Wir graue Eberhart von Wirtenberg vnd wir die hoptlu^et der geselleschaft mit dem Lo^ewen ze Swaben graue Hainrich von Montfort herr ze Tettnang, graue V^olrich von Wirtenberg dez vorgenanten graue Eberhart sůn vnd graue Ffridrich von Zolrr von der Hohenzolrr vnd wir die hoptlu^et der geselleschaft mit sant Wilhelm vnd wir die hoptlu^et der geselleschaft mit sant Georien vnd wir die herren ritter vnd knehte gemainlichen || in den selben dri geselleschaften, alz wir in den riuieren vnd kraissen gesezzen vnd gelegen sien von dem vrfar ze Spyr ienhalb Rynes vff gen Stra^vßburg vnd von Stra^vßburg vor dem gebirg vff gen Basel vnd von Basel ienhalb Rynes vff gen Bregentz vnd von Bregentz vor dem gebirg vff gen Mu^enchen vnd von Mu^enchen gen Yngelstat vnd von Ingelstat gen Aichstetten vnd von Aichstetten gen Regenspurg || vnd von Regenspurg biz gen Annberg vnd von Annberg biz gen Eger vnd von Eger biz gen Koburg vnd von Koburg biz gen Swinfu^ert vnd von Swinfu^ert biz gen Miltenberg vnd von Miltenberg biz gen Haidelberg vnd von Haidelberg wider gen Spyr in daz vrfar bekennen vnd tun kunt allen den, die disen brief ansenhent lesent oder ho^erent lesen, vmbe daz, daz alle redlich vnd gereht sach gefurdert vnd gesterkt vnd all vnredlich vnd || vngereht sach nider gedrukt vnd dest baz gewendet werden, dar vmb vnd o^vch daz all gotzhu^eser gaistlich lu^et bilgrin ko^vflu^et ko^vfmanschatz lantfarer geste witwen vnd waisen geschirmt werden vnd dest baz by gemach beliben, so haben wir vns gar beratenlich mit gůtem fu^ersenhen vnd rehter bekantnu^est vnd sunderlich nach ra^vt aller vnser ra^et herren vnd gesellen, die wir da ze ma^vl by v´ns hetten, got ze lobe v´ns vnd vnsern landen vnd lu^eten vnd gemainem lande ze fryd vnd ze gemach mit allen vnsern vestin stetten vnd schlossen vnd mit allen vnsern dienern vo^egten vnd amptlu^eten zů den erbern vnd wisen dez hailigen Ro^emischen rychs stetten Regenspurg, Augspurg, Vlm, Costentz, Esslingen, Ru^etlingen, Rotwil, Wile, V^eberlingen, Memmingen, Bybrach, Rauenspurg, Lindow, sant Gallen, Pfullendorff, Kemptůn, Ko^vffbu^eren, Lu^etkirch, Ysnin, Wangen, Rotenburg vff der Tuber, No^erdlingen, Dinkelspu^ehel. Hall, Gmu^end, Hailpru^enn, Winpfen, Giengen, Winsperg, Bopfingen, Aulon, Bůchorn, Wil in Turgo^ew vnd Bůchow, die den punt mit einander haltent in Swaben an ainem tail, vnd zů dem hochgeborn fu^ersten vnserm lieben herren hertzog Leupolten hertzog ze O^estenrich ze Styr ze Kern den ze Krayn graue ze Tyrol margraue ze Teruis etc. vnd zů sinen landen Elsa^ezz Brisgo^ew Suntgo^ew Argo^ew Turgo^ew Kurwalhen vnd Swaben vnd sunderlich zů vnd mit der herschaft ze Hohenberg vnd waz o^vch den selben sinen landen vnd herschaften zů geho^erd, ez sien stett vestinen oder schloss, die in den selben sinen landen und krayssen gelegen sint, vnd o^vch zů allen sinen lantuo^egten herren ritter knehten vnd dienern, die dar inn gesezzen vnd wonhaft sint, an dem andern tail, ietz willeclich vnd tugentlich verstrikt verpfliht vnd verbunden vnd verbinden vns och mit kraft diz briefs vnd mit gůten tru^ewen vnd geswornen aiden hinnan hin biz vff den obrosten tag ze wihenna^ehten, der aller schierost kumpt, vnd dannanhin ain jar daz na^echste in getru^ewlich allez daz sta^et ze haben vnd ze vollfu^eren, daz hienach an disem brief begriffen vnd verschriben sta^vt, a^vn alle argenlist vnd geua^erde. By dem ersten, wa^er daz ieman, wer der wa^er, der den vorgenanten rychs stetten dez pundes oder den irn oder den egenanten vnsern herren von O^estenrich oder dehain sin lantuo^egt oder diener vnd die disen punt o^vch gen vns herwider vmb o^vch gesworn ha^vnt, ez wa^eren herren ritter oder kneht oder kain ir stett burger oder arm lu^et in riuiern vnd kraissen, alz daz hie vor begriffen vnd verschriben ist vnd o^vch in ziten diser verbuntnu^est angriff oder bsechadigoti mit mort mit prande mit ro^vp oder mit vnrehtem widersagen, daz su^ellen vnd wellen wir vorgenanter graue Eberhart von Wirtenberg vnd wir die dri geselleschaften vnd die vnsern in vnd den irn getru^ewlich vor sin vnd och dar zů bera^vten vnd beholffen sin, wenn oder alzbald wir dez innan oder gewar werden oder von in aller den, den der selb schad wideruarn vnd beschenhen wa^er, dar vmb ermant wu^erden ze frischer geta^vt mit na^vch ylen mit geschray und o^vch mit allen andern sachen, die dar zů geho^erent, von ainem mittem tag biz an den andern ze gelicher wise, alz ob vns selb oder den vnsern so^elicher schad wideruarn wa^er, a^vn all geuerde. Wa^er aber, daz so^elich sach also gestalt vnd geschaffen wa^er, daz si zů fryscher geta^vt nit so^elten noch mo^ehten erobert vnd vzzgetragen werden, wa^er ez denn, daz die sach die egenanten stett dez pundes oder die irn, die zů irem tail geho^erent, alz vorgeschriben sta^vt, ainig angieng, so su^ellen der oder die selben, den der schad wideruarn ist, die sach bringen mit clag an die vorgenanten stett oder die irn, vnd dunkt denn die selben stett by iren tru^ewen vnd erkennent sich och dez mit iren ra^eten vff ir ayde, daz dem vnreht beschenhen sy, so su^eln vnd mu^egen si die sach bringen mit clag an vns den vorgenanten von Wirtenberg vnd an die geselleschaften vnd o^vch vns dar vff manen vmb hilff mit ir