Wir^a) die stette Regenspurg vnd ouch dez hailigen Ro^emischen richs stette Auspurg, Vlm, Costentz, Eszlingen, Rútlingen, Rotwil, Wile, V´berlingen, Memmingen, Bibrach, Ravenspurg, Lindo^vwe, sant Gallen, Pfullendorff, Kemptvn, Koufbúrren, Livtkirch, Ysni, Wangen, Rotenburg vff der Tuber, No^erdlingen, Dinkelspúhel, Halle, Gemv´nde, Hailprunen, Winpfen, Giengen, Winsperg, Bopfingen, Aulon, || Bůchorn, Wile in Turgow^e vnd Bůchow^e, alz wir den bund mit ain ander halten zů Swaben, bekennen vns offenlich mit disem brieff vnd tu^en kunt allen den, die in ansehent oder ho^erent lesen, vmbe daz, daz alle redlich vnd gerecht sach gefurdert vnd gesterket vnd alle vnredlich vnd vngerecht sach nidergedruket vnd dez baz gewendet werden, dar vmbe vnd ouch daz alle pilgrin koufflu^et || kouffmanschatze lantfarer geste witwen waisen gotzhúser und ander gaistlich lut geschirmet werden vnd dez bas bi gemach beliben, so haben wir vns gar bera^vtenlich mit gůten fúrsa^etzen vnd rechter bekantnúß vnd besunderlich nach ra^vte aller v´nser rete vnd gůten frivnde got ze lob dem hailigen Ro^emischen rich ze nutze vnd ze eren v´ns selb vnd gemainem land zů frid vnd zů gemach zů || dem durchluchtigen hochgebornen fursten vnserm genedigen herren hertzog Liutpolt von gotz genaden hertzog ze O^esterrich ze Styr ze Ka^ernden vnd ze Krain grauf ze Tyrol vnd margrauff ze Tarfis etc. vnd zů sinen landen Elsa^eße Brisgow^e Sunggow^e Argow^e Turgow^e Kurwalhen vnd Swaben vnd sunderlich zů vnd mit der herrschafft ze Hochenberg vnd mit namen zů allen den stetten vestinan vnd schloßen, die in den selben landen gelegen sind vnd waz den selben landen zůgeho^ert, vnd ouch zů allen sinen lantvo^egten vnd dienern, ez sien herren ritter oder knecht, vnd die in den selben landen vnd kraißen geseßen oder wonhaft sind, an ainem tail vnd ouch zů den edlen hochgebornen herren grauff Eberharten von Wirtenberg vnd grauff V^olrich von Wirtenberg sinem sun vnd zů den ho^vptlúten der gesellschafft mit dem Leowen ze Swaben vnd die vnder diß ho^vptlut mit namen grauf Hainrich von Montfort herre ze Tettnang den vorgenanten grauf V^olrich von Wirtenberg vnd grauf Fridrich von Zolr von der Hochenzolrr geho^erent vnd ouch zů den ho^vptluten der gesellschafft mit sant Wilhalm vnd zů den ho^vptlúten der gesellschafft mit sant Go^eryen vnd ouch zů allen den herren rittern vnd knechten, die in den selben drin gesellschafftan sind vnd die gesellschafftan tragent, vnd ouch zů allen iren dienern stetten vnd schloßen vnd alz die in den riuieren vnd kraißen geseßen vnd gelegen sind von dem vrfar ze Spir envnt Rins vff gen Stra^vßburg vnd von Stra^vßburg vor dem gebirg vff gen Basel vnd von Basel envnt Rins vff gen Bregentz vnd von Bregentz vor dem gebirg bis gen Múnchen vnd von Múnchen bis gen Ingelstat vnd von Ingelstat bis gen Aichstetten vnd von Aichstetten bis gen Regenspurg vnd von Regenspurg bis gen Annberg vnd von Annberg bis gen Eger vnd von Eger bis gen Koburg vnd von Koburg bis gen Schwinfurt vnd von Schwinfurt bis gen Miltenberg vnd von Miltenberg bis gen Haidelberg vnd von Haidelberg wider bis gen Spir in daz vrfar an dem andern tail ietzo willeclich tugentlich vnd vnbetzwungenlich verstrikt verpflicht vnd verbunden haben vnd verbinden ouch v´ns mit krafft ditz brieffs mit gůten trúwen vnd geswornen aiden hinnan hin bis vff den obrosten tag ze wihennechten, der aller schierost komet, vnd dannan hin ain ja^vr daz nechste in getrvweclich allez daz ze halten ze laisten vnd ouch ze vollefu^eren, daz hie nach an disem brieff begriffen vnd verschriben sta^vt, a^vne alle arge liste vnd geverde. Bi dem ersten wa^ere, daz ieman, wer der wa^ere, den vorgenanten v´nsern herren von O^esterrich oder sin lantvo^egte oder diener vnd die disen bund her wider vmb ouch gen v´ns gesworen hant, ez wa^eren herren ritter oder knechte oder dehain ir stette burger oder arm lúte oder die vorgenanten vnser herren von Wirtenberg oder die ho^vptlúte der egenanten dryer gesellschafft oder dehain die herren ritter oder knechte, die dar inne sind oder dehain ir aller diener vnd die ouch disen bund gen v´ns gesworen ha^vnt oder dehain ir stette burger oder arm lúte in rivieren vnd kraißen, alz daz hie vor begriffen vnd verschriben ist vnd ouch in zite diser verbuntnúße angriff oder beschedigote mit mort mit brand mit roube oder mit vnrechtem widersagen, dez sullen vnd wellen wir obgenanten stett vnd die v´nsern in vnd den iren getrvweclich vor sin vnd ouch darzů bera^vten vnd beholffen sin, wenne oder alz balde wir daz innan oder gewar wúrden oder von in ald von den, den der selb schad widerfaren vnd beschechen wa^ere, dar vmb ermant wúrden ze frischer geta^vt mit nachylen mit geschray vnd ouch mit allen andern sachen, die darzů geho^erent, von ainem mittemtag bis an den andern ze