Wir^a) die von Regenspurg ain fryn stat vnd ouch wir dez hailigen Ro^emischen richs stette gemainlich mit namen Augspurg, Vlm, Kostentz, Eszlingen¹, Rútlingen², Rotwil³, Wile⁴, V´berlingen⁵, Memmingen⁶, Bibrach⁷, Ravenspurg⁸, Lindowe⁹, sant Gallen, Kemptun¹⁰, Kouffburren¹¹, Pfullendorf¹², Livtkirch¹³, Ysni¹⁴, Wangen¹⁵, Bůchorn¹⁶, Bůcho^vw¹⁷, || No^erdlingen¹⁸, Dinkelspuhel¹⁹, Rotenburg vf der Tuber²⁰, Bopfingen²¹, Aulon²², Giengen²³, Gemund²⁴, Halle²⁵, Hailprunnen²⁶, Winpfen²⁷, Winsperg²⁸ vnd Wile²⁹ in Turgo^e bekennen v´ns offenlich mit disem brief vnd tu^en kunt allen den, die in ansehent oder ho^erent lesen, wan rechter fúrsatz go^etlicher wiszhait gebút vnd natúrlich geschribniv || recht wisent vnd sagent, daz alle lút gebunden sind, gemainen nutz vnd frid ze furdren vnd den schaden dez gemainen gůtz ze wenden vnd ze verkomen, dar an haben wir gedaucht vnd haben ouch furgesetzt angesehen vnd betrachtet, wie daz hailig rich vnd gemains land gotzhúser gaistlich lúte pilgrin kouflút koufmanscha^etz lantfarer || geste witwan vnd waisen mit dehainen sachen in v´nsern rivieren vnd gebieten alz nutzlich alz wol vnd alz tro^estlich beschirmet werden beliben vnd besta^vn múgen alz mit dem, daz frid vnd gemach geschepft vnd gemachet werde. Wan aber sich daz nů aigenlich erfunden ha^vt, daz gemains land mit dehainen sachen alz wol geschirmet vnd daz hailig rich gesterkt vnd gemerret werden mag alz mit dem, daz wir ainhellig vnd ainander zů fride bigestendig beholffen vnd bera^vten sien, darvmb vnd von so^elicher ma^enigvaltiger tugent wirde vnd ere, die nů vnd ouch in kúnftigen ziten darvsz wachsen vnd ga^vn mag, so haben wir v´ns gar bera^vtenlich mit rechter vorbetrachtung vnd gůten fúrsa^etzen got ze lobe dem hailigen Ro^emischen rich ze nutz vnd ze eren vns selb vnd gemainem land zů frid vnd ze gemach v´ns selb ainer lieplicher frivntschafft vnd gelúbde gesampnet zesamen verstrikt verbunden vnd verainet verstriken vnd verbinden ouch v´ns ietzo mit rechter wiszent vnd mit kraft ditz brieffs mit gůten truwen vnd geswornen aiden, die wir alle dar vmb liplich zů got vnd ze den hailigen mit gelerten Worten vnd vf gebottnen vingern gesworen haben, hinnan hin bis vf sant Go^eryen tag, der aller schierost komet^b), vnd dannan hin zwelif gantziv ja^vr div nechsten na^vch ain ander ze zellent allez daz ze halten ze laisten vnd ouch ze vollefu^eren a^vne alle geverde, daz hie na^vch an disem brief begriffen vnd geschriben sta^vt. Bi dem ersten sien wir úber ain komen, wa^ere daz dehain herre ritter oder knecht gesellschafft oder ieman andre, wer die wa^eren oder wie die genant wa^eren, v´ns vorgen(anten) stett gemainlich oder ain oder mer vnder v´ns besunder, die ietzo bi v´ns wa^eren oder die noch fúro zů vns ka^emen, ez wa^eren herren ritter oder knecht prela^vten gotzhúser oder stett, in der zit, alz diser bund werun sol, angrifen bekúmbern drengen oder beschadigen wo^elten an vnsern rechten frihaiten briefen oder gůten gewonhaiten, die wir von Ro^emischen kaisern vnd kúngen haben, oder mit roube mit mord mit brand oder vnrechtem widersagen oder ez wa^ere mit schatzung mit versetzen oder mit andern sachen, wer der wa^ere, der vns oder die vnsern also angriff vnd ze beschadigen mainte, niemant vszgenomen denne allain dem hailigen rich siniv recht ze halten vnd ze tůnd a^vne alle geverde, dez sullen wir obgenante stett, die ietzo bi vns in disem bund sind oder die noch fúro zů v´ns dar in tra^eten oder ka^emen, ez wa^eren herren oder stett ald wer die wa^eren, ain ander getruweclich bera^vten vnd beholfen sin den selben, die denne also vnder vns beschadiget oder an gegriffen sind, ez sien herren oder stett, a^vne alle geverde, alz ob ez vnser selbs sach wa^ere vnd v´ns selb widerfaren vnd