Allen^a) den, die disen brief ansehent lesent oder ho^erent lesent, kúnd ich Johans Wildrich burger ze sant Gallen vnd || vergich offenlich mit disem brieue fúr mich vnd fúr alle min erben, daz ich mit gůter vorbetrahtung ain schůppůss || gelegen ze Obern Goldach¹, die man nemmet Wildrichs schůppůss vnd gůt, vnd den zehenden von disen nachge||schribenen gu^etlin o^vch gelegen ze Obern Goldach, von Johans Kellers gůt, von Frikken gut vnd von dez Ammans gůt ab Bůchberg² mit allen rehten nútzzen zv^o geho^erden vnd gewonhaiten, alz ich si gehept vnd genossen han vnd alz sv´ an mich komen vnd braht sint, redlich vnd reht aines iemer werenden ewigen ko^vffes verko^vft vnd ze ko^vffenn geben han den erberen Hainrich Spatzzen von Goldach³ vnd Lucyen siner elichen wirtinnen vnd allen iren erben vnd nachkomen vmb sibenzehen phunt phenning gůter Costentzzer múnse, der ich gantzlich von in gewert vnd bezalt bin, die selb schůppůss gůt vnd zehenden min reht lehen warent von dem erwirdigen v´nser fro^vwen gotzhus ze Costentz⁴, dannen ich in o^vch die selben schůppůss gůt vnd zehenden mit allen rehten vnd mit aller zv^o geho^erde reht vnd redlich gevertgot vnd zv^o iren handen braht han, alz reht sitte vnd gewonlich waz vnd als ez kraft vnd maht sol vnd mag han. Vnd darumb so han ich mich willeklich verzigen vnd verzich mich mit disem brieue gantzlich vnd gar fúr mich vnd fúr alle min erben der vorgeschribenen schůppůss gůtes vnd zehenden mit aller zv^o geho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so ich oder min erben an der zv^o der vnd von der vorgeschribenen schůppůss gůtes vnd zehenden wegen ie gehept habent ald hie nach iemer gehaben oder gewinnen mo^ehtint, vnd daz ich noch enkain min erben noch nieman andre an v´nser stat noch von v´nsern wegen die vorgenemten Hainrich Spatzzen, Lucyen sin elichen wirtinnen noch dehain iro erben noch nachkomen von der vorgeschribenen schůppůss gůtes noch zehenden wegen niemer súllent noch wellent an sprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sachen ân alle geua^erde. Ich der obgenant Johans Wildrich han o^vch gelobt mit miner trúwe vnd loben mit disem brieue fúr mich vnd alle min erben, der vorgeschribenen schůppůss gůtes vnd zehenden mit aller zv^o geho^erde vnd dez ko^vffes reht wer ze sinne nach dez landes reht vnd o^vch die vorgenemten Hainrich Spatzzen, Lucyen sin elichen wirtinnen vnd alle iro erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ darumb an gesprochen geschadgot oder vf getriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig wârent vnd alz man phligt vnd phlegen sol in sa^emlichen vnd in meren sachen. Vnd ze vrkúnd der warhait aller der vorgeschribenen dinge vnd vergiht so han ich Johans Wildrich da vorgenemt fúr mich vnd fúr alle min erben min aigen insigel offenlich gehenkt an disen brief. Der geben ist ze Costentz an dem na^ehsten ma^entag nach aller hailigen tag in dem jâr, do man zalt von Cristus gebúrt drúzehenhundert jar, ahtzig jar vnd darnach in dem andern jare.

Source Fulltext: Chartularium Sangallense X, Nr. 5931, S. 103-104.