gelicher wise, alz ob v´ns selb oder den v´nsern so^elicher schad widerfarn wa^ere, a^vne alle geverde. Wa^ere aber, daz so^elich sach also gestalt oder geschaffen wa^eren, daz si ze frischer geta^vt nit so^elten noch mo^echten erobert vnd vßgetragen werden, wa^ere ez denne, daz div sach den egenanten vnsern herren von O^esterrich oder die sinen, die zů sinem tail geho^erent, alz vorgeschriben sta^vt, ainig angieng, so sullen der oder die selben, den der schad widerfaren ist, die sach bringen mit clag an den vorgenanten vnsern herren von O^esterrich oder an sin lantvo^egte, ob er selb in lands nit wa^ere, vnd dunkt denne den selben vnsern herren von O^esterrich, ob er lands ist, bi sinen fúrstlichen gna^vden vnd trvwen vnd erkennet ouch sich dez mit sinen ra^eten oder sin lantvo^egt an siner stat, ob er selbs in land nit wa^ere, aber mit dez selben vnsers herren von O^esterrich ra^eten vieren oder mer den nechsten bi in, die si darzů gehaben múgen, vff ir aide, daz dem vnrecht beschechen si, so súllen vnd múgen si die sach bringen mit clag an v´ns vorgenanten stette dez bunds vnd ouch v´ns dar vff manen vmb hilff mit ir erber bottschafft vnd brieffen gen Vlm in die stat, so súllen wir in denne fúnfzig erber mit spießen ze roß wol erzivgter lúte a^vn geverde vff vnser selbs koste schaden vnd verlust schiken vnd senden an die stett, die si vns denne benempt vnd verkunt hetten, a^vne alle geverde, ez wa^ere denne, daz si mit willen gern midner volks von vns haben wo^elten, die súllen wir in ouch senden, vnd súllen ouch schaffen, daz die selben vnser spieß in den nechsten vierzehen tagen na^vch der ermanvng gentzclich von hus vßgeritten vnd geschaiden sien vnd ouch volleriten an die stet, die vns von in benempt vnd verkúnt sind a^vne alle geverde vnd die ouch in súllen gehorsam sin anzegriffen vnd ze beschadigen vnd mit den ouch si so^elich sach erobern sullen, so si best múgen, a^vne alle geverde. Gelicher wise gieng so^elich sach an die vorgenanten v´nser herren von Wirtenberg oder die gesellschafftan oder die iren vnd die zů dem selben tail geho^erent, alz vorgeschriben sta^vt, so súllen die, den so^elicher schad vnder in beschechen ist, die sach ouch bringen mit clag an die selben herren von Wirtenberg vnd an die ho^vptlut der gesellschafftan, vnd erkennent sich die denne ouch vff ir aide, daz dem vnrecht beschechen si, so sullen vnd múgen si die sach ouch bringen mit clag an v´ns vorgenante stett vnd vmb hilff manen, alz vorgeschriben stat, gen Vlm in die stat, vnd sullen wir in denne ouch fünfzig erber mit spießen schiken vnd senden an die stett, die v´ns denne benempt sind, in so^elicher frist vnd zilen vnd in allem dem rechten, so vorgeschriben ist, a^vne alle geverde, ez wa^ere denne, daz si ouch mit willen gern minder volks von vns haben wo^elten. Wa^ere aber, daz so^elich sach baid vorgenante tail ze ma^vl angend wurde, daz sullen si vns aber verkúnden gen Vlm in die stat, alz vorgeschriben ist, vnd súllen wir denne ieglichem tail besunder fúnfzig spieß schiken vnd senden an die stett vnd in aller der wise, so daz hie vor begriffen vnd verschriben ist, a^vne alle geverde, vnd sullen ouch mit namen baide taile der obgenanten fúrsten herren vnd gesellschafftan vnd die iren, welhem taile wir denne v´nser volk geschiket hetten, schaffen vnd bestellen, daz vnserm volk in iren stetten vnd schloßen, so in dar in gebúret ze ligen, redlicher vailer kouf vmb ir pfening vnd gelt geben werde ane alle geverde. Wa^ere aber, daz so^elich sach aber also geschaffen oder gestalt waren, daz ir ieglichs der zwaier taile der obgenanten fúrsten vnd herren die sach mit fúnfzig spießen nit erobern noch vßgetragen mo^echten vnd daz si baide oder der ain taile vnser hilff furbaz bedo^erfften, daz sol ieglichs tail vnder in, welhes daz denne angieng, vns stetten aber verkúnden gen Vlm in die stat vnd ouch dar vff manen vmb hilff, so súllen wir denne na^vch der selben ermanvng in den nechsten vierzehen tagen vngeva^erlich die funf man, daz sind Hans Gossenbrot von Augspurg, Lutz Krafft von Vlm, V^olrich Habich von Kostentz, Ytal Huntpis statamman ze Ravenspurg vnd Wernher Hurnbogen von Rútlingen, beschiken vnd besenden gen Vlm in die stat. Also wa^ere, daz die sach an gieng den vorgenanten vnsern herren von O^esterrich oder die zů sinem tail geho^erent, so sol er oder sin lantvo^egt an siner stat vier man vßer den funfen, daz ist her Walther von der Alten Klingen ain fryer herre zů disen ziten lantvogt dez vorgenanten v´nsers herren von O^esterrich, her Hans von Bodmen der alt, her Ludwig von Hornstain, her Mantz von Hornstain ritter und Hainrich von Randegg vogt ze Scha^vffhusen, welhe si denne dar vß wend oder aller best gehaben múgen, zů v´nsern funfen setzen vnd geben. Gieng ez aber die vorgenanten herren von Wirtenberg