beschechen wa^ere. Vnd wa^ere, daz dehain vordrung oder můtung an v´ns bescha^ech von Ro^emischen kaisern oder kúngen oder von iemant andre von iren wegen, dar vmbe sol sich doch dehain stat vnder v´ns verantwúrten noch versprechen noch dehainen vortail dar inne sůchen noch vfniemen, sy beru^effe denne vor alle stett in diser buntnúsz vnd gelúbde ze samen, vnd sol die sach na^vch gemainer stett ra^vt vnd na^vch dem merrentail ir erkantnúsz daz verantwúrten, vnd sol ouch bi dem aide da beliben. Wa^ere ouch, daz der stett dehainiv ainiv oder mer, die ietzo in diser buntnúsz sind oder die noch fúro dar in ka^emen, ez wa^eren herren oder stett, dar úber von ieman angegriffen wúrden, wer die wa^eren, so súllen wir andern stett gemainlich den zog vnd angriff wenden vnd sullen alle die, die den angriff geta^vn ha^vnt oder hilfflich darzů gewesen sind, angriffen vnd beschadigen an libe vnd an gůt, alz verre vnser vermúgent ist, a^vne alle geverde. Vnd wa^ere, daz kainer der selben herren diener, die den angrif ta^eten oder tůn wo^elten, stille sitzen wo^elten, den oder die sol man dennocht angriffen vnd beschadigen, ez wa^ere denne, daz si sweren vnd brief úber sich geben wo^elten, daz si in ziten vnd ja^vren, alz diser bund vnd verainvg werun sol vnd gemachet ist, wider vns noch vnsern bund nit sin wo^elten noch vns beschadigen wo^elten. Wa^ere ouch, daz dehain stat vnder v´ns ainiv oder mer, die ietzo in diser buntnúsz sind oder die noch fúro dar in ka^emen, ez wa^eren herren oder stett, von iemant an gegriffen wurden, wer die wa^eren, vnd die den andern stetten nit kundig wa^eren, wenne denne die selben beschadigoten herren oder stett vns andern stetten den oder die verkundent, die den schaden geta^vn ha^vnd oder hilfflich darzů gewesen sind, den oder die sullen denne aber die selben stett, den ez also verkúnt wirt, angriffen vnd beschadigen a^vne alle geverde, alz vorgeschriben sta^vt. Wa^ere ouch, daz dehaini stat v´nsers bunds, die ietzo dar inne sind oder die noch fúro dar in ka^emen, ez wa^eren herren oder stett, von der vorgenanten artikel wegen von iemant angegriffen wúrden, wa^eren denne der oder die, die den angriff geta^vn hetten, der angegriffnen stat geseszen vnd wo^elten denne die selben stett oder stat die selben ouch dar vmb angriffen, vnd duchte si, daz ez in ze stark wa^ere, die selben mo^echten denne wol die nechsten stett bi in zů in manen vnd besenden, daz si in darzů beholffen wa^eren, alz ma^vnig si duchte, der in darzů notdurftig wa^ere. Wa^eren aber die, die den schaden geta^vn hetten, ainer ander stat basz geseszen, so mag div angegriffen stat den selben stetten ouch gebieten, daz si die dar vmb angriffen, wa^ere ez aber den ouch ze stark, die mo^echten denne aber den nechsten stetten zů in růfen vnd gebieten, vntz die sach erobert wirt vnd der schad wirt abgeleit, a^vne alle geverde. Wa^ere ouch, daz dehain stat vnsers bunds, die ietzo bi vns wa^eren oder die noch fúro zů vns ka^emen, also angegriffen vnd mit geliger beseszen wúrd, div sol vnd mag die nechsten dry stett zů in manen vnd in gebieten, daz si ir vnuerzogenlich ze hilff komen mit iren lúten mit gezivg mit kost vnd mit andern sachen vngeua^vrlich, da mit si ir stat besorgen vnd geretten mugen, vnd wa^ere, daz si dez fúro notdúrftig wurden, so múgen si die andern stett die nechsten in ainer bilichi ouch zů in manen in der selben wise, vnd waz kost dar uf ga^vt, die selben kost sullen wir stett gemainlich liden vnd tragen ieglichiv stat na^vch anzal ir gewonlicher stivr. Wa^ere aber, daz wir stett gemainlich oder ain tail vnder vns besunder doch von haissentz wegen gemainer stett vnd na^vch ir aller oder ir dez merrentails erkantnúsz in den ziten dicz verbunds icht geleger oder besesze habent wúrden, ez