Wir Cůn von gottes gnaden abt dez gotzhus ze sant Gallen¹, daz a^vn alles mittel zů geho^ert dem stůl ze Ro^vm, || veriehen mit vrkúnd diz briefs, daz fúr vns kamen ze sant Gallen in vnserm hof an dem na^ehsten zinstag nâch || sant Hilarien tag, do wir offenlich ze geriht sa^vssent, Anna Hansen des Schenken von Landegg sa^eligen elichi || tahter^a) Cůnratz Koppen sa^eligen von Wil elichi wirtinne vnd Margareth vnd o^vch Margareth der selben Annen elichen tohtran vnd offnoton da offenlich vor v´ns mit ir fúrsprechen vnd sprâchen, daz si den grossen hof genant der Bêttnôwer hof vnd den klainen hof och^b) der Bettnower hof genant baid ze Vfhofen gelegen mit allen rehten nútzzen vnd gewonhaiten vnd mit aller zů geho^ert, als o^vch si die selben ho^ef vntz her vff disen húttigen tag geno^vssen besetzt vnd entsetzt ha^vnt, vnd o^vch in den rehten, daz von dem vorgenanten klainen hof ainem custer dez gotzhus ze sant Gallen, welher denn custer ist, nû ze dem na^ehsten sant Gallen tag, der nû kumpt nach dem tag, als dirre brief geben ist, vnd darnach aller ja^erlich ie vff sant Gallen tag ze rehtem zins ga^en sol drithalb phund phenning gůter vnd gena^emer Costentzer múnse. Bescha^eh aber, daz dehaines jares der selb zins die dridthalb phund phening Costentzer múnse von dem vorgenanten klainen hof nút gantzlich gewert werden mo^ehtin, waz denn des zins an dem klainen hof abga^vt oder abgangen ist, dz sol der vorgenant gro^vss hof gantzlich vs rihten a^vn allen fúrzug vnd widerred, die selben ho^ef baid wa^erint von v´ns vnd vnserm gotzhus iro lehen vnd hettint die selben ho^ef baid redlich vnd reht aines sta^eten ewigen ko^vffes verko^vfft vnd ze ko^vffen geben iro lieben můmen Elsen Hugen des Schůlmaisters sa^eligen elichen wirtinnen vnd ir erben vmb sehzig phund phenning vnd aht phund phenning gůter Costentzer múnse, der selben phenning o^vch si von ir gantzlich vnd gar gewert wa^erint vnd an iren offenn nutz bewendet, vnd batent vns ze eruarn an ainer vrtail, wie sú der vorgenanten Elsen die vorgenanten ho^ef vertgan vnd zů ir handen bringen so^eltin, dz es kraft vnd maht hett nu vnd o^vch hie nach, do fragtan wir obgenanter rihter vmb, do ward ertailt an gemainer vrtail, daz die vorg(enanten) Anna Koppin vnd Margareth vnd Margareth ir tohtran ainen vogt vnd wiser nemen so^eltin, vnd so^elt der vogt iro na^ehster vatterma^vg sin, mo^ehtin si aber den nút geha^vn, dz si denn an des gerihtes ring ainen vogt nemen so^eltin, wen si wo^eltin, do ze mal erzogtan die vorg(enanten) Ann vnd ir tohtran ainen offenn besigelten brief von Hansen Koppen von Bútziswille² irem na^ehsten vattermâg vnd der ir rehter vogt gewesen solt sin, der selb brief sait, daz der selb vogt von sins libes krankhait wegen nienart komen mo^eht, vnd gab den selben Annen vnd ir tohtran vollen gewalt, ainen andern vogt an siner stat ze nemenn, wen si wo^eltin, do namen die vorg(enanten) Anna Koppin vnd Margareth vnd Margareth ir tohtran ze vogt Jacob Růpreht den Lo^ewen stattamman ze sant Gallen vnd namen ze wîser V^olrichen Ko^echler burger ze sant Gallen, do batten v´ns aber die vorg(enanten) Anna vnd ir tohtran mit^c) iro vogt vnd wiser vnd o^vch fúrsprech in ze ervarn, wie si die vorgenanten ho^ef zů der vorgenepten^a) Elsen