vnd die gesellschafftan an vnd die zů dem selben tail geho^erent, so súllen si zů den vorgenanten vnsern fúnf mannen vier man vßer den funfen, daz ist grauff Růdolff von Sulße, her Gebhart von Rechberg^b), her Wilhalm von Rechberg von Hochenrechberg, her Hainrich der schenk von Gyren vnd Hainrich truchsa^eße von Hefingen hofmaister dez vorgenanten vnsers herren von Wirtenberg, welhi si denne dar vß wend vnd aller best gehaben mugen, ouch setzen vnd geben, also daz alle wegen der clagent taile vier vnd der helffent tail funf da bi haben súllen, an welhem tail daz bescha^ech, vnd weders taile die sach also an gieng oder angend wúrde, dez selben tails vier man vnd vnser fúnf man, die darzů geordnet sind, alz vorgeschriben stat, súllen ze samen siezen ze Vlm in der stat vnd da hilff an legen vnd schepfen na^vch dem, alz denne div sach an ir selb gestalt ist, vnd wie oder waz hilff si da gemainlich oder mit dem merrentail vff ir aide schepfent erkennent oder ze ra^vt werdent, mit der selben hilff súllen ouch wir dem selben tail, den daz an ga^vt, getrvweclich zů ziehen bera^vten vnd beholffen sin ze gelicher wise, alz ob daz vnser selbs sach wa^ere vnd vns selb widerfaren vnd beschechen wa^ere, a^vne alle geverde, alz lang, bis daz so^elich sach genczclich erobert vnd vßgetragen wirt a^vne alle geverde, oder aber so lang, ob der clagent tail so^elich hilff so lang haben wo^elt, bis sich die vorgenanten nún man, die so^elich hilff geschepfet hetten, gemainlich oder mit dem merrentail vnder in ze ra^vt werdent vnd sich vff ir aide erkennent, daz vmb so^elich sach genůg beschechen si, daz ouch denne div hilff vnd der zog ain ende habe, vnd wedern taile vnder den vorgenanten fursten herren vnd gesellschafftan daz angieng, den selben tail mugen wir wol manen vmb sin vier man vnd die ouch der selb taile in aller der wise, so vorgeschriben sta^vt, senden sol gen Vlm in die stat, vnd zů den sullen wir vnser fúnf man ouch setzen, also daz die selben nún man mit namen dar vmb ze samen komen súllen vnd sich vmbe die sach erkennen vnd der ende geben, alz vorgeschriben sta^vt. Wa^ere aber, daz baid vorgenanten tail v´ns vmb hilff ze ma^vl mit ain ander zůsprechen vnd manen wúrden, so sullen wir vnser fúnf man zů ieglichs tail vier man besunder vnd na^vch ain ander setzen ze Vlm in die stat, ez wa^ere denne, daz wir tail alle dry ainhelleclich mit ain ander v´ber ain ko^emen, daz wir zesamen siezen wo^elten, vnd wez sich da ieglich nún man besunder gemainlich oder mit dem merren tail vff ir ere vnd aide erkanten oder nach gelegenhait so^elicher sach hilff schapfften oder ob wir alle willeclich bi ain ander geseßen wa^eren, also sullen wir baiden tailen aber zů ziehen vnd beholffen sin in aller der wise, so vorgeschriben sta^vt, a^vne alle geverde, vnd von wederm tail wir vorgemant werden, ez bescha^ech von baiden oder dem ainen tail, e daz wir si gemant hetten, dem oder den selben tailen sullen wir vnser volk zů schiken vnd senden, ob wir dar nach wol ze schaffen gewúnnen, also daz mit namen die erst manvng vor ga^vn sol, ez wa^ere denne, daz sich die núne oder ir der merrertail vff ir ere vnd aide erkanten, daz man mit so^elicher hilff zů baiden sachen geholffen vnd getůn mo^echt, daz sol o^vch man denne tůn baiden tailen a^vne alle widerrede na^vch erkantnuß der selben núnen oder ir dez merrentails a^vne alle geverde. Wa^ere aber, daz so^elich infa^elle oder angriff mit mort mit brand mit ro^vbe oder mit vnrechtem widersagen bi v´ns oder vmb v´ns beschachen an gesten an lantfarern an pilgrin an kouflúten an kouffmanschatz an gotzhúsern oder andern gaistlichen lúten, da sullen wir zů frischer geta^vt zů tůn mit naehylen mit zůschryen, allez daz vorgeschriben stat. Mo^echt aber daz ze frischer geta^vt nit vßgetragen werden, so súllen wir, ob daz bi v´ns bescha^eche oder dez ersten darvmb an geru^efft wúrden, baiden oder dem ainen tail der obgenanten fursten herren vnd gesellschafftan dar vmb zů sprechen vnd manen nach gelegenhait so^elicher sach, also daz allewegen daz taile, bi dem oder in dez landen vnd gebieten so^elich sach bescha^echen, die andern tail dar vmb manen sol, ob daz selb taile daz ainig nit erobern mo^echt, vnd súllen wir denne, ob wir in also zůgesprochen hetten, vnser vier man zů der oder dez tails fúnf man, die wir gemant hatten, setzen in so^elicher zite, alz vorgeschriben stat, vnd an die stette, alz daz ir bundbrieff wisen vnd sagent, die si v´ns gegeben ha^vnt, vnd waz hilff die selben núne oder ir der merrertail zů so^elichen sachen scho^epfent, also sullen wir vnd si zů ziehen vnd helffen a^vne alle geverde vnd in der wise, alz vorgeschriben ist. Ez súllen ouch baid taile der obgenanten fúrsten herren vnd gesellschafftan vnd die iren gen v´ns vnd den v´nsern vnd wir vnd die v´nsern hin