erber botschaft vnd briefen gen Stůgarten in die stat, so su^ellen wir in denn fu^enftzig erber mit spiessen ze ross wol erzu^egter lu^et vff vnser selbs cost schaden vnd verlust schiken vnd senden an die stett, die si vns denn benempt vnd verku^ent hetten, a^vn all geuerde, ez wa^er denn, daz si mit willen gern minder volks von vns haben wo^elten, die su^ellen wir in o^vch senden, vnd su^ellen o^vch schaffen, daz die selben vnser spies in den na^echsten viertzehen tagen na^vch der ermanung gentzlich von huse vzz geritten vnd geschaiden sien vnd o^vch vollriten an die stett, die vns von in benempt vnd verku^ent sint a^vn all geuerde vnd die o^vch in su^ellen gehorsam sin an ze griffen vnd ze beschadigen vnd mit den o^vch si so^elich sach erobern su^ellen, so si beste mu^egen, a^vn all geua^erde. Ze gelicher wise, gieng so^elich sach an den vorgenanten vnsern herren von O^esterrich oder die sinen oder die zů dem selben tail geho^erent, alz vorgeschriben sta^vt, so su^ellen die, den so^elicher schad vnder in beschenhen ist, die sach och bringen mit clag an den vorgenanten vnsern herren von O^esterrich oder an sin lantuo^egt, ob er selber in landes nit enwa^er, vnd erkennent sich die denn och vff ir ere vnd aide, daz dem vnreht beschenhen sy, so su^eln vnd mu^egen si die sach o^vch bringen mit clag an vns den vorgenanten von Wirtenberg oder an die geselleschaften vnd vmb hilff manen, alz vorgeschriben sta^vt, gen Stůgarten in die stat vnd su^ellen wir in denn o^vch fu^enftzig erber mit spiessen schiken vnd senden an die stett, die vns denn benempt sint, in so^elicher frist vnd ziln vnd in allem dem rehten, alz vorgeschriben ist, a^vn all geuerde, ez wa^er denn, daz si o^vch mit willen gern minder volks von vns haben wo^elten. Wa^er aber, daz so^elich sach baide vorgenanten tail ze ma^vl an gend wu^erde, daz su^ellen si vns aber verku^enden gen Stůgarten in die stat, alz vorgeschriben ist, vnd su^ellen wir denn ieglichem tail besunder fu^enftzig spies schiken vnd senden an die stett vnd in aller der wise, so daz hie vor begriffen vnd verschriben ist, a^vn all geuerde, vnd su^ellen och mit namen baide tail der vorgenanten stett vnd vnsers herren von O^estenrich vnd die irn, welhem tail wir denn vnser volk geschikt hetten, schaffen vnd bestellen, daz vnserm volk in iren stetten vnd schlossen, so in dar inne gebu^ert ze ligen, redlicher failer ko^vff vmb ir pfennig vnd gelt geben werd a^vn all geuerde. Wa^er aber, daz so^elich sach aber also gestalt vnd geschaffen wa^eren, daz ir ieglichs der zwaier tail der obgenanten stett vnd vnsers herren von O^estenrich die sach mit fu^enftzig spiessen nit erobern noch vzzgetragen mo^echten vnd daz si baid oder der ain tail vnser hilff fu^erbaz bedo^erfften, daz sol ieglicher tail vnder in, welchen daz denn angienge, vns aber verku^enden gen Stůgarten in die stat vnd och dar vff manen vmb hilff, so su^ellen wir denn nach der selben ir manung in den na^echsten viertzehen tagen vngeuerlich die fu^enf man mit namen graue Růdolff von Sultz, Hainrich truhsezzen von Hefingen vnsern hofmaister von vnser dez vorgenanten von Wirtenberg wegen, her Gebhart von Rechberg von der Lo^ewen geselleschaft wegen, her Wilhelm von Rechberg von Hohenrechberg von der Wilhelmer geselleschaft wegen vnd her Hainrich der schenk von Gyren von der Georier geselleschaft wegen beschiken vnd besenden gen Kirchein¹ in die stat. Also wa^er, daz div sach angieng die egenanten stett oder die zů in geho^erent, so su^ellent si vier man vzzer den fu^enfen, daz ist Hans Gossenbro^vt von Augspurg, Lutz Kraft von Vlm, V^olrich Hapch von Costentz, Itel Huntpis stat amman ze Rauenspurg vnd Wernher Hurnbog von Ru^etlingen, welhe si denn dar vzz wellent vnd aller bast geha^vn mu^egent, zů vnsern fu^enfen setzen vnd geben, gieng ez aber den vorgenanten vnsern herren von O^estenrich an vnd die zů im geho^erent, so su^ellent si zů den vorgenanten vnsern fu^enf mannen vier man vzzer den fu^enfen, daz ist her Walther von der Alten Klingen lantvogt in A^ergo^ew, her Hans von Bodem der alt, her Ludwig von Hornstain, her Mantz von Hornstain vnd Hainrich von Randek vogt ze Scha^vffhusen, welhi si denn dar vzz nement vnd aller best gehaben mu^egent, o^vch setzen vnd geben, also daz alweg der clagent taile vier vnd der helffent tail fu^enf da by haben su^ellent, an welhem tail daz bescha^eche, vnd weihen tail div sach also angieng oder gend wu^erd, dez selben tails vier man vnd vnser fu^enf man, die darzů geordenot sint, alz vorgeschriben sta^vt, su^ellent zů samen sitzen ze Kirchein in der stat vnd da hilff anlegen vnd scho^eppfen na^vch dem, alz denn die sach an ir selber gestalt ist, vnd wie oder waz hilff si da gemainlich oder mit dem merern tail vff ir aide scho^epfent erkennent oder ze ra^vt werdent, mit der selben hilff su^ellen o^vch wir dem selben tail, den daz an ga^vt, getru^ewlich zů ziehen beraten vnd beholffen sin ze gelicher wise, alz ob daz vnsers selbs sach wa^er vnd vns selber wideruarn vnd beschehen wa^er, a^vn all geuerde, alz lang, biz daz so^elich sach gentzlich erobert vnd vzzgetragen wirt, a^vn all geuerde, oder aber so lang, ob der clagent tail so^elich hilff so lang haben wo^elt, biz sich die vorgenanten nu^en man, die