Wir^a) des hailigen Ro^emschen richs stett, die die buntnuss haltent vmb den Sew¹, tůnt kvnd mit disem gegenwirtigen brief allen den, die in ansehent oder ho^erent lesen, von der ansprach vnd klag wegen, || so der erwirdig fúrst v´nser gna^ediger herre herr Cv^on von gottes gnaden abt des gotzhus ze sant Gallen² vnd och v´nser lieben aidgenossen die burger von sant Gallen gen anander daher gehebt hant, darumb || kament baid tail fúr v´ns gen Costentz an disem húttigen tag, als dirre brief geben ist, mit vollem gewalt vnd batent v´ns darumb sprechen.Vnd sprachent och die selben v´nser aidgenossen die von sant Gallen, es || wa^er von manvng wegen darzů komen, daz wir inen von ir klag wegen billich des ersten sprechen so^eltent, vnd sprachent also, wie daz wa^er, daz si ainen gůten besigelten brief³ hettent, den der selb v´nser herre der abt inen mit sinem insigel besigolt geben hett, der selb brief wist vnd sait, daz er iren burgern^b) lihen solt die gu^eter, die ze sant Gallen in den vier crútzen gelegen wa^erent, des sperti er sich inen ze lihent, wie dz wa^er, daz si im gern davon ain viertal wins ga^ebent vnd geben woltent, als es och an dem selben brief verschriben sta^vt. Daz verantwurt aber v´nser herre der abt vnd sprach, er wo^elti inen si gern lihen, si wo^eltent im aber davon nit tůn, daz si im billich davon tůn soltent vnd daz si andern herren sinen voruarent davon getân hettent, daz wa^er also, im solt von den selben gu^etern gan zins stúren dienst vnd erschatz. Darumb erkantent wir v´ns ainberlich nach vil redd vnd widerredd, die si fúr v´ns brahtent, vnd sprechent also darumb vss, daz der selb v´nser herre abt Cv^on, alle die wil vnd er lebt, den selben burgern^b) ze sant Gallen nit verzihen sol, won daz er allú dv´ selben gu^eter, die in den vier crútzen ze sant Gallen bi der stat von obnendi der berg inheldi ze tal ligent, lihen sol allen den, den die selben gu^eter zů geho^erent.Vnd als dik der selben gůt iemer dekaines verkoft wirdet, so sol der koffent dem selben v´nserm^c) herren dem abt ain viertal des besten lantwins, so man danne ze dem zapffen schenket, davon ze erschatz geben, es sie in der stat oder davor in den selben vier crútzen, vnd sol och er damit daz selb gůt vererschatzet haben, vnd sol im och danne der abt die lehenschaft nit sperren, vnd sol man och den selben von sant Gallen enkainen andern erschatz von den selben gu^etern fu^ero zů mv^oten, won so ferre daz alle die, die die selben gůt inne hant, dem selben v´nserm^c) herren dem abt von denselben gu^etern richten vnd geben sont die zins vnd die stúren, die daher von alter davon gegangen vnd geben sint vnd die si andern herren davon geben hant, vnd sol die von sant Gallen davor nit schirmen, daz si die selben stúr vnd zins daher etwenne versessen hant, sie sont im och die selben versessen zins vnd stúr richten vnd geben sid dem mal, daz er herre ward. Wa^er aber, daz si sto^essig darum wurdent, was danne der abt mit lúten ald mit briefen wiset, als v´ns die stett vmb den Se benv^eget, daz im darab stúr ald zins gan sol, daz sont si im geben, vnd sol man och die selben stúr anlegen vngeuarlich, als es daher vntz an den selben abt beschehen ist. Was och dienst von den selben gu^etern in den vier crútzen von alter gan sont, die sont si im och tůn âne alle geuerde, si wurdent danne sto^essig darumb, daz mag v´nser herre der abt aber wisen, als v´ns die stett vmb den Se benv^eget, mit lúten ald mit briefen, vnd sol im och danne daz volgan âne alle geuerde nach siner bewisvng. Vnd als der selb v´nser herre