Allen^a) den, die disen brief an sehent oder ho^erent lesen, tůn ich Johans Wenginer von Wengi¹ kunt vnd vergih des offenlich mit disem brief, das fúr mich kam ze || Wil² in der stat hútt dis tags, alz dirr brief geben ist, der erber kneht V^olrich Rebman von Tegerschan³, vnd gab mir do ze stund mit gůter vorbetrahtung || letklich vnd frilich vf an min hand dise nahgeschriben gu^eter gelegen ze Tegerschan in dem bann den akker vff der Wu^eri⁴, den brůch akker halben, die hof||stat, die da stosset an Trůnger gůt, vnd ain tail des bongarten an der selben hofstat gelegen vnd daz wisli halbes an den artwisen mit allen rehten nútzzen vnd gewonhaitten vnd mit aller zůgeho^erd, die sin lehen von mir warent, vnd batt mich flehklich mit ernst, die selben gu^eter mit allen rehten nútzzen vnd mit aller zůgeho^erd ze lehen vnd ze ainer gemainschaft lihen im vnd Katherinen ietz vff dis zit siner elichen frowen, Margretun, Elsbethun vnd Annen ir beder elichen tochteran, vnd darumb han ich gna^edklich sin bett darúber verho^eret vnd han in der bett wilklich geerot vnd gewert vnd han mit bedahtem můt die vorbenemten akker hofstat aintail des bongarten vnd daz halb wisli an den artwisen mit allen rehten nútzzen vnd gewonhaitten vnd mit aller zůgeho^erd verlihen dem vorbenemten V^olrich Rebman, Katherinen siner elichen frowen, Margretun, Elsbethun vnd Annen ir elichen tochteran vnd lihe och redlich vnd reht mit disem brief allen gemainlich vnd vnuerschaidenlich ze rehtem lehen vnd ze ainer rehten gemainschaft vnd in gemainschaft wise ân alle geuerd, vnd doch och also, daz die vorbenemt Katherina Rebma^ennin, Margreta, Elsbetha vnd Anna ir tochteran von den sunder gnaden vnd von des friien volkomen manrehtz wegen, so ich inen darúber getan geben vnd verlihen han, ân alle svmnus irrung vnd wider rede min vnd miner erben vnd nahkomen die selben gu^eter in lehens wise haben niessen besetzzen vnd entsetzzen sont vnd mûgent in gelicher wise vnd in allen den rehten, alz ob si man oder knaben wa^erint, ân alle geuerd. Vnd ist dis alles reht vnd redlich beschehen vnd volfu^ert mit allen worten werken geba^erden vnd geta^eten, so darzů gehortent nútz gůt vnd notdúrftig warent von gewonhait vnd von rehte vnd alz es kraft vnd maht sol vnd mag han ietz vnd hernach ân geuerd. Vnd des vnd och hierúber ze ainer besta^eten warhait vnd offem vrkúnd aller vorgeschribener ding han ich Johans Wenginer da vorgenant min insigel offenlich gehenkt an disen brief. Der geben ist ze Wil in der stat an dem na^ehsten zinstag nach dem hailigen tag ze pfingsten, do man zalt von gottez gebúrt drúzehenhundert jar, ahtzig jar, darnach in dem andern jare.

Source Fulltext: Chartularium Sangallense X, Nr. 5906, S. 71.