so^elich hilff gescho^epft netten, gemainlich oder mit dem merern tail vnder in ze ra^vt werdent vnd sich vff ir ayde erkennent, daz vmb so^elich sach genůg beschenhen sye, daz o^vch denn div hilff vnd der zog ain ende habe, vnd wedern tail vnder den vorgenanten stetten dez pundes vnd vnsers herren von O^esterrich daz an gieng, den selben tail mu^egen wir wol manen vmb sin vier man vnd die o^vch der selb tail denn vnuerzogenlich in aller der wise, so vorgeschriben sta^vt, gen Kirchein in die stat schiken su^ellen vnd zů den su^ellen wir vnser fu^enf man o^vch setzen, also daz die selben nu^en man mit namen dar vmb zů samen kumen su^ellen vnd sich vmb die sach erkennen vnd der ain end geben, alz vorgeschriben sta^vt. Wa^er aber, daz baid vorgenanten tail vns vmb hilff ze ma^vl mit einander zůsprechen vnd manen wu^erden, so su^ellen wir vnser fu^enf man zů iegliches tails vier mannen besunder vnd na^vch einander setzen gen Kirchein in die stat, ez wa^ere denn, daz wir tail all dri ainhelleclich dez miteinander v^eberkemen, daz wir zůsamen sitzen wo^elten, vnd waz sich da ieglich nu^en man besunder gemainlich oder mit dem merern tail vff ir ere vnd ayde erkanten oder nach gelegenhait so^elicher sach hilff schapften oder ob wir all willeclich by einander gesezzen wa^eren, also su^ellen wir baiden tailn aber zů ziehen vnd beholffen sin in aller der wise, so vor geschriben sta^vt, a^vn all geverde, vnd von wederm tail wir vor gemant werden, ez gescha^ech von baiden oder dem ainen tail, e daz wir si gemant hetten, dem oder den selben tailn sullen wir vnser volk zů schiken vnd senden, ob wir dar nach wol ze schaffent gewu^ennen, also daz mit namen div erste manung alweg vor ga^vn sol, ez wa^ere denn, daz sich die nu^en oder ir der merer tail vff ir ere vnd aide erkanten, daz man mit so^elicher hilff zů baiden sachen gehelffen vnd getůn mo^echt, daz sol och man denn tůn baiden tailn a^vn all widerrede nach erkantnu^est der selben nu^en oder ir dez merern tails a^vn all geuerde. Wa^er aber, daz so^elich infall vnd angriff mit mort mit prant mit ro^vp oder mit vnrehtem widersagen in vnsern landen vnd kraissen bescha^ehen an gotzhu^esern oder an gaistlichen lu^eten an bilgrin an gesten an lantfarern oder an ko^vfflu^eten, da su^ellen wir zů frischer geta^vt zů tu^en mit nach ylen mit zů schrien, alz daz vorgeschriben sta^vt. Mo^echt aber daz ze frischer geta^vt nit vzzgetragen werden, so su^ellen wir, ob daz in vnsern landen bescha^ehe oder dez ersten dar vmb angeru^eft wu^erden, baiden oder dem ainen tail der vorgenanten stett vnd vnsers herren von O^esterrich dar vmb zů sprechen vnd manen na^vch gelegenhait so^elicher sach, also daz alweg der tail, by dem oder in dez landen vnd gebieten so^elich sach bescha^ehen, die andern tail dar vmb manen sol, ob der selb tail daz ainig nit erobern mo^echt, vnd sullen wir denn, ob wir in also zůgesprochen hetten, vnser vier man zů der oder dez tails fu^enf man, die wir gemant hetten, setzen in so^elicher zit, alz vorgeschriben sta^vt, vnd an die stett, alz daz ir buntbrief wisent vnd sagent, die si vns gegeben habent, vnd waz hilff die selben nu^en oder ir der merer tail zů so^elichen sachen scho^epfent, also su^ellen wir vnd si zů ziehen vnd helffen a^vn all geuerde vnd in der wise, alz vorgeschriben ist. Ez su^ellen och baid tail der obgenanten stett dez pundes vnd vnser herr von O^estenrich vnd die irn gen vns vnd gen den vnsern vnd wir vnd die vnsern hin wider vmb gen in vnd die iren ieglicher tail besunder beliben by ir stiller geru^eweter nutzlicher gewer, alz si die biz vff disen hu^etigen tag inn gehebt her braht genozzen vnd besezzen habent, a^vn all geuerde. Aber vmbe daz, daz diz fru^entschaft vnd verbu^entnu^est dest fru^entlicher gehalten vnd dest minder zwaiung vnd vnwillens in ziten diser verbuntnu^est vff erstande, so haben wir egenanter graue Eberhart von Wirtenberg vnd die geselleschaften fu^er vns vnd die vnsern vns dez rehten gen den egenanten stetten dez pundes verpfliht vnd verbunden, vzz genomen allain der von Ro^vtenburg vff der Tuber, die daz reht nit an ru^eren so^el vnd by ir stat fryhait beliben su^ellen. Also wa^er, daz die vorgenanten stett dez pundes ir burger oder ir armen lu^et oder ieman, die zů in geho^erent, ihtsit nu fu^erbaz mer an vnser dez vorgenanten von Wirtenberg oder geselleschaften diener ritter oder kneht, die zů vns geho^erent oder kain ir stett burger oder arm lu^et, ir wa^er ainer oder mer, ze sprechent gewu^ennen vnd die in gemuroten gerihten gesezzen wa^eren, war vmb daz wa^er, dar vmb su^ellen si vnd die irn vns vnd den vnsern, die zu vns geho^erent, na^vch varn in die selben vnser stett vnd da reht von den vnsern sůchen vnd nemen vor vnsern amptlu^eten vnd schulthaissen vnd och sich dez da von den vnsern oder waz in da mit vrtail vnd mit dem rehten ertailt wirt, benu^egen la^vzzen a^vn all geuerde, vnd doch also, daz wir der vorgenante von Wirtenberg vnd die geselleschaften vnd die vnsern schaffen vnd bestellen su^ellen, daz in vnd den irn in den selben vnsern stetten furderlich geriht vnd reht nit verzogen werd an all geuerde. Wa^er aber, daz die vorgenanten stett dez pundes oder ir burger vnd arm lu^et vnd die zů in geho^erent ihtsit