wider vmb gen in vnd den iren ieglichs tail besunder beliben bi ir stiller gerúweter nutzlicher gewer, alz si die bis vff disen hivtigen tag inne gehebt herbracht genoßen vnd beseßen ha^vnt, a^vne alle geverde. Aber vmb daz, daz dis frivntschafft vnd verbuntnúß dez frivntlicher gehalten vnd dez minder zwayvng vnd vnwilles in zit diser verbuntnúße vfferstande, so haben wir egenanten stett alle v´ns dez rechten gen dem egenanten vnserm herren von O^esterrich vnd den sinen, die zů sinem tail geho^erent, verpflicht vnd verbunden, vßgenomen allain der von Rotenburg vff der Tuber, die daz recht nit an ru^eren sol vnd bi ir stat frihaiten beliben sullen. Also wa^ere, daz der vorgenant vnser herre von O^esterrich oder sin lantvo^eogt oder dehain sin diener, ez wa^eren herren ritter oder knechte oder die in zů geho^erent oder dehain ir stett burger oder arm lúte ichtzit nů fúrbaz mer an vnser vorgenanten stette burgern oder lúten ainem oder mer vnd die in gemureten gerichten geseßen wa^eren, ze sprechen gewúnnen, war vmbe daz wa^ere, dor vmb sullen si vnd die iren v´ns vnd den v´nsern nachfaren in die selben vnser stette vnd da recht von v´ns sůchen vnd niemen vor v´nsern amptlúten vnd schulthaißen vnd ouch sich dez da von v´ns vnd den v´nsern oder waz in da mit vrtail vnd mit recht ertailt wirt^c), benúgen la^vßen a^vne alle geverde, vnd doch also, daz wir vnd die vnsern schaffen vnd bestellen súllen, daz in vnd den iren in den selben vnsern stetten fúrderlich gericht vnd recht nit verzogen werde a^vne alle geverde. Wa^ere aber, daz der vorgenant vnser herre von O^esterrich sin lantvo^eogt oder diener oder ir stett burger oder arm lúte oder die zů in geho^erent ichtzit an vnser stett burger oder die zů v´ns geho^erent luten ze sprechent gewúnnen, die in ma^erkten in do^erffern in wilern oder in ho^efen geseßen wa^eren, dar vmb sullen sich der selb vnser herre von O^esterrich vnd die sinen, alz vorgeschriben stat, gen den selben mit dem rechten halten, alz daz ir ieglicher herre sin diener oder stette gen iren nachgeburen oder gen den, zů den si vnd die iren ze sprechen hetten, von alter oder mit gewonhait herbracht hat, a^vne alle geverde. Wa^ere aber, daz der vorgenant vnser herre von O^esterrich selb oder sin lantvo^egte oder dehain sin diener oder stette vnd die zů im geho^erent, nů furbaz mer in zite diser verainvng mit dehain v´nser stat dez bunds ze schaffen gewúnnen vmb sach, die nů furbaz mer bescha^echen vnd daz ain gantz stat angieng, dar vmbe sullen der selb vnser herre von O^esterrich vnd die sinen, alz vorgeschriben sta^vt, zů ainem gemainen man niemen ainen vsser den vorgenanten fúnf mannen, die vor von den stetten benempt sind, vnd dazů Chůnrat Zopff von Winpfen vnd Chůnrat Bisser von Dinkelspuhel, welhen si wend, in so^elicher beschaidenhait, wa^ere, daz ez angieng die stette vmbe den Sêwe, so sullen si der ainen niemen zů ainem gemainen man, die von den selben stetten benempt sind, gelicher wise, ob ez die stett vnder der Albe angieng, so sol man der ainen niemen zů ainem gemainen man, die von iren stetten benempt sind. Wúrd man aber zůsprechen den stetten Augspurg, Vlme, Memmingen, Bibrach vnd die zů den selben rivieren geho^erent, so sol man der ainen niemen, die ietzo von den selben stetten benempt sind, gelicher wise aber, ob ez die stett in dem Ries angieng, sol man den, der von iren wegen benempt ist, ze gemainem man niemen, vnd also sol in div stat dez bunds vnder vns, zů welher si denne ze sprechen gewúnnen oder hetten, rechtz gestatten vnd in daz widerfaren la^vßen vff den selben gemainen man vnd vff die schidlute, die denne von baiden tailen darzů gesetzt werdent, in ainer ander richs stat, div in denne der gemain man darzů benempt vnd beschaidet vnd div der stat, die man an sprechen wil, aller gelegenlichost ist, vnd doch mit vßgenomen worten,also daz man dehainer stat vnder v´ns weder vmb aigenschafft noch vmb pfantschafft noch vmb dehain ir stat eha^vfti nit zůsprechen sol, vnd ouch aber also, ob der tail kainer in aucht oder in ban wa^ere, daz daz an dem rechten gentzclich stille ligen vnd entwederm taile zů dem rechten nit schaden sol in dehainen weg a^vne alle geverde. Vnd súllen ouch mit namen die gemainen, welher denne also genomen wirt, die sach versorgen bi dem aide, den ir ieglicher besunder dar vmb gesworen ha^vt, vnd ouch daz recht vff den aide sprechen vnd, nach dem alz ez ervordert wirt, in den nechsten vierzehen tagen ainen vßtrag geben a^vne alle geverde, alz vorgeschriben sta^vt. Vnd dez geliehen sullen wir obgenanten stett vnd die vnsern vns dez rechten von dem vorgenanten vnserm herren von O^esterrich vnd den sinen, die zů im geho^erent, benu^egen la^vßen an den stetten vnd vff die gemainen, alz daz in sinem bundbrieff, den er vns besigelt vnd gegeben