Wir^a) graf Donat von Tokkenburg¹ graf ze Brettengo^e2 vnd ze Thafaus³ tůnd kund offenlich mit || vrkúnd diss briefs allen den, die in an sehent lesent oder ho^errent lesen, als der from Herman von || Sulzberg⁴ der junger sin lieben elich swo^estran Elsbeten vnd Vrsulen closterfrowan ze Maggenow⁵ || des ordens von Zitel in Costenzer bystům gelegen bewiset hat drú pfunt pfenning gna^emer Costenzer múnss ja^erlichs geltes ze lipding, dz sú die haben vnd niessen sond ja^erlich, die wil sú baid ald dewedri vnder inan besunder lebent vnd in lip sint, vss vnd ab allen sinen zinsen vnd núzzen vnd vogtayen des dorfes ze Obren Vtzwille⁶, die sin lehen von vns sint vnd als die brief wisent vnd sagent, die sú von irem vorgenanden brůder dar vmb inne hant, dz wir inan baiden gemainlich vnd yetweder besunder vnsern gunst vnd willen dar zů geben habint vnd gebint inan och vnser willen vnd gunst dar zů mit vrkúnd diss briefs. Wir hant och von besundern gnaden dien vorgenanden Elsbeten vnd Vrsulen von Sulzberg die genad getan vnd tůnd si inan wissentlich mit disem brief, daz sú dú vorgenanden drú pfund pfenning Costenzer munss ja^erlichs geltes vss vnd ab denan vorgenanden lehen nach ir brief sag ze lipding vnd in lipdinges wise haben vnd niessen sond in aller wise vnd rehten, als ob sú weltlich knappen oder man wa^erint. Vnd ist dis alles beschehen vnd vollefu^ert mit aller ehafti hantvesti gewarsami worten werchen ra^eten vnd geta^eten, so da dar zů gůt nútzze vnd notdurftig warent vnd dar zů gehort von reht vnd gewonhait. Vnd des ze vrkúnd vnd ze merer sicherhait aller vorgescribner ding vnd geding hant wir graf Donat von Tokkenburg da vorgenant vnser insigel offenlich gehenket an disen brief. Der geben ist ze Liehtenstaig⁷ in vnser statt an dem na^echsten ma^entag nach sant Georien tag des hailgen martres in dem iar, do man zalt von Cristus gebúrt drúzehenhundert iar, ahtzig iar vnd dar nach in dem andern jare.

Source Fulltext: Chartularium Sangallense X, Nr. 5901, S. 63-64.