an vnser dez vorgenanten von Wirtenberg vnd die geselleschaften vnser diener oder vnser stett burger oder armen lu^eten, die zů vns geho^erent, ze sprechent gewu^ennen, die in ma^ergten in do^erffern in wilern oder in ho^efen gesezzen wa^eren, dar vmb su^ellen sich die obgenanten stett dez pundes vnd die irn, die zů in geho^erent, alz vorgeschriben sta^vt, gen den selben mit dem rehten halten, alz daz ieglichiv stat gen irn na^vchgeburn oder gen den, den sie oder die irn zů zesprechent hetten, von alter oder mit gewonhait herbraht ha^vt, a^vn all geuerde. Wa^er aber, daz die vorgenanten stett dez pundes ir ain oder mer ihtsit nu fu^erbaz mer in zitte diser verainung mit vnser dez vorgenanten von Wirtenberg diener, ez wa^eren herren ritter oder kneht, oder zů vnsern oder vnser diener gantzen stetten oder zů den ho^vptlu^eten der vorgenanten drier geselleschaften oder zů dehain den herren ritter oder knehten, die dar inne sint, zů in selb oder zů dehain ir dienern oder gantzen stetten vnd daz o^vch ain gantz stat an gieng, ze schaffent gewu^ennen vmb sach, die nu fu^erbaz mer bescha^ehen, dar vmb su^ellen die selben stett vnd die irn zů ainem gemainen man nemen ainen vzzer den vorgenanten fu^enfen, die von vnsern vnd der vorgenanten geselleschaften benempt sint, weihen si wellen in so^elicher beschaidenhait, wa^er daz man vnser dez vorgenanten von Wirtenberg vnd der geselleschaften dienern oder stetten zů sprechen wu^erd, so su^ellen si der ainen zů ainem gemainen man nemen vzzer den vorgenanten vnsern ra^eten mit namen graue Růdolf von Sultz oder Hainrich Truhsezzen vnsern hofmaister, weihen si vnder den zwain wellent. Wa^er aber, daz man den, die in der Lo^ewen geselleschaft sint, zů sprechen wo^elt, so sol man zů ainem gemainen man nemen her Gebharten von Rechberg. Wa^er aber, daz man den, die in der Wilhelmer geselleschaft sint, zů sprechen wo^elt, so sol man zů ainem gemainen man nemen her Wilhelm von Rechberg von Hohenrechberg, wa^er aber, daz die vorgenanten stett dez pundes, vzz genomen Rotenburg der stat vff der Tuber, der geselleschaft mit sant Georien zů sprechen wu^erden, so su^ellen si zů ainem gemainen man nemen her Hainrich den schenken von Gyren, vnd also su^ellen in vnser dez vorgenanten von Wirtenberg diener vnd gantz stett vnd all die vorgenanten herren ritter oder kneht der drier geselleschaften vnd alle ir diener vnd gantz stett, zů welhelm oder welher si denn zůsprechent hetten, rehtz gestatten vnd wideruarn la^vzzen vff der selben gemain man ainen vnd vff die schidlu^et, die denn von baiden tailn dar zů gesetzt werdent, in ainer ander vnser oder vnser diener stett oder an ainer gelegnen stetten, die in denn der gemain man dar zů benempt vnd beschaidet vnd die dem herren ritter oder kneht oder der statt, die man ansprechen wil, aller gelegenlichest ist, vnd doch mit vzzgenomen worten, daz man vns noch dehainen vnsern dienern noch die in den vorgenanten dri geselleschaften sint, die grauen oder fryen sint, vmb dehain ir herschaft noch lande noch dehain vnsern noch den irn gantzen stetten vmb kain aigenschaft vmb pfantschaft noch vmb kain ir stat noch kain eha^vffty nit zůsprechen sol, vnd och aber also, wa^er, ob entweder tail in aucht oder in banne wa^er, daz daz an dem rehten gentzlich stilligen vnd entwederm tail zů dem rehten nit schaden sol in dehainen weg an all geuerde, vnd su^ellen o^vch mit namen die gemain, die also genomen werdent, die sach versorgen by dem ayde, den ieglich besunder dar vmb gesworn ha^vt, vnd o^vch daz reht vff den ayde sprechen vnd och nach dem, alz ez eruordert wirt, in den na^echsten viertzehen tagen ainen vzztrag geben a^vn all geuerde, alz vorgeschriben sta^vt. Wa^er aber, daz die vorgenanten stett dez pundes oder ir burger alder die im, die zů in geho^erent, ir ainer oder mer, ihtsit an vns die vorgenanten von Wirtenberg selber baide oder den ainen in ziten diser verbuntnu^est zůsprechent gewu^ennen vmb sach, die nu fu^erbaz bescha^ehen, darvmb su^ellen wir ainen gemainen man nemen vzzer der fu^enf mannen, die vzzer den stetten benempt sint, vnd dar zů vnder Cůnrat dem Zapf von Winpfen vnd Cůnrat Bissern von Dinkelspu^ehel, welhen wir vnder den siben wellen vnd die dem tail, der vns zůsprechen wil, aller gelegenlichost ist oder von iren wegen benempt ist, vnd zů dem selben su^ellen wir zwen schidman setzen vnd der oder die, die vns an sprechen wellent, o^vch zwen, vnd erkennent sich die fu^enf nach vnser baider tail clag vnd widerrede gemainlich oder mit dem merern tail, daz man vns von so^elicher sach wegen nit zů sprechen so^el, dez su^ellen wir geniessen vnd o^vch da by beliben, erkanten sich aber die, daz so^elich sach alz redlich wa^eren, daz wir in mit vnser selbes liben billich reht hielten, daz su^eln o^vch wir denn tůn vnd in reht halten vff der vorgenanten mann ainen vzzer vnserm ra^vt an so^elichen stetten vnd in aller der wise, alz daz vor vnderschaiden ist, a^vn all geuerde, vnd doch also, daz man vns vmb kain vnser herschaft noch lande nit zůsprechen sol, alz vorgeschriben sta^vt. Vnd dez gelichen su^ellen wir die vorgenanten von Wirtenberg vnd die geselleschaften vnser diener vnd stett vnd die zů vns geho^erent, vns dez rehten von den vorgenanten