wa^ere vor ainer stat vestni oder schlosz ainost oder mer, waz schadens oder kost denne dar úber gieng vnd wachsent wúrd von gezivg vnd werklút wegen, die selben kost vnd schaden súllen aber wir vorgenanten stett gemainlich liden vnd tragen ieglichiv stat na^vch anzal ir gewonlichen stivr, alz vorgeschriben sta^vt, vnd welhi stett oder stat vnder solich oder ander kost vnd gelt vff vnser aller notdúrfft vnd nutze vsz geben vnd dar gelihen ha^vt, die múgen v´ns alle ander stett wol darvmb ze samen manen vff ainen tag vnd da ouch wir alle gemainlich hin komen sullen vnd die kostan an legen vnd verraiten a^vne alle geverde, vnd sol ouch ain ieglichiv stat vnder vns die kost, waz ir dez na^vch ir anzal gebúret, in zwain manoden den nechsten na^vch dem, so die stett gemainlich die an geleit ha^vnt, bi dem aide bezalen a^vne alle geverde. Wa^ere ouch, daz ieman, ez wa^eren herren ritter oder knecht stett oder ander gaistlich oder weltlich lúte, begerten in ditz frivntschafft vnd gelubdnusz ze komen, der oder die múgent daz bringen an welhi stett oder stat v´nsers bunds si wend, vnd dunkt denne die selben stett oder stat, daz die stett gemainlich dar vmb ze manent sien, daz múgen si wol tůn, vnd wez sich denne die stett gemainlich oder mit dem merrentail darvmb erkennent vnd darvmb ze ra^vt werdent, wie der oder die in ze nement sien, da bi sol ez beliben. Wa^ere ouch, daz ieman v´ns vorgenanten stetten ainer oder mer, die ietzo bi v´ns sind oder die noch fúro zů v´ns ka^emen, vehen oder vigentschafft antragen wo^elt, vmbe so^elich angriff, die in in diser vnser verbuntnúsz vnd gelúbden beschechen wa^eren, den selben stetten oder stat, ir wa^ere ainiv oder mer, súllen wir die andern stett alle bi gůten truwen vnd geswornen aiden bera^vten vnd beholffen sin na^vch dem zit, alz disiv gelúbde ain ende ha^vt, vntz daz div sach gentztlich erobert vnd vszgetragen wirt, a^vne alle geverde, vnd ha^vnd ouch die selben beschadigoten stett oder stat vollen gewalt, v´ns dar vmb ze manen vnd zů ze sprechen, alz vorgeschriben sta^vt. Wir haben o^vch v´ns mit besundern worten also verainet, daz wir kainer stat vnder v´ns kainen vortail nit geben sullen, ez wa^ere denne, daz ain stat oder mer in so^elicher arnmůt schaden oder gebresten ietzo wa^eren oder noch fúro dar in vielen, si wa^eren grosz oder clain, die selben stett múgen so^elich ir schaden arnmůt oder gebresten wol bringen fúr gemain stett dez bunds, so sullen denne gemain stett ain kuntschafft darvmb erfaren, wie ez darvmb gestalt sy, vnd wez sich denne die stett gemainlich oder mit dem merrentail erkennent vnd nach so^elicher kuntschafft vnderwisung ze ra^vt werdent, ob si so^elichen stetten vortail geben wellen oder nit oder in an diensten oder an anleggung liben súllen oder nit, da bi sol ez beliben. Wa^ere ouch sach, daz dehain stat v´nsers bunds ir ainiv oder mer, die ietzo bi v´ns sind oder die noch fúro zů v´ns ka^emen, mit ainer ander stat oder stetten v´nsers bunds icht brúch oder sto^esz hetten oder gewúnnen vmb waz sach daz wa^ere, da sol entwedre stett oder stat selb nit zů tůn angriffen noch die andern darvmb bekúmbern noch vfheben in dehainen weg, alle die wile diser bund werot, vnd die selben stett sullen so^elich ir sto^esz bringen an die stett, in der gesellschafft si sind, vnd den baidenthalb ir sach fúrlegen vnd ze erkennent geben, vnd wie die selben stett gemainlich oder mit dem merrentail, in der gesellschafft si sind, die sach zwischan in vszrichtent oder ob si daz a^vne gemain stett nit vszgerichten mo^echten ald die sach alz ha^eftig wa^ere oder also gestalt, daz man daz ye fúr gemain stett bringen mu^est, wez sich denne die stett gemainlich oder mit dem merrentail darvmb erkennent oder wie si daz mit minne oder mit frivntlichen