Wir Albreht von Bussnang ritter, Cůnrat vnd Walther von Busnang¹ alle drie frye herren vnd gebrůder tůnt kunt vnd veriehent offenlich mit || vrkúnd diss briefs allen den, die in an sehent lesent oder ho^errent lesen, dz wir mit gůter vorbetrahtung vnd beschaidenhait fúr vns vnd vnser || erben vnd nachkomen, die wir vesteklich her zů bindint, lieplich vnd gu^etlich verriht vnd verainbert sint mit graf Donaten vnd graf Diethelmen || von Tokkenburg² gebrůdern von der sto^essen misshellung vordrung vnd ansprachen wegen, so wir zů inan hatten von Gůten Vederlis wegen vnd von der wegen, die von der selben Gůten komen sint, das ist Hainrich vnd V^olrich Lútenrieter gebrůder, Adelhait vnd Ma^ehthilt der Lútenrieter swo^ester, Walther, Hans vnd Hainrich von Bichwille³ gebrůder, der egenanten Adelhaiden elich sún, Burkart vnd Bertolt die Múller^a) von Bichwille der vorgenanden Ma^ehthilden elich sún, als wir sprachent, dz die vnser aigen wa^erint, vnd habint dar vmb von denan selben von Tokkenburg enpfangen drúhundert vnd zwai vnd zwa^enzig pfunt vnd zehen schilling alles gůter vnd gna^emer haller, der wir von^b) inan gar vnd ganzlich gewert sint vnd in vnsern vnd vnser erben schinbern offen nuzze komen vnd bewendz sint, vnd dar vmb so habint wir vns alle drie gemainlich vnd vnser ieglicher besunders^c) fúr vns fúr alle vnser erben vnd nachkomen entzigen vnd entzihent vns och offenlich vnd wissentlich mit disem brief gen denan vorgenanden von Tokkenburg vnd gen irn erben vnd nachkomen an denan vorgenanden lúten vnd gu^etern aller aigenschaft aller manschaft aller lenschaft aller besazzung aller gewêr aller zúgnust aller kuntschaft lút vnd briefen aller vordrung vnd ansprach alles rehten gaistlichs vnd weltlichs gerihtes, so wir oder vnser vordren dar an gehebt habint oder wir ald vnser erben vnd nachkomen nû ald hienach dar an oder dar zu gewinnen mo^ehtint von reht ald gewonhait, vnd lobent och alle gemainlich vnd vnser ieglicher besunder fúr vns vnd vnser erben, da wider niemer ze tu^enn mit geriht noch ane geriht wir noch nieman andre von vnsern wegen schaffen da wider getan werden mit endehainen sachan ane geua^erd. Bescha^eh aber, das vnser brůder Fridrich von Bussnang⁴ die vorgenanden von Tokkenburg von der selben lút vnd gu^eter wegen an griffe mit reht oder ane reht, dar zů so^ellint wir vnserm brůder nit hilflich sin, vnd wie sich die vorgenanden von Tokkenburg des werrent, dar an so^ellint wir si noch ir helfer nit sumen ane alle geua^erd. Vnd des ze vrkúnd vnd ze warhait aller diser vorgescribner ding vnd geding hant wir vorgenanden Albreht von Bussnang ritter, Cůnrat vnd Walther von Bussnang alle drie frie herren vnd gebrůder vnsrú aigenú insigel offenlich gehenket an disen brief. Der geben ist ze Bischofzell⁵ an dem na^echsten samstag vor sant Mathyes tag des hailgen zwelfbotten in dem iar, do man zalt von Cristuss gebúrt drúzehenhundert iar, ahtzig iar vnd dar nach in dem andern iare.

Source Fulltext: Chartularium Sangallense X, Nr. 5892, S. 10-11.