hat, volkomenlich begriffen ist, a^vne alle geverde. Wa^ere aber sache, daz von vnserm oder der egenanten zwaier taile vnsers herren von O^esterrich, der von Wirtenberg vnd der gesellschafften stozze wurden vmb angefallniv vnd anerstorbniv gůt vnd die entwedra tail in gewer her bracht hett, die súllen berechtet werden in so^elicher ma^vße, wa^ere, daz der aberstorben, von dem daz gůt gefallen wa^ere, ain burger wa^ere gewesen, so súllen die, die na^vch dem gůt sprechent, daz berechten in der stat, da der abgegangen burger gewesen ist, vnd nach der selben stat recht, wa^ere aber der selbe aberstorben, von dem daz gůt gevallen wa^ere, dehain burger gewesen vnd hie vßnan vff dem land geseßen, so sullen die, die nach dem gůt sprechent, daz berechten hie vßnan vff dem land vnd vff der gemainen mann ainem in dem tail, vß dez tail der ist, der na^vch dem gůt sprichet, der der sachen aller best geseßen ist, an so^elichen gelegnen stetten, die in denne der gemain man darzů benemet vnd beschaidet, a^vne alle geverde. Wir haben ouch besunder in diser verbuntnúße den stetten vnsers bunds in Franken vnd den iren gen der gesellschafft mit sant Go^eryen vnd gen den iren vnd iren armen lúten vnd ouch den selben gesellschafftan vnd den iren gen den vorgenanten stetten in Franken vnd den iren vnd iren armen luten daz mit namen vßgesetzt vnd behalten, waz si mit ain ander oder gen ainander ze sprechent oder ze schaffent hetten oder gewúnnen in zite diser verbuntnúße, daz si daz baidenthalb mit frivntlichen rechten gen ain ander vßtragen vnd ouch dez ain ander gestatten vnd halten sullen an den stetten, alz ez von alter bis her komen ist nach dez selben lands gewonhait vnd recht, a^vne alle geverde, vnd súllen ouch also mit namen bestellen vnd verkomen, so wir best mugen a^vne alle geverde, daz wir noch dehain der vnser nieman von den vorgenanten zwain tailen der egenanten fursten herren vnd gesellschafftan noch der iren irs gůtz, daz denne ieglicher in gerv´weter stiller nutzlicher gewere inne ha^vt, a^vne recht nit entweren noch niemen oder daz dehain v´bergriff daruber a^vne recht von vns oder den vnsern nicht bescha^ech, vnd wa daz dar uber von vns bescha^ech, so sullen wir daz vnuerzogenlich vnd a^vn alle geverde schaffen widerkert vnd widerta^vn, vnd daz wir vnd die vnsern dar nach zů dem rechten komen nach der buntbrieff lute vnd sag, die der vorgenant vnser herre von O^esterrich, die von Wirtenberg vnd die gesellschafftan vnd ouch wir ain ander zů allen dry tailen besigelt vnd gegeben haben, a^vne alle geverde. Wa^ere aber, daz wir ainig a^vne baider oder dez ainen tails der vorgenanten fursten herren vnd gesellschafftan hilff daz nit erobern noch vßgetragen mo^echten, so súllen vnd múgen wir wol baiden oder dem ainen tail dar vmb zůsprechen vnd vmb hilff manen, so súllen denne ieglicher der selben tail ir fúnf man schiken vnd senden an die stett, die darzů beschaiden sind na^vch der bundbrieff lute vnd sag, die si v´ns dar vmb geben ha^vnt, vnd sullen wir zů ieglichem der selben tail vnser vier man setzen vnd geben, vnd wie sich die núne ir ieglichs der zwaier taile gemainlich oder mit dem merrentail erkennent oder darzů hilff schepfent, also sullen si vnd wir zů ziehen vnd beholffen sin alz lang, bis daz widerkert wirt oder aber bis sich die selben núne gemainlich oder mit dem merrentail erkennent, daz von so^elicher sach wegen genůg beschechen si, a^vne alle geverde, doch vßgenomen aller verbrieffeter schuld vnd vnleugenba^ere gúlt, vnd vmb hůbgelt vogtrecht stivre vnd zins sol iederman vnd allermenglich alliv siniv recht behalten vnd vßgesetzt sin, alz daz von alter bis her komen ist, a^vne alle geverde, denne so verre vnd allain dez vßgesetzt, waz der vorgenant vnser herre von O^esterrich oder sin vordem schuld oder ga^vbe vmb dienst verschriben oder verhaißen ha^vnt, daz wir nieman ze burger noch in v´nsern bund in niemen noch enpfahen sullen, alle die wile diser bund weret, den wir dar vmb gen in beraten oder beholffen sien oder in ald die sinen dar vmb dehains wegs no^eten oder pfenden, wan der selb vnser herre von O^esterrich daz mit namen gen vns verdinget vnd verta^edinget ha^vt, aber doch vmb ander schuldan vnd die im geluhen sind, súllen iederman siniv recht behalten sin, alz im daz denne verschriben vnd verhaißen ist, a^vne alle geverde. Wir sullen ouch gemainlich noch dehain stat vnsers bunds besunder von anfang diser verainvng vnd alz lang div weren sol vnd gemachet ist, alz vorgeschriben sta^vt, kainen burger vnd daz die vorgenanten zwen taile der fursten herren vnd gesellschafftan oder die iren anrůret in niemen noch enpfahen, denne die sich hus vnd ha^vblich in die selben stat setzen vnd ziehen, da si burger worden sind. Wa^ere aber, daz der dehainer, die also ze burger enpfangen wa^eren, iren