rechten entschaident ald wez oder wo hin si die wisent, dez súllen baid taile gevo^elgig sin vnd ouch bi den aiden da bi beliben. Wir haben ouch disen bund in so^elicher ma^vsze geordnet vnd ouch v´ns dar uf also ze samen versprochen, ob wir dehain stukk vnd artikel dar inne zů den vorgenanten artikeln bessern wo^elten, daz wir dez vollen gewalt haben vnd ouch da bi beliben sol, wenne oder wie sich die zwen tail oder mer der gemainen stett darvmb erkennent, vnd sol der drittail den zwain tailen dar inne bi dem aide gevo^elgig vnd gehorsam sin vnd ouch da bi beliben, doch sullen noch múgen wir dehain stuk in disem bund brief nit mindern, ez beschech denne mit v´nser der vorgenanten stett aller gůtem ainba^vrem willen vnd ainhelleclich. Wenne ouch wir vorgen(anten) stett alle ze samen gemant sullen werden, da sol alleweg ain manung besehen gen Vlm vnd div ander gen Bibrach, ez wa^ere denne, daz wir obgen(anten) stett v´ns bekanten gemainlich oder mit dem merren tail, daz ain andriv stat zu den ziten der sach basz gelegen wa^ere. Ez súllen ouch die von Regenspurg, von Auspurg, von Vlm, von Kostentz vnd von Eszlingen ieglichiv stat zwen von iren ra^eten zů dem spruch setzen vnd der andern stett ieglichiv ainen, vnd wenne ouch wir ze samen gemant werdent, wa^ere denne, daz dehain stat daran súmig wa^ere vnd nit ka^eme vff die zit, alz siv gemant wa^ere a^vne alle geverde, der git ieglichiv stat zwaintzig guldin an gemainer stett kost, vsz genomen der von sant Gallen, von Kemptun, von Ysni, von Wangen, von Livtkirch, von Kouffbúrren, von Bopfingen, von Winpfen, von Winsperg, von Giengen, von Aulon vnd von Bůchorn, der ieglichiv stat git zehen guldin, vnd sol ouch sich dez kain stat widern noch sperren, ez wa^ere denne, daz sich ain stat mit aiden da von geniemen mo^echt, daz sy ehafft no^vt geirret hett. Wa^ere ouch, daz wir ze got nit getruwen, daz sich dehain stat in diser buntnúsz dar an úbersa^ehe vnd nit hielti vnd vollefůrti die artikel, alz vorgeschriben sta^vt, wurd die denne v´berwunden mit dem rechten mit erkantnúsz der stett oder ir dez merrentails, div sol denne ze pene geben von ye hundert phund hallern ir gewonlicher stivr zwai hundert phund haller aber an gemain kost der stett, ez wa^ere denne, daz si sich mit aiden da von geniemen mo^echten, alz vorgeschriben sta^vt, daz sy ehafft no^vt geirret hett. Vnd sol ouch mit namen disiv vnser vorgeschriben gelubde vnd buntnúsz werun vnd krafft vnd macht haben in aller der wise, alz vorgeschriben sta^vt, a^vne alle geverde vnd ouch die vorgeschriben zit vnd ja^vre hinnan bis vff sant Go^eryen tag ze nechst vnd dar nach zwelif gantziv ja^vr div nechsten na^vch ain ander, ez wa^ere denne, daz vns ander búnd vnd lantfrid ze handen giengen, die vns vff ze niemen wa^eren vnd dez sich die zwen taile oder mer vnder vns erkanten vnd dúchte vff ze nemen, daz sol denne ouch also beliben, vnd sol der drittail den zwain tailen dar an gevo^elgig sin. Vnd also haben wir vorgen(anten) stett alle gelopt bi den vorgeschriben aiden, alle vorgeschriben sach stúkk búnde vnd artikel wa^vr vnd stet ze halten ze laisten vnd ouch ze vollefu^eren luterlich vnd a^vne alle geverde nach ditz brieffs sag. Vnd dez allez ze wa^vrem vrkúnd haben wir vorgen(ante) stett alle vnd ouch ieglichiv stat besunder ir stat gemains vnd gro^vsz insigel offenlich gehenkt an disen brieff Wa^ere aber, daz der selben insigel ir ains oder mer vngeva^vrlich an disen brief nit ka^eme oder zerbrochen wúrd, dennocht sol dirr bund vnd brieff bi allen sinen krefften beliben. Der geben ist an sant Michels aubent, do man zalt von Cristz geburt drivzehen hundert ja^vr vnd dar nach in dem zwai vnd achtzigostem ja^vre.

Source Fulltext: Chartularium Sangallense X, Nr. 5924, S. 85-89.