd ouch von Cůnratz vnd Walthers ir bru^eder⁶ wegen, die ze ziten in lande núten sind, ze dem andern teile mit enandern gehept hant vntz vf disen húttigen tag, als dirre brief gegeben ist, vnd besunder vmb die ansprachen, so der vorgenempt abt Georig zů den obgen(anten) von Klingen vnd von Bussnang hatte, daz si in vnd sin gotzhus an lúten vnd an gu^etern ane recht angriffen hatten, vnd ouch vmb die ansprachen, so die vorgenempten von Bussnang zů dem egenanten abt vnd zů dem gotzhus gehept hand von des wygers wegen gelegen ze Wile⁷ bi der stat, daz der dritte zug in demselben wyger iro we^ari vnd in ir burgse^azz zů der alten Toggenburg⁸ gehorte vnd daz si ouch vier hundert ke^as ie^arliches geltes hettin von dem obgen(anten) abte vnd dem gotzhus, die ouch in ir burgse^azz zů der alten Toggenburg gehortin, vnd daz si ouch zechen phund wachs geltes jerlich ze gebenne von dem obgen(anten) abt vnd dem gotzhus hettin, die ouch zů ir dem obgen(anten) burgse^azz gehortin, vnd daz ouch die frow, die man nemmet die Swertzin, die der obgen(ant) abt ietz in gevangnússe hat, iro eigen we^are vnd daz inen ouch der egenant abt verheissen hetti, wie si die vorgenempten V^olrichen vnd Johansen von Bussnang ze sant Gallen in das kloster verdingotin, daz er si von dem schaden lo^esen vnd wisen wo^elte. Derselben sto^essen vnd missehellung si bedenthalb gar vnd gentzlich willeklich vf mich vnd miner herschaft von O^ester(rich) re^ate ze den minnen komen sind, vnd hand bede teile gelopt mit iren gůten trúwen an eides stat, wes wir vns darvmbe gemeinlich oder der merteil vnder vns erkanten vnd vzsprechen, daz si daz ste^at haben sond vnd gentzlich vollefu^eren ane allen fúrzug vnd widerrede. Vnd darvmb so habe ich vnd miner obgen(anten) herschaft re^ate, die ich do ze mal bi mir hatte, gemeinlich vnd einhelleklich nach beder teil ansprach klag vnd widerrede vns erkent vnd vzgesprochen vnd sprechen ouch vz wizzentlich mit gůter vorbetrachtung mit disem briefe, als hienach geschriben stat. Des ersten daz bede die vorgenempten teile einer andern vnd alle ir helfer vnd diener gůt frúnde sin súllent vnd vmb alle die sto^esse vnd missehellung, so si bis her mit enandern gehebt hant vntz vf disen húttigen tag, als dirre brief gegeben ist, gar vnd gentzlich verricht sin súllent ane geuerde, vnd daz alle angriffe vnd schade, so die vorgenempten von Klingen vnd von Bussnang ir diener vnd helfer dem obgen(anten) abte vnd dem gotzhuse getan hand, gentzlich ab sin súllent. Es sol ouch der vorgenempt abt den egenanten V^olrichen vnd Johansen von Bussnang geben zwentzig phunt Kostentzer múntz vf den nechsten sant Martins tag, der nu schierost kúnftig wirt, an iren kosten, vnd sol si ouch des von dem obgen(anten) abte fúr alle ansprach benu^egen. Es sol ouch der egenant abt die frowen, die man nemmet die Swe^artzin, ledig lazzen, vnd sol ouch dieselb frow hinnanthin der egenanten von Bussnang eigen sin vnd vnanspre^achig von dem ietzgen(anten) abte. Ouch sol er ir das lipding, das si von im gekouffet hat, hinnanthin richten vnd geben, die wil si lept. Es sol ouch die selb Swe^artzin fúrbasser in die stat gen Wile nicht komen ane des abtes vnd der burger ze Wile willen vnd gunst, ke^ame aber si darv´ber in dieselben stat, wie denne der egenant abt vnd die burger ze Wile sich selber gegen ir versorgent, des súllent sich die egenanten von Bussnang nicht an