Allen^a) den, die disen brief an sehent oder ho^erent lesen, kúnden wir V^olrich von Wolfurt ritter vnd Růdolf || von Wolfurt¹ gebrůder vnd veriehen des offenlich mit disem brief fúr vns vnd fúr alle v´nser erben vnd || nâhkomen vmb die sto^ez vnd misshellung, so wir gehebt habin mit dem hohwirdigen fúrsten v´nserm || gna^edigen herren Cůnen von gottes gnâden abt dez gotzhus ze sant Gallen² von des maijer amptes wegen ze Scheftnôw³, daz wir darumb lieplich vnd fruntlich verrichtet vnd veraint mit im siient, also daz wir noch kain v´nser erben noch nâhkomen kain reht vordrung noch ansprach noch zů dem selben maijer ampt mit aller zůgeho^erd von disem tag hin, alz dirr brief geben ist, niemer me gehaben noch gewinnen súllen in dehain wis, vnd darumb so sint wir komen vnd gestanden fúr den selben abt Cůnen v´nsern herren vnd habin da mit ainmu^etigem gůtem willen vnbetwungenlich daz selb maijer ampt vnd alles daz reht, so wir daran vnd darzů ie gehebt vnd gewunnen habin, in des selben abt Cůnen siner nâhkomen vnd in sines gotzhus hand letklich vnd frilich vf geben vnd zů iren handen brâht, alz reht sitt vnd gewonlich waz, vnd habin v´ns och darúber in des selben abt Cůnen vnd siner nâhkomen vnd in sines gotzhus hand luterlich vnd frilich bede gemainklich vnd ietwedre besunder fúr v´ns vnd fúr alle v´nser erben verzigen vnd entwêrt vnd verzihen vnd entwerin och mit disem brief gentzlich gar vnd och reht vnd redlich an dem vorgeschriben maijer ampt mit allen rehten vnd mit aller zůgeho^erd alles rehtes gaistlichs vnd weltlichs gerichtes aller gemainschaft vnd tailes aller vordrung vnd ansprach vnd aller der ander sach vnd geuerden, da mit wir oder jeman andrer von v´nsren wegen vnd an v´nser statt das selb maijer ampt mit allen rehten vnd mit aller zůgeho^erd nû ald hernach gar oder an dekainem taile kúndint angesprechen ald da mit wir dise vfgebung verzihung vnd dis sach wider ru^effen gewenden ald ze niht schaffen ald machen mo^ehtint in dehainen weg, ân geuerd. Vnd des vnd hierúber ze ainer besta^eten sicherren wârhait aller vorgeschribner ding vnd gedingde haben wir V^olrich von Wolfurt ritter vnd Růdolf von Wolfurt gebrůder da vorgenant v´nsri insigel fúr vns vnd fúr alle v´nser erben vnd nâhkomen offenlich gehenkt an disen brief. Der geben ist ze Wil⁴ in der statt an dem na^ehsten samstag nach sant Margrethun tag, do man zalt von gottes gebúrt drúzehenhundert jar, ahtzig jar, darnach in dem andern jare.

Source Fulltext: Chartularium Sangallense X, Nr. 5912, S. 77.