stetten dez pundes vnd den iren benu^egen la^vzzen an den stetten vnd vff die gemainen, alz daz in irem buntbrief, den si vns besigelt ha^vnt, volkomenlich begriffen ist, a^vn all geuerde. Wa^er aber sach, daz von vnserm vnd der egenanten zwaier tail der stett dez pundes vnd vnsers herren von O^estenrich sto^ezz wu^erden vmb an gefa^ellen vnd an erstorbeniv gůt vnd die entweder tail in gewer herbraht hett, die su^ellen berehtet werden in so^elicher ma^vzz, wa^er daz der aberstorben, von dem daz gůt gefallen wa^er, ain burger wa^er gewesen, so su^ellen die, die nach dem gůt sprechent, daz berehten in der stat, da der abgegangen burger gewesen ist vnd nach der selben stat reht, wa^er daz der ab erstorben, von dem daz gůt gefallen wa^er, kain burger gewesen vnd hie vzz vff dem lande gesezzen, so su^ellen die, die nach dem gůt sprechent, daz berehten hie vzz vff dem lande vnd vff der gemainen mann ainen in dem tail, vzz dez tail der ist, der na^vch dem gůt spricht vnd der den sachen aller best gesezzen ist, an so^elichen gelegnen stetten, die in denn der gemain man dar zů benempt vnd beschaidet, a^vn all geuerde. Wir haben o^vch besunder in diser verbu^entnu^est den stetten dez pundes in Franken vnd den iren gen vns der vorgenanten geselleschaft mit sant Georien vnd gen den vnsern vnd vnsern armen lu^eten vnd o^vch vnser der selben geselleschaft vnd den vnsern gen den vorgenanten stetten dez pundes in Franken vnd den irn vnd iren armen luten daz mit namen vzzgesetzt vnd behalten, waz wir mit einander oder gen einander ze sprechent oder ze schaffent hetten oder gewu^ennen in ziten diser verbuntnu^est, daz wir daz baidenthalb mit fru^entlichem rehten gen einander vzztragen vnd o^vch dez einander gestatten vnd halten su^ellen an den stetten, alz ez von alter biz her kumen ist, nach dez selben landes gewonhaiten vnd rehten, a^vn all geuerde, vnd also su^ellen wir die vorgenanten von Wirtenberg vnd die geselleschaften mit namen bestellen vnd verkumen, so wir beste mu^egen, a^vn all geuerde, daz wir noch kain der vnser, die zů vns geho^erent, niemann von den vorgenanten zwain tailn der egenanten stett dez pundes vnd vnsers herren von O^estenrich noch der iren vnd die zů in geho^erent irs gůtz, daz denn ieglicher in stiller gerůweter nu^etzlicher gewer inn ha^vt, a^vne reht nit entwern noch niemen noch daz dehain v^ebergriff dar v^eber a^vn reht von vns oder den vnsern nit beschenhen, vnd wa daz dar v^eber von vns oder den vnsern bescha^ehe, so su^ellen wir daz vnuerzogenlich vnd a^vn all geuerde schaffen widerkert vnd widerta^vn, vnd daz wir vnd die vnsern dar na^vch zů dem rehten kumen na^vch der puntbrieff lut vnd sag, die wir vnd die vorgenanten stett dez pundes vnd vnser herr von O^estenrich einander zů allen dri tailn besigelt vnd gegeben haben, a^vn all geuerde. Wa^er aber, daz wir ainig an baider oder dez ainen tails der vorgenanten stett vnd vnsers herren von O^estenrich hilff daz nit geschaffen erobern noch vzzgetragen mo^echten, so su^eln vnd mu^egen wir wol baiden oder dem ainen tail dar vmb zů sprechen vnd vmb hilff manen, so su^ellen denn ieglicher der selben tail ir fu^enf man beschiken vnd besenden an die stett, die dar zů beschaiden sint nach der puntbrief lut vnd sag, die si vns dar vmb gegeben ha^vnt, vnd su^ellen wir zů ieglichem der selben tail vnser vier man setzen vnd geben, vnd wie sich die nu^en ir ieglichs der zwaier tail gemainlich oder mit dem merern taile erkennent oder dar zů hilff scho^epfent, also su^eln si vnd wir zů ziehen vnd beholffen sin alz lang, biz daz widerkert wirt oder aber biz sich die selben nu^en gemainlich oder mit dem merern tail erkennent, daz von solicher sach wegen genůg beschenhen si, a^vn all geuerde, doch vzzgenomen aller verbriefter schuld vnd vnlogenba^vr gu^elt, vnd vmb hůbgelt vogtreht stu^eren vnd zinse sol iederman vnd allermenglich alliv siniv reht behalten vnd vzzgesetzt sin, alz daz von alter biz her kumen ist a^vn alle geuerde, denne so verre vnd allain dez vzzgesetzt, waz der vorgenant vnser herr von O^estenrich oder sin vordem schuld oder ga^ebe vmb dienst verhaizzen oder verschriben hant, daz wir nieman weder ze diener in vnser geselleschaften noch ze burger in nemen noch empfahen su^ellen, alle die wil diser bunt wert, dem wir dar vmb gen in bra^vten oder beholffen sien oder in oder die sinen dar vmb dehains weges no^eten oder pfenden, wan er mit namen daz gen vns verta^edingt vnd verdingt ha^vt, aber vmb ander schuld vnd die im gelihen sint, su^ellen iedermann siniv reht behalten sin, alz im daz denn verschriben vnd verhaizzen ist, a^vn all geuerde. Wir vorgenanten von Wirtenberg vnd die geselleschaften vnd dehain vnser diener noch stett su^ellen o^vch von aneuang diser verainung gemainlich noch vnser kainer besunder, alz lange diz buntnu^est weren sol vnd gemacht ist, alz vorgeschoben sta^vt, kainem burger vnd daz die vorgenanten zwen tail der stett dez pundes noch vnsers herren von O^estenrich oder die irn an ru^eret, in nemen noch empfahen, denn die sich hus vnd ha^eblich in die selben statt setzen vnd ziehen, da si burger worden sint. Wa^er aber, daz der kainer, die also ze burger empfangen wa^eren, iren herren vorhin versworn oder verbu^erget hetten, dez mo^ehten