Ich Cůnr. der Stosser ain frie lantrichter in der Piers¹ von mines gna^edigen herrn des Ro^emschen kúng Wentzeslaus gewallt vnd von des hochgeborn fúrsten vnd herrn genaden hertzog Fridrich ze Paygern² tůn kunt mit disem brief, das fúr mich kam fúr offen verbannen geriht an dem tag, als dir brief geben ist, die ersamen frown Wendol vnd Elsbet Schwestern herrn Cůnr. saeligen tochtra von Stegen³ mit irem fúrsprechen dem erbern mann V^elin Berchtolde burger ze Lúkirch⁴ vnd offnotund da vor geriht ir ietwedra ainen brief von iren elichen manne, die baid Wolf vom Stain⁵ genant sind, der vesten ritter herr Walzen vnd herr Cůnr. sun vom Stain genant von Richenstain⁶, vnd dieselben brief stůndent also, waz die vorgenant ir elich frowa vf dem selben lantag ta^etind vnd vollfůrtind von des koffes wegen, den der vorgenant herr Walz vnd Wolf sin sun vom Stain getan hettind mit dem erbern mann V^olin Búrgi Stattamman ze Lindow⁷ vnd Ru^edi Mayger burger ze Lindow von der zwayger ho^ef wegen, da hútt ze tag vff sitzet Peter vnd Jacob die Schertweggen, vnd von des wingarten vnd bongarten vnd des halben torrggels wegen mit aller zugeho^ert, dú gelegen sint ze Raeterschú⁸ vnd lehen ist von sant Gallen, nach wisung saz vnd lutung der kouffbrief, die sy darum von inen hand, das sy da zů iren gůten willen vnd gunst gaebint, wann sy von ehhafftiger not nit selber dazů vf den lantag mo^ehtind kumen, vnd was die vorgenant ir elich frowa baid reht vordrung ansprach je hettind gehebt oder v´mmer gewinnen mo^ehtind, von welen rehten vnd sachen daz wa^eri, zů den vorgenanten gůten, das sy sich des entzihen vnd vfgen so^eltind gen dem vorgenanten V^olr. Búrgin vnd Ru^edi Mayger wie crafft vnd macht han so^elte vnd noturfftig wa^eri vnd och reht, vnd waerind och die vorgenant frowa baid darvmb fúr geriht kumen, wie si daz vollfu^eren so^eltind, wan dez wa^erend si willig ze tůnd, do fragt ich vmb, do ward ertailt mit gemainer vrtail, daz die vorgenant frowa baid vo^egt na^emind nah der vorgenanten brief sag, daz hetti wol krafft vnd maht vnd waeri och reht, vnd do inen daz also ertailt wz zetůnd, do nam die vorgenant frow Wendel ze vogt den vorgenanten herr Waltzen vom Stain iren lieben schweher, do nam die vorgenant frow Elsbet ze uogt den frummen mann Herman Wielen iren lieben o^ehen, die inen mit vrtail vnd mit reht ze vo^egten geben wurdent nah der vorgenanten brief sag, die si offnotund von der vorgenant ir elich mann wegen, vnd do daz geschah, do ward ertailt mit der merun vrtail, daz sich die vorgenant frowa baid mit irn vorgenanten vo^egten vnd henden sich entzigend vnd vfgaebind aellú ira reht vordrung vnd ansprach, die sie hettind gehebt oder v´mmer gewinnen mo^ehtind, von welen sachen vnd rehten daz wa^eri, zů den vorgenanten gůten in min dez vorgenanten lantrihters hand vnd vs miner hand in der vorgenanten V^olr. Búrgi vnd Ru^edi Mayger hand vnd gewalt, ds hetti wol krafft vnd maht vnd wa^eri reht, vnd do inen daz also ertailt ward zetůnd, do vollfůrtund daz die vorgen(anten) frowa baid mit iren vorgenanten vo^egten, wie vrtail vnd reht gab vnd alz vor mit worten beschaiden ist, vnd gabent alle vorgenant sach vnd stukh vf fúr si vnd all ir erben mit allen worten werken geta^eten vnd mit aller crafft, so dazů notdurfftig ist von gewonhait vnd von reht, also daz si noh ir erben noh niemend von iren wegen die vorgenanten V^olr. Búrgi vnd Ru^edi Maiger noh kainen iren erben an den vorgenanten gůten, als ir koffbrief darvmb wisend vnd sagend, númerr mer kain vordrung noh ansprach dazů noh daran nit me haben sond von dehains rehten wegen weder vf gaistlichem oder weltlichem geriht noh an kainen stetten, da es in ze schaden kumen mo^ehti, vnd dez alles hieuor geschriben stat han ich vorgenant(er) lantrihter von der vorgenanten frowen baiden vnd iren vo^egten bett wegen alle vorgenant sach vnd stukh braht vnd vfgeben in der vorgenanten V^olr. vnd Ru^edis hand vnd gwallt, wan si da vor geriht nit warend, vnd wenn dz also gescha^ehi, so mo^ehti es wol crafft vnd maht han in aller der wis, alz ob si selber vor geriht wa^erind gewesen. Dez allez ze warem vrkund gib ich dem vorgenanten V^or. Búrgi vnd Růdin Mayger vnd iren erben disen brief besigelt mit des lantgrihtes insigel vnd och vnder der nahgeschribnen insigel, wan mir daz vnzerworffenlih ertailt ward zetůnd. Des ze vrkund henk ich dez gerihtes insigel an disen brief. Ich Waltz vom Stain, ich Herman Wiele baid vo^egt hieuor genant vergehend der vogty alz vorbeschaiden ist vnd mit v´nserm willen vnd gunst geschehen ist, des ze ainer sicherhait henkend wir v´nsrú insigel och an disen brief, wan v´ns daz och ertailt ward zetůnd, waeri aber ds dir brief bůswirdig oder gebresthafftig wrdt, dennoht sol er dem vorgenanten V^olr. vnd Ru^edin vnd iren erben krefftig vnd gůt sin an allen stetten, wa es notdúrfftig ist vnd sin bedurffend. Vnd ist der brief geben ze Lukurh vor lantgeriht mit vrtail vnd mit reht an dem samstag vor dem wissen sunnentag, do man zalt von gottes gebúrt drúzehenhundert jar vnd zway vnd ahtzig jar.

Source Fulltext: Chartularium Sangallense X, Nr. 5893, S. 12-13.