der abt sprichet, im vnd sinem gotzhus so^ell erbschaft von den lúten ze sant Gallen vallen vnd werden, als daz von alter herkomen sie, vnd well och daz wisen, daz daz sins gotzhus reht sie vnd daz och daz den obgenanten brief nit angang noch an ru^er, den er den von sant Gallen mit sinem insigel besigolt geben hab, dawider aber die selben von sant Gallen sprachent, es ru^eri den selben iren brief an. Darumb haben wir gesprochen vnd v´ns erkennet, daz daz selb stuk den selben brief an ru^er vnd daz die von sant Gallen dem selben v´nserm^c) herren abt Cv^on nit fu^ero gebunden sigint erbschaft ze gebent, danne als der obgenant brief wiset, den er den obgenanten von sant Gallen mit sinem insigel besigolt geben ha^vt. Es klegt och der selb v´nser herre der abt, die burger ze sant Gallen legint stúr vff die gu^eter, die sins gotzhus lút in den obgenanten vier crútzen ligent habent, da von nement si den dritten pfenning ze stúr. Darumb haben wir v´ns och erkennet, daz si die stúr nit anders nemen sont, danne als die von Costentz stúr von den gesten nement. Daz ist also, als dik si stúr nement, weli gest oder gaistlich lút, die der stat ze Costentz nit diensthaft sint vnd zins ald gelt da habent, da legent si vff ain pfunt pfenning geltes drithalben schilling pfenning, vnd vnder ainem pfunt pfenning geltes vnd darob nement si och ze stúr, als es sich gebúrt in der selben mass, es sie pfenning gelt korn gelt ald ander gelt. Es klegt och v´nser herre der abt, daz im vnd sinem gotzhus ab ainer múli statt, die in der stat graben vormals gestanden wa^er, zins gieng, die zins woltent si im nit geben vnd hettent im doch die selben von sant Gallen vergehen, daz im die zins darab gan soltent mit dem geding, als der rieht brief wiset, den si vormals sinem vorvarenden abt Georyen⁴ geben hettent. Darumb haben wir och gesprochen vnd v´ns erkennet, was zinses davon gan sol, die selben zins sont si dem selben abt Cv^on hinnanhin geben vnd och die zins, die versessen sint, sid er herre^d) ward. Vnd als der selb v´nser herre der abt von sant Gallen sprichet vnd v´ns och gebetten hât, daz wir im daz stuk entschaiden wellent von der erbschaft der hagstoltzen wegen, da dvnkt v´ns vnd habent och darumb gesprochen, won der selb v´nser herre von sant Gallen sich verschriben ha^vt gen der stat, daz er von allen personen, die nit semper sint noch burgreht nit hant vnd ze sant Gallen sesshaft sint, mit welem rehten si dem gotzhus zů geho^erent, nv´t nemen sol danne sin túrstes lebendis hobt, daz er die von sant Gallen dabi sol lassen beliben vnd ain benv^egvng daran haben sol, alle die wil der selb abt Cv^on herre da ist, es wa^er danne, ob ain hagstoltz abgieng, der weder wib noch kind noch vatter noch mv^oter mag nit hett, von dem sol im volgen, als der brief fu^ero wiset, den er den von sant Gallen mit sinem insigel besigolt geben ha^vt. Wir haben v´ns och fu^ero erkennet vnd gesprochen, was der selb obgenant brief ander stuk vnd artikkel wiset lutba^eret vnd sait, den er inen mit sinem insigel besigolt geben ha^vt, daz sol och alles also fu^ero bestan vnd beliben âne alle geuerde. Vnd ze warem vnd offem vrku'nd vnd sta^eter sicherhait aller dirre vorgeschriben ding hant die obgenanten die von Costentz von v´nser aller stett erkantnuss wegen ir stett insigel gehenkt an disen brief. Der ist ze Costentz geben, do man von Cristes gebúrt zalt drúzehenhundert jar, darnach in dem zwai vnd ahtzigosten jar, an dem na^ehsten dvnstag nach sant Margarethen tag.

Source Fulltext: Chartularium Sangallense X, Nr. 5911, S. 75-76.