si die selben herren wol in dez ersten jars frist vngeuerlich von dem tag, alz die burger worden sint, in der stat, da si burger worden wa^eren, der sach v^eber kumen mit langericht briefen oder aber mit briefen, dar an zwen erber vnuersprochen man, die wapens geno^vzz wa^vren, pfaffen oder layen, ir insigel gehenkt hetten, die daz seiten vff ir aide, daz in daz kunt vnd wizzent wa^er. Hetten aber der oder so^elich ir herren nit brief, wa^er ez denn ain fu^erst graue oder fry, der daz vzzbringen wo^elt, der mag daz wol vzz bringen mit sinem amptman, der dez sweren sol zů den hailigen, vnd zů im zwen erber vnuersprochen manne, doch v^eber die der selb herr, dez amptman daz vzzbringen wil, nit ze gebietent hab oder die sin aigen nit sien noch die im weder ze geb noch ze gelt sitzen, vnd daz die o^vch sweren geleirt aide zů den hailigen, daz in daz kunt vnd wissent si, wo^elt aber ain ritter ain kneht oder ain ander man daz vzzbringen, der sol daz wisen mit sinem aide vnd aber zů im zwen erber vnuersprochen man o^vch mit irrn aiden, v^eber die er nit ze gebietent hett oder die sin aigen nit weren oder im ze geb noch ze gelt nit sezzen in der wise, alz vorgeschriben sta^vt, a^vn all geuerde. Vnd in welher vnser oder der geselleschaften oder diener stetten so^elich burger v^eberkomen wu^erden, alz vorgeschriben ist, div selb stat noch ir herr sol den fu^ero da vor, daz im anbehebt ist, nit schirmen in dehain wise, a^vn all geuerde, doch vzz genomen aller edler lu^et clo^ester vnd pfaffen, die mu^egen vnser vnser geselleschaften vnd diener stett wol ze burger in nemen vnd empfahen in so^elichen rehten, alz si von alter biz her geta^vn ha^vnt, a^vn all geuerde, vnd o^vch aber dez vzzgesetzt, ob daz wa^er, daz kain gebur in vnser oder in vnser diener vnd geselleschaften stetten burger wu^erd, ez wa^er in ir ainer oder mer, der kains herren oder stett burger, die zů den vorgenanten zwain tailn geho^erent, aigen wa^er gewesen vnd der selb gebur, ir wa^er ainer oder mer, ain aigen gůt hie vzz vff dem lande hett oder vff ains andern burgers aigen gůt gesezzen wa^er, der mag wol hie vzz sitzen vff dem lande in so^elicher beschaidenhait, wa^er daz er in dehains herren ritter oder knehtz oder stett burger diser verbu^entnu^est do^erffern gerihten zwingen oder bennen gesezzen wa^eren, daz er o^vch die selben geriht dorffreht eha^effti zwing vnd benn halt vnd och tů alz ander lu^et vor im vnd hinder im vngeuerlich vnd nach dem, alz daz selbe gůt von alter her komen ist, a^vn all geuerde. Wa^er och, daz ieman in vnsern oder in vnser diener oder geselleschaften stetten ainer oder mer burger wu^erd, der in ainer andern der vorgenanten zwaier tail der stett dez pundes oder vnsers herren von O^estenrich oder ir diener stetten gesezzen wa^er, der selbe sol sich in die selben stat, da er burger worden ist, setzen vnd ziehen, doch also, daz er dem herren oder der statt, dar vzz er denn zu^ehet, stu^eren gu^elt anzal vnd fra^efflinan vzz rihten sol, die si redlich vnd mit reht vff den oder die bringen mo^echten vngeuerlich, in dez ersten jars frist in der stat, da er hin gezogen wa^er, mit rihtern oder mit geswornen ra^eten vzz der stat, dannan er gezogen wa^er. O^vch su^ellen wir vorgenanten von Wirtenberg vnd die geselleschaften vnser diener vnd stett noch dehain der vnser der vorgenanten zwaier tail der stett dez pundes vnd vnsers herren von O^estenrich noch ir diener vnd stett vnd die zů in geho^erent viend nit halten weder husen noch hofen weder spisen a^essen noch trenken noch geua^erlich hin schieben in dehain wise a^vn all geuerde. Dar zů haben wir baiden vorgenanten tailen versprochen vnd verhaizzen, wa^er ob si baid oder der ain tail mit iemann ze kriege kemen, daz wir noch vnser diener noch die vnsern, die zů vns geho^erent, vns kain ir viend schlozz vestinen stett oder gu^eter, alle die wile der krieg werot vnd o^vch in ziten diz verbundes, geua^erlich durch schirmes willen nit vnderziehen noch in nemen su^ellen noch in kain wise a^vn all geuerde, ez wa^ere denn, daz wir vnd die vnsern so^elich schlozz vestinen stett oder gu^eter vngeuerlich vnd durch kaines schirmes willen mit geliger mit stu^ermen oder sust mit werender hande den vienden abgebrechen vnd abgeno^eten mo^echten a^vn all geuerde. Wa^er o^vch, daz wir vnd die vorgenanten stett dez pundes vnd vnsers herren von O^estenrich an baiden tailn mit ieman ze krieg kemen in ziten diz verbundes vnd von der vorgeschriben artikel wegen, wer der wa^er, vnd daz der krieg in der zit, alz diser punt weren sol, nit vzz getragen wu^erd vnd dar vmb doch vorhin vnd e daz diser punt ain ende hett, gemant wa^er, so su^ellen wir vnd o^vch die zwen tail der egenanten stett dez pundes vnd vnsers herren von O^estenrich einander na^vch diser verbuntnu^est vzzgang dennoht beholffen sin alz lang, biz na^vch erkantnu^est der nu^enen oder ir des merern tails, die von dem klagenden vnd von dem helfenden tail dar zů gesetzt werden, dar zů geschiht, alz sich die selben dar vmb erkent hetten, daz dar zů genůg geholffen vnd geta^vn sy, an all geuerde. Wa^er o^vch sach, daz man in dirr zit, alz diser punt weren sol, geliger oder gesezzes vor ainer statt vestin oder schlozz ainost oder mer bedu^erffent