herren vorhin versworen oder verbúrget hetten, dez mo^echten si die selben ir herren wol in dez ersten ja^vrs friste vngevarlich von dem tag, alz die burger worden sind in der stat, da si burger worden wa^eren, der sach v´berko^vmen mit lantgericht briefen oder aber mit briefen, daran zwen erber vnuersprochen man, die wapens geno^vß wa^eren, phaffen oder layen, ir insigel gehenkt hetten, die daz seiten vff ir aide, daz in daz kunt vnd wißent wa^ere. Hetten aber der oder so^elich ir herren nit brieff, wa^ere ez denne ain fúrste grauf oder fry, der daz vß bringen wo^elt, der mag daz wol vß bringen mit sinem amptman, der des sweren sol zů den hailigen vnd zů in zwen erber vnuersprochen man, doch v´ber die der selb herre, dez amptman daz also vßbringen wil, nit ze gebieten hab oder die sin aigen nit sien oder die im weder ze gebe noch ze gelt sitzen vnd die dez ouch sweren gelert aide zů den hailigen mit vff gebottnen vingern, daz in daz kunt vnd wißent si, wo^elt aber ain ritter knecht oder ander man daz vß bringen, der sol daz wisen mit sinem aide vnd aber zů im zwen erber vnuersprochen man ouch mit iren aiden, v´ber die er nit ze gebieten hett oder sin aigen nit wa^eren oder im ze gebe oder ze gelt sa^eßen, alz vorgeschriben sta^vt, a^vne alle geverde. Vnd in welher stat vnsers bunds so^elich burger vberkomen wúrden, alz vorgeschriben sta^vt, die selb stat sol denne fúro den, da vor daz nu ab behebt ist, nit schirmen in dehain wise, a^vne alle geverde, doch vß genomen aller edler lúte clo^ester vnd phaffen die mugen wir wol in niemen vnd enpfahen in so^elichen rechten, alz wir von alter bis her geta^vn haben, ane alle geverde, vnd ouch aber dez vßgesetzt, ob daz wa^ere, daz dehain gebur in vnser stett ainer oder mer burger wúrd, der kains herren, die zů den vorgenanten zwain tailen geho^ert, aigen wa^er gewesen, vnd der selb gebur oder ir wa^ere ainer oder mer, ain aigen gůt hie vßnan vff dem land hett oder vff ains andern burgers aigen gůt geseßen wa^ere, der mag wol hie vßnan sitzen vff dem land in solicher beschaidenhait, wa^ere daz er in kains herren ritter oder knechtz diser verbuntnuße do^erffern gerichten zwingen oder ba^ennen geseßen wa^ere, daz ouch er die selben gericht dorffrecht eha^vfty zwing vnd ba^enne halte vnd ouch tu^egi alz ander lút vor im vnd hinder im vngeva^vrlich vnd na^vch dem, alz daz selb gůt von alter her komen ist, a^vne alle geverde. Wa^ere ouch, daz ieman in v´nsern stetten ainer oder mer burger wúrd, der in ainer andern der vorgenanten fúrsten herren gesellschafften oder irer diener stetten geseßen wa^ere, der selb sol sich in die selben stat vnsers bunds, da er burger worden ist, setzen vnd ziehen, doch also, daz er den herren oder der stat, dar vß er denne zivhet, stivran gult anzal vnd frevlinan vßrichten sol, die sy redlich vnd mit recht vff den oder die bringen mo^echten vngeva^erlich in dez ersten ja^vrs frist in der stat vnsers bunds, da er hin gezogen wa^ere, mit richtern oder mit gesworswornen^d) ra^eten vß der stat, dannan er gezogen wa^ere. Ouch súllen wir gemainlich noch dehain stat vnsers bunds besunder noch dehain der vnser der vorgenanten zwaier tail der fúrsten herren vnd gesellschafftan noch ir diener vnd stett vigende nit halten weder husen noch hofen noch spisen weder a^eßen noch trenken noch geva^erlich hin schieben in dehain wise a^vne alle geverde. Darzů haben wir baiden vorgenanten tailen versprochen vnd verhaißen, wa^ere ob si baide oder der ain tail mit ieman ze krieg ka^emen, daz wir noch weder die v´nsern v´ns dehain irer vigende schloß vestinan stett oder gu^eter, alle die wile der krieg werot vnd ouch in zit diz verbundes, geva^erlichen durch schirms willen nit vnderziehen noch in niemen sullen in dehain wise a^vne alle geverde, ez wa^ere denne, daz wir so^elichiv schloß vestinan stett oder guter vngeva^erlich vnd durch dehains schirms willen mit geliger mit sturmen oder súß mit werender hande den vigenden ab brechen oder abgeno^eten mo^echten a^vne alle geverde. Wa^ere ouch, daz wir vnd die obgenanten fúrsten herren vnd gesellschafftan an baiden tailen mit ieman ze krieg ka^emen in zite diß verbundes vnd von der vorgenanten artikel wegen, wer der wa^ere, vnd daz der krieg in der zit, alz diser bund wervn sol, nit vßgetragen wúrde vnd dar vmb doch vor hin vnd e daz diser bund ain ende hett, gemant wa^ere, so súllen wir vnd ouch die obgenanten fúrsten herren vnd gesellschafftan ain ander nach diser verbuntnuß ußgang dennocht beholffen sin alz lang, bis nach erkantnúß der núnen oder ir dez merrentails, die von dem clagenden vnd von dem helffenden tail darzů gesetzt werdent, darzů beschicht, alz sich die selben denne dar vmb erkennet ha^vnt, daz darzů genůg geholffen vnd geta^vn si a^vne alle geverde. Wa^ere ouch sache, daz man in dirr zit, alz