nemen noch vnderwinden in keinen weg. Es sol ouch der vorbenempt abt den egenanten Johansen von Bussnang ze stůle setzen vnuertzogenlich in sinem kloster, als von alter her daselbs sitt vnd gewonheit gewesen ist. Es súllent ouch die verse^azzenen zinse alle von dem obgen(anten) wachs gelte vntz vf disen húttigen tag, als dirre brief gegeben ist, gar vnd gentzlich ab sin, vnd von derselben verse^azzenen zinsen wegen súllent die egenanten von Bussnang kein ansprach zů dem egenanten abte oder zů sinen nachkomen getůn, vnd sol inen das ietzgen(ant) wachs gelt richten vnd geben ze den zilen, als vntz her sitt vnd gewonlich gewesen ist. Wir haben vns besunder erkent vnd sprechen ouch darvmbe vz, daz die vorgenempten von Bussnang zů dem egenanten wyger ze Wil noch zů dem egenanten ke^asgelt enkein recht hant noch hinnanthin kein recht vorderung noch ansprach datzů haben noch gewinnen sullent weder mit geistlichem noch weltlichem gerichte noch ane recht. Vnd hand ouch die obgen(anten) herr Albrecht vnd Friderich von Bussnang fúr sich selber fúr Cůnraten vnd Walthern ir brůdere, die in lande ze disen ziten nút sind, vnd fúr alle ir erben offenlich vor vns vertzigen aller recht vnd rechtung aller vordrung vnd ansprach, die si zů dem vorgenempten wyger vnd dem ke^asgelte hatten oder hienach in keinen weg iemer gewinnen mo^echtin. Datzů súllent ouch dieselben herr Albrecht vnd Friderich von Bussnang hinnant ze dem nechsten sant Martins tag, der nu kunt nach dem tag, als dirre brief gegeben ist, komen vf vnserr herschaft von O^ester(rich) lantgericht ze Thurgo^ew vnd súllent daselbs vor gerichte sich des egenanten ke^asgeltes vnd des wygers fúr sich fúr ir brůder vnd alle ir erben verziechen, als denne da gericht vnd vrteil git. Dieselben herr Albrecht vnd Friderich von Bussnang hant ouch gelopt vesteklich, besche^ach das die vorgenempten Cůnrat vnd Walther ir brůder ze lande ke^amin, wenne das beschicht, so súllent si schaffen, daz si darnach innwendig zwein manoden den ne^achsten sich ouch vertziechen des vorgenempten ke^asgeltes vnd des wygers vf dem vorgeschribenen lantgericht in gelicher wise vnd in aller der mazze als si, ane geuerde. Te^atin aber si des nicht vnd sumig hieran werin, in was schaden vnd kosten der obgen(ant) abt sin nachkomen oder das gotzhus des ke^ament, den schaden vnd kosten súllent die obgen(anten) herr Albrecht vnd Friderich von Bussnang dem egenanten abte sinen nachkomen vnd dem gotzhuse gar vnd gentzlich vzrichten. Har v´ber ze einem ste^aten waren vnd offenen vrkúnde aller der vorgeschriben dingen so han ich der vorgenempt Růdolf von Walsse lantvogt durch ernstlicher be^atte willen beder teilen min ingsigel gehenket an disen brief. Darnach veriechen wir der egenant abt Georig, Walther von der Alten Klingen, Albrecht vnd Friderich von Bussnang ein gantz warheit aller diser vorgeschribenen dingen vnd gedingen vnd daz alles das war ist vnd ste^at vnd vest beliben sol, das der vorgenempt Růdolf von Walse von vns veriechen hat an disem briefe. Vnd ze merer sicherheit derselben vorgeschribenen dingen so haben wir ouch vnseri ingesigel gehenket an disen brief. Der geben ist ze Baden⁹ an dem nechsten donrstag nach sant Laurentien tag des jares, do man zalte von gottes geburte drútzehen hundert jar, darnach in dem zwei vnd sibentzigisten jare.

Source Fulltext: Chartularium Sangallense VIII, Nr. 5325, S. 514-517.