wu^erd oder ha^vn mu^est, bescha^ehen denn so^elich geliger vns vorgenanten von Wirtenberg vnd den geselleschaften vnd den vnsern ze dienst vnd ze lieby vnd von vnsern wegen, so su^ellen wir, waz cost oder schadens dar v^eber gieng vnd wahsent wu^erd von gezu^eges wegen, dar geben vnd vzzrihten den vorgenanten stetten dez pundes vnd vnserm herren von O^estenrich an baiden tailn a^vn schaden, doch also, daz si vns ir werklu^et vnd irn gezu^ege lihen su^ellent an all widerrede vnd den wir in iren schlozzen vnd stetten holen vnd wider dar in antwu^erten su^ellen mit v^enser aigner cost a^vn all geuerde. Vnd waz o^vch man stett vestinen oder schlozz gewu^enne, so der zoge vnser der vorgenanten von Wirtenberg oder der geselleschaften wa^er vnd von vnsern wegen dannan gieng vnd ob in den selben schlozzen iht gefangen wu^erden, mit den selben schlossen vnd gefangen mu^egen wir leben vnd tůn, wie wir wellen, also daz die vorgenanten stett dez pundes noch vnser herr von O^estenrich von baiden tailn vns dar an nihtsit sullen noch mu^egen irren engen noch gedrengen in dehainen weg, doch also daz wir mit namen versorgen su^ellen, daz den obgenanten stetten dez pundes vnserm herren von O^estenrich noch den iren von den selben schlossen vnd gefangen dehain schad dar vmb mer vff erstande noch wideruar a^vn alle geuerde, vnd dez gelichen sol den obgenanten stetten dez pundes vnd vnserm herren von O^estenrich an baiden tailn, von welhes tails wegen daz bescha^ehe, her wider vmb o^vch reht sin. Bescha^ehen aber so^elichiv geliger von baiden tailn den egenanten stetten dez pundes vnd vnsers herren von O^estenrich vnd o^vch von vns vorgenanten von Wirtenberg vnd geselleschaften von der tail aller drier gemaines nutzes wegen vnd mit gemainem ra^vt, so su^ellen wir die selben tail alle dri den schaden vnd die cost, die von gezu^eg vnd werklu^et wegen dar v^eber giengen vnd wahsen wu^erde, gemainlich mit einander dar lihen vzzrihten vnd bezaln vnd o^vch den nutz vnd den fromen an schlossen vnd gefangen, alz vorgeschriben sta^vt, o^vch mit einander niessen vnd haben, also daz ieglichs tail ain drittail dar an tragen vnd nemen sol a^vn all geuerde, vnd alz balde der zoge vnd div raise ain ende nimpt, so sullen herren vnd stett in ainem monat dem na^echsten dar nach ze samen kumen oder ir ra^et mit maht schiken gen Vlm in die statt vnd su^ellen die cost von dez gezu^eges vnd der werklu^et wegen da an legen vnd in ainem monat dem na^echsten dar nach bezaln a^vn allez verziehen vnd a^vn all geuerde. Ez su^ellen och alle vnser vorgenanten von Wirtenberg baider vnd o^vch der geselleschaft diener vnd die diz pundes geniezzen wellent, ez sien herren ritter oder kneht, vnd dar zů all vnser vo^egt vnd amptlu^et, si sien in stetten vff bu^ergen in do^erffern oder in wylern, disen punt o^vch swern mit gelerten worten zů den hailigen vnd o^vch mit namen die lu^et, die von vnserm tail ietzo zů gemainen lu^eten zů dem rehten vnd vmb erkantnu^est der hilff benempt vnd geordenot sint, alz vorgeschriben sta^vt, das o^vch sweren daz allez ze halten vnd ze vollfu^eren vngeuerlich na^vch der verbuntnu^est brief sag, die dar v^eber geben sint, vnd wenn ir ainer da haim nit wa^er, ander, die denn an siner stat wa^eren oder den er sin stat empfolhen hett, vnd alz dik o^vch der selben gemainer man ainer oder der vo^egt vnd amptlu^et ainer oder mer abgieng entsetzt wu^erd oder in landes nit enwa^er, so su^ellen wir allweg ainen oder ander an der selben statt in ainem monat dem na^echsten dar nach setzen vnd geben, so wir dar vmb gemant werden, a^vn alles verziehen vnd a^vn all geuerde, vnd sunderlich ob der gemainer lu^et kainer, die wir vmb erkantnu^est der hilff vnd zů dem rehten benempt vnd geordenet haben, alz vorgeschriben sta^vt, ainer oder mer in der wile ab giengen, su^ellen wir alweg ainen oder ander alz schidlich von dem tail, der abgangen wa^er, mit irem gůten willen vnd wizzen in dem na^echsten monat na^vch dem, so daz an vns eruordert wirt, setzen vnd an ir stat geben a^vn all geuerde, daz selb, wenn oder alz dik der gemainer mann ainer oder mer, die vns von baiden vorgenanten tailn der stett dez pundes vnd vnsers herren von O^estenrich zů dem rehten oder zů erkantnu^est der hilff abgiengen, so su^ellen si vns allweg in ainem monat dem na^echsten dar na^vch, so daz an si eruordert wirt, ainen oder ander alz schidlich mit namen die stett dez pundes vzzer iren ra^eten vnd der oder an dez selben statt, in der riuieren der abgegangen wa^er, mit vnserm wizzen vnd gůten willen o^vch setzen vnd geben a^vn all geuerde. Och su^ellen vnd mu^egen wir vorgenanten von Wirtenberg vnd die geselleschaften in ziten diz verbundes wol ritter vnd kneht ze diener vnd in vnser geselleschaft vnd vnser stett ze burger in nemen vnd empfahen, vnd die vorgenanten stett dez pundes mu^egen die o^vch wol ze burger in nemen, vnd der vorgenant vnser herr von O^estenrich o^vch ze diener oder sin stett mu^egen die o^vch wol ze burger in nemen vnd empfahen. Vnd die in den vorgenanten riuieren vnd kraissen gesezzen sint vnd wen wir also ze diener oder in vnser gesellschaft(en) vnd vnser stett ze burger oder baid vorgenant tail ze diener vnd ze burger in nemen vnd empfiengen, den sol diser