diser bund werun sol, geliger oder beseßes vor ainer stat vestin oder schloß ainost oder mer bedurffent wurd oder ha^vn muste, bescha^echen denne so^elicher geliger vns vorgenanten stetten dez bunds ze dienst vnd ze liebin vnd von v´nsern wegen, so sullen wir, waz kost oder schadens dar úber gieng vnd wachsent wurd von gezivgs wegen, dar geben vnd vßrichten den vorgenanten fursten herren vnd gesellschafftan an baiden tailen a^vne schaden, doch also daz si v´ns ir werklút vnd gezivg, ob wir dez darzů bedurffent wurden, lihen súllen ane alle widerrede vnd den ouch wir stette dez bunds in iren schloßen vnd stetten holen vnd wider dar in antwúrten sullen mit v´nser aigner kost a^vne alle geverde. Vnd waz ouch man stett vestinan oder schloß gewúnne, so der zog vnser der vorgenanten stett dez bunds wa^ere vnd von v´nsern wegen dannan gieng vnd ob in den selben schloßen icht gefangner wúrden, mit den selben schloßen vnd gevangen mugen wir leben vnd tůn, wie wir wellen, also daz die obgenanten fúrsten herren vnd gesellschafftan von baiden tailen vns daran nichtzit sont noch mugent irren engen noch gedrengen in dehainen weg, doch also daz wir mit namen versorgen sullen, daz den obgenanten fursten herren vnd gesellschafftan noch den iren von den selben schloßen vnd gefangen dehain schad dar vmb mer vfferstande noch widerfare a^vne alle geverde, vnd dez geliehen sol den obgenanten fúrsten herren vnd gesellschafftan von baiden tailen, von welhes tailz wegen daz bescha^ech, her wider vmbe ouch recht sin. Bescha^echen aber so^elichiv geliger von baiden tailen der obgenanten fúrsten herren vnd gesellschafftan vnd ouch von v´ns stetten von der tail aller dryer gemains nutze wegen vnd mit gemainem ra^vt, so súllen wir die selben taile alle dry den schaden vnd die kost, die von gezivg vnd werklut wegen darúber gieng vnd wachsent wúrd, gemainlich mit ain ander dar lihen vßrichten vnd bezalen vnd ouch den nutz vnd den fromen an schloßen vnd gefangnen, alz vor geschriben stat, ouch mit ain ander nießen vnd haben, also daz ieglichs tail ain drittail dar an tragen vnd niemen sol ane alle geverde, vnd alz balde ouch der zog vnd div raise ain ende ha^vt, so súllen herren vnd stette in ainem manod dem nechsten dar na^vch ze samen komen oder ir ra^ete mit macht schiken gen Vlm in die stat vnd súllen die kost da anlegen vnd in ainem manod dem nechsten dar nach bezalen a^vne allez verziehen a^vne alle geverde. Ez súllen ouch dez vorgenanten vnsers herren von O^esterrich diener alle, si sien herren ritter oder knecht, vnd darzů die vorgenanten herren von Wirtenberg bayde vnd die ho^vptlút der gesellschafft aller dryer vnd ouch alle die herren ritter oder knecht, die dar inne sind, vnd ir aller diener, die diß bunds genießen wend, vnd ouch alle ir burgermaister in stetten vnd darzů alle ir vo^egt vnd amptlút, sy sien in stetten vff burgen in do^erffern oder in wilern, disen bund sweren, vnd ouch mit namen die lute, die von baiden iren tailen ietzo zů gemainen lúten zů dem rechten vnd vmb erkantnuß der hilff benempt vnd geordnet sind, alz vorgeschriben sta^vt, dez ouch sweren, daz allez ze halten vnd ze vollefůren vngeva^erlich nach der verbundbrieff sag, die darúber geben sind, vnd wenne ir ainer da haim nit wa^ere, ander die denne an siner stat wa^eren oder den er sin stat enpfolhen hett, vnd alz dike ouch der selben gemainer manne ainer oder der vo^egt vnd amptlút ir ainer oder mer abgiengen entsetzt wurden oder in lands nit enwa^eren, so sol vns alle weg der selb tail, von dem der oder die abgegangen wa^eren, ainen oder ander an der abgegangen stat in ainem manod dem nechsten dar na^vch setzen, so si dar vmb gemant werdent, a^vne allez verziehen a^vne alle geverde, vnd sunderlich ob vns die gemainen lút vnd die vns vmb erkantnúß der hilff von irem tail benempt sind, ir ainer oder mer abgiengen, sullen si v´ns ander alz schidlich mit v´nserm gůten willen vnd wißen in dem nechsten manot na^vch v´nser ermanung setzen vnd an ir stat geben ane alle geverde, daz selb wenne oder alz dike der gemainen mann ainer oder mer, die von vnserm tail zů dem rechten oder zů erkantnúße der hilff benempt sind, abgiengen oder in lands nit enwa^eren, súllen wir alle wegen in ainem manot dem nechsten dar na^vch, so daz an v´ns ervordert wirt, ainen oder ander alz schidlich, die vnser ra^ete sind, an der oder dez selben stat, in den rivieren er abgegangen wa^ere, mit irem wissen vnd gůtem willen ouch setzen vnd geben a^vne alle geverde. Wir súllen vnd mugen ouch gemainlich vnd v´nser ieglichiv stat besunder in zite diz verbunds wol ritter vnd knecht vnd ander lúte ze burgern in niemen vnd der vorgenant vnser herre von O^esterrich, die von Wirtenberg vnd die gesellschafftan ritter vnd knecht ze diener vnd in ir gesellschafftan vnd ir stette ouch ze