handen so^eltin bringen, daz es krafft vnd maht hett nû vnd hernach, do fragton wir vorbenempter rihter vmb vnd ward ertailt mit gemainer vrtail, dz die vorg(enanten) Anna Koppin, Margareth vnd Margareth ir tohtran mit irem vogt Jacob Růpreht dem stattamman die vorgeschriben ho^ef mit aller zů geho^erd vff so^eltin geben an vnser hand vnd v´ns die vorgenanten ho^ef bitten lihen der vorgenanten Elsen mit den rehten, als vorgeschriben sta^vt, das ta^eten o^vch die vorgen(anten) Anna Koppin, Margareth vnd Margareth ir tohtran, vnd gaben da die ietz genempten Anna vnd ir tohtran Margareth vnd Margareth vnd iro vogt Jacob Růpreht stattamman mit iro handen den vorgenanten grossen hof Bettnower hof genant vnd den klainen hof o^vch also genant baid ze Vfhofen gelegen ledklich vf an vnser hand vnd verzihent sich o^vch da a^ellú vierú gemainlich aller aigenschaft aller lehenschaft alles rehten aller vordrung vnd ansprach, so si ald iro erben an den vnd zů den vorgenanten ho^efen mit aller zů geho^ert ie hant gehebt oder sú ald ir erben noch gewinnen mo^ehtin, vnd baten v´ns die selb vorgenanten ho^ef mit den vorbeschaiden rehten lihen der vorgenanten Elsen ze rehtem lehen, daz o^vch wir ta^vten vnd lihen die vorgenanten ho^ef baid mit allen, als da ob geschriben sta^vt, der vorgenanten Elsen Hugen Schůlmaisters sa^eligen wip ze rehtem lehen, die vorgenant Anna vnd ir tohtran baid hant o^vch gelopt, des ko^vffs vnd der ho^ef baider reht wern ze sint nach dem rehten gen aller ma^enkliche(m) vff gaistlichem vnd weltlichem geriht vnd an allen den stetten, da si vnd ir erben darvmb vfgetriben vnd angesprochen werden, als dik si des no^vtdurftig sint, vnd ist dis alles beschehen mit allen den worten vnd werken geta^eten vnd geba^erden, so darzů no^vtdurftig wz vnd als es kraft vnd maht solt haben nu vnd hiena^vch. Vnd ze warem vrkúnd haben wir vorbenempter abt Cůn vnser insigel an disen brief gehenkt. Wir die obgen(anten) Anna Koppin vnd Margareth vnd o^vch Margareth ir tohtran, Jacob Růpreht vogt, V^olrich Ko^echler wiser veriehent, daz alles dz war ist, das der hochwirdig furst abt Cůn ze sant Gallen vnser gna^ediger herr da von v´ns an disem brief veriehen vnd verschriben hatt, vnd ze noch merer sicherhait der selben dinge, won wir die vorg(enanten) Anna Koppin vnd Margareth, Margareth ir tohtran nút aigner insigel habent, so han ich Anna Koppin Hansen Schenken minen brůder erbetten, das er sin insigel fúr mich an disen brief hat gehenk, vnder das selb insigel ich mich o^vch verbunden han. Ich Hans der Schenk vergich, das ich von bett wegen miner swo^ester Annen min insigel han gehenkt an disen brief mir vnd minen erben vnscha^edlich. Wir Margaretht vnd Margareth Annen Koppinen tohtran habent erbetten Jacob Růpreht stattamman vnd vogt in dirre sach, dz er sin insigel fúr v´ns hat gehenkt an disen brief, vnder dz selb insigel wir vns o^vch verbinden. Ich Jacob Růpreht vogt vergich, dz ich von bet wegen der egenanten Greten vnd Greten Annen Koppinen tohtran min insigel fúr si gehenkt han an disen brief mir vnd minen erben vnscha^edlich. Geben an dem obgeschribenn zinstag, do man zalt von Cristi gebúrt drúzehenhundert jar vnd zwai vnd ahtzig jar.

Source Fulltext: Chartularium Sangallense X, Nr. 5888, S. 4-6.