punt o^vch schirmen vnd beholffen sin, also daz die selben o^vch sweren gelert ayde zů den hailigen, diz puntnu^est ze halten vnd ze laiten^b) a^vn all geuerde, doch also, daz weder wir noch sy nu fu^erbaz mer niemann ze diener noch in vnser geselleschaft(en) noch ze burger in nemen noch empfahen su^ellen, den wir vff allen dri tailn kainer alter sach, die er ze schaffent ha^vt gehabt vor dem tag, alz er diener in die geselleschaft oder burger worden wa^er, beholffen sin in dehain wise a^vn all geuerde. Dar zů su^ellen mit namen weder wir noch die zwen tail der vorgenanten stett dez pundes vnd vnsers herren von O^estenrich der tail aller kainer kainen ffu^ersten grauen noch andern grossen herren oder byschoff in disen punt nit in nemen denn in so^elicher beschaidenhait, welher tail die in nemen wo^elt vnd die doch in den vorgeschriben kraissen gesezzen wa^eren, der selbe tail sol vier man vnd die andern tailn fu^enf man dar zů setzen vnd geben, vnd bekennent sich die selben nu^en oder ir der merer tail, daz der oder die in ze nemen syen oder nit oder wie man sich dar inne halten su^elle, da by sol ez o^vch beliben a^vn all geuerde. Dar zů ist sunderlich mer berett, welher vnser vorgenanten von Wirtenberg vnd der geselleschaften aller drier diener oder die in den geselleschaften wa^eren, disen punt nit swu^eren oder sweren wo^elten, si wa^eren herren ritter oder kneht, daz o^vch die diser punt nit schirmen sol noch weder herren noch stett diz pundes nihtsit gebunden su^ellen sin ze helffen in dehainen wege, vnd su^ellen wir die andern herren vnd stett von allen dri tailn diz verbundes einander gen dem oder gen den selben beholffen sin, ob si der tail kainen wider diz vorgeschriben artikel angriffen oder ta^eten. Ez ist o^vch dar in mer gerett, ob daz wa^er, daz der herren ritter oder kneht kainer, die in der Lo^ewen geselleschaft sint, wenn ir buntnust nu vff die na^echsten wihenna^echten vzzga^vt, fu^erbaz nit lenger dar inn sin oder die puntnu^est fu^erbaz halten wo^elt, daz der oder die wol dar vzz kumen mu^egen, alz verre daz wir die hoptlu^et der Lo^ewen geselleschaft den andern zwain tailn die verku^enden su^ellen, vnd den selben sol man fu^erbaz o^vch nihtsit mer gebunden sin ze helffen, ez wa^er denn, daz er in diser verbuntnu^est gern lenger beliben wo^elt oder vnser ald der vorgenanten stett dez pundes oder vnsers herren von O^estenrich diener oder die irn oder vnsern stetten burger wu^erd, so sol im diz verbuntnu^est fu^erbaz wol beholffen sin. Wir vorgenanten von Wirtenberg vnd wir die geselleschaften vnd all vnser diener vnd stett vnd alle die vnsern gemainlich vnd o^vch besunder su^ellen beliben by allen vnsern fryhaiten briefen rehten vnd gůten gewonhaiten, die wir vnd si von Ro^emischen kaysern vnd ku^engen haben vnd vntz herbraht haben, a^vn all geuerde, vzz genomen allain der stuk vnd der artikel, der wir vns hie vor an disem brief verschriben haben die zit diz verbundes, alz lang div weren sol, doch vnscha^edlich den briefen, die wir die vorgenanten von Wirtenberg vnd div statt ze Esslingen gen einander haben. Vnd also haben wir vorgenanter graue Eberhart von Wirtenberg vnd wir graue V^olrich von Wirtenberg sin sun vnd wir die ho^vptlu^et der vorgeschriben geselleschaften aller drier vnd alle herren ritter vnd kneht, die dar inn sint, all vnbezwungenlich gesworn geleirt ayd zů den hailigen mit vff gebotten vingern, all vorgeschriben sach wa^vr vnd sta^et ze halten ze laisten vnd ze vollfu^eren a^vn all geuerd na^vch dizz briefs sag. Doch so nemen wir vorgenanten von Wirtenberg baide vnd die vorgenanten geselleschaften mit einander vzz vnsern herren den Ro^emischen ku^eng vnd daz hailig rych, die herren von Bayern gemainlich, den byschoff von Mentz, zů den wir vorgenanten von Wirtenberg verbunden sien. Dar zů nemen wir vorgenanten von Wirtenberg baid vnd die geselleschaft mit dem Lo^ewen besunder vzz die geselleschaft mit dem Lo^ewen an dem Ryn, ze Nyderlant, ze Elsa^ezz vnd ze Brisgo^ew vnd die vnder die selben ho^vptlu^et vnd geselleschaften geho^erent. Dar zů nemen wir div geselleschaft mit sant Georien o^vch besunder vzz den byschoff von Wirtzburg², den byschoff von Babenberg³ vnd den burgrauen von Nu^erenberg, vnd doch also, wa^er ob der herren kainer, die wir sunder vzz genomen haben, den zwain tailn der vorgenanten stett dez pundes oder vnsers herren von O^estenrich vnd den iren wider diz vorgeschriben artikel angriffen oder ta^eten, daz denn wir die andern, die den oder die selben nit vzz genomen hetten, in gen den su^ellen beholffen sin a^vn all geua^erde. Vnd dez allez zů warem vrku^ende geben wir der vorgenant graue Eberhart von Wirtenberg vnd wir graue V^olrich von Wirtenberg sin sun vnd wir die egenanten dri geselleschaften den zwain tailn der vorgenanten stett dez pundes vnd vnserm herren von O^estenrich disen brief besigelt mit vnser vorgenanten von Wirtenberg baider aygen insigeln vnd mit der vorgenanten drier geselleschaften anhangenden insigeln. Der geben ist an der na^echsten mitwoch na^vch dem hailigen o^vster tage, do man zalt von Cristz gebu^ert dru^etzehenhundert jar vnd darna^vch in dem zwai vnd ahtzigostem jare.

Source Fulltext: Chartularium Sangallense X, Nr. 5898, S. 30-41.