burgern, die in den vorgenanten kraißen geseßen sind, vnd wen wir also ze burgern oder si ze diener oder in ir gesellschafftan oder stette ouch ze burgern innemen vnd enpfiengen, den sol diser bund ouch beholffen sin vnd in schirmen, also daz die selben ouch sweren gelert aide zů den hailigen, diz buntnuß ze halten vnd ze laisten a^vne geverde, doch also daz weder wir noch si nů fúrbaz mer nieman weder ze dienern noch in ir gesellschafft noch ze burgern in niemen noch enpfahen sullen, dem wir vff allen drin tailen kainer alten sach, die er ze schaffen hat gehebt vor dem tag, alz er diener in ir gesellschafft oder burger worden wa^ere, beholffen sin in dehainen weg a^vne alle geverde. Darzů súllen wir noch die zwen tail der obgenanten fursten herren vnd gesellschafftan der tail aller kainer kainen fúrsten graufen noch andern grossen herren oder bischoff in disen bund nit niemen denne in so^elicher beschaidenhait, welher tail die in niemen wo^elt vnd die ouch in den vorgenanten kraissen geseßen wa^eren, der sol vier man vnd die andern tail funf man darzů geben, vnd bekennent sich die núne oder ir der merrertail, daz der oder die in ze niemen sien oder nit oder wie man sich dar inne halten súlle, da bi sol ez beliben a^vne alle geverde. Darzů haben wir besunderlich aber mer berett, welhes vorgenanten fúrsten oder herren diener oder die in den vorgenanten drin gesellschafftan sind, disen bund nit swo^eren oder sweren wo^elten, si wa^eren herren ritter oder knecht, daz ouch die diser bund nit schirmen sol noch weder herren noch stett diß bunds nichtzit gebunden súllen sin ze helffen in dehainen weg, vnd súllen wir die andern herren vnd ouch stette von allen drin tailen diß verbunds ain ander gen den oder dem selben beholffen sin, ob si der tail kainen wider diz vorgeschriben artikel angriffen oder ta^etten. Ez ist ouch dar in mer gerett, ob daz wa^ere, daz der herren ritter oder knecht kainer, die in der Leowen gesellschafft sind, wenne ir buntnuße vff die nechsten wihennechten nů vß ga^vt, fúro nit lenger dar inne sin oder die buntnúß fúro halten wo^elt, daz der oder die wol dar vß komen múgen alz verre, daz die ho^vptlút der selben Leowen gesellschafft vns vnd den andern fursten herren vnd gesellschafftan die verkunden súllen, vnd den selben sol man fúro och nichtzit mer gebunden sin ze helffen, ez wa^ere denne, daz er in diser verbuntnúß gern lengener beliben wo^elt oder der vorgenanten fúrsten oder herren diener oder in v´nsern oder in iren stetten burger wurde, so sol im diß verbuntnúß fúrbaz wol beholffen sin. Ez súllen ouch mit namen alle vorgeschriben stett v´nsers bunds gemainlich vnd ir ieglichiv stat besunder vnd die iren beliben bi allen iren frihaiten briefen rechten vnd gůten gewonhaiten, die si von Ro^emischen kaisern oder kunigen hant vnd vntz her bra^vcht ha^vnt, a^vne alle geverde, vssgenomen allain der stukk vnd artikel, der wir v´ns hie vor an disem brief verschriben haben die zit diz verbundes, alz lang der weren sol, doch vnscha^edlich den brieffen, die die vorgenanten herren von Wirtenberg vnd div stat ze Esslingen gen ain ander ha^vnt. Vnd also haben wir vorgenanten stett gemainlich alle vnbetzwungenlich gesworen gelert aide zů den hailigen mit vff gebottnen vingern, alle vorgechriben sach wa^vr vnd stet ze halten ze laisten vnd ouch ze vollefu^eren a^vne alle geverde nach ditz brieffs sag. Doch so niemen wir vß in disem verbünd vnd gelubden daz hailig rich, vnsern herren den Ro^emischen kung, vnsern herren hertzog Růprecht den eltern, hertzog Růprecht den jungern, hertzog Růprecht den jungsten, hertzog Steffan, hertzog Fridrich vnd hertzog Hansen alle von gotz gna^vden pfallentzgraufen bi Rine vnd hertzogen in Baigern etc., die margraufen von Baden, grauff Růdolff von Hochenberg, grauff Růdolff von Montfort herre ze Veitkirch, grauff Ludwig vnd grauff Fridrich von O^etingen gebrůder, grauff Hainrich von Santgans, grauf Chůnrat von Montfort herre ze Bregentz vnd darzů die Rinischen stett, die stett in der Wedereybe vnd die stett in Elsa^eße nach der bundbrieff lute vnd sag, die daruber besigelt vnd gegeben sind, a^vne alle geverde. Vnd dez allez ze wa^vrem vrkúnd so geben wir vorgenanten stett alle gemainlich, alz wir den bund ze Swaben mitainander halten, den vorgenanten zwain tailen der fursten herren vnd gesellschafften in der wise, alz vorgeschriben sta^vt, disen brieff besigelten mit v´nser vorgenanten dryer stett Vlm, Kostentz vnd Eßlingen aignen an gehenkten insigel, die ouch daz von vnser aller haißentz wegen an v´nser aller stat geta^vn ha^vnt. Der geben ist an mittwochen na^vch dem hailigen oustertag, do man zalt von Cristz gebúrt drivzehen hundert ja^vr vnd darnach in dem zwai vnd achtzigostem ja^vre^e).

Source Fulltext: Chartularium Sangallense X, Nr. 5899, S. 41-52.