Wir^a) die nâchgenemten Wilhelm vnd Êrhart die Blârrer von sant Gallen gebrůder Walthers dez Blârrers sa^elgen wilunt elichen sún tůn || kunt vnd veriehent offenlich mit disem brieue allen, die in sehent lesent oder ho^erent lesen, daz fúr v´ns kament ze sant Gallen in der stat || an dem tag, alz dirre brief geben ist, diz nâchgenemten erberen lút Růdolf Weber von Bekkitwille¹, Ma^ehthilt sin elichi wirtinne, Elzbeth, || Adelhait, Johans der elter, Johans der júnger, Hainrich, V^olrich, Steffan, Růdolf vnd Cůnrat irú êlichú kint vnd veriahent offenlich vor v´ns fúr sich fúr alle iro erben vnd nâchkomen, daz sv´ a^ellú mit ainberen willen vnd mit gůter vorbetrahtung vnd von iro redlicher nôt wegen ain malter vesan vnd zwên mutt habern gůtes vnd vngeuârliches kornes sant Galler messes ja^erliches vnd ewiges geltes von den vnd vsser den nâchgeschribenen gu^etern von dem vnd vsser dem gůt ze Bekkitwille vnd von dem vnd vsser dem gůt ze Mitmenswille² vnd ab allem vnd vsser allem dem, so darzů vnd darin geho^ert, ez sie hus hof akker wisen wasen zwi holtz ald veld, waz daz ist, wâ sv´ gelegen sint ald wie sv´ genemt sint, die selben gu^eter iro reht friies vogtber aigen wa^erint vnd darúber wir vo^egt sient, redlich vnd reht aines sta^eten êwigen ko^vffes verko^vft vnd ze ko^vffenn geben hettint dem erbern wolbeschaidenn Cůnrat Vogelwaider burger ze sant Gallen vnd sinen erben, ob er enwa^er, vmb zehen phunt phenning gůter vnd gena^emer Costentzzer múnse, der sv´ gantzlich von im gewert wa^erint vnd enphangen hettint vnd an iren offenn nutz bewendet, vnd batent v´ns, daz wir in dez gundent vnd v´nsern willen vnd gunst darzů ga^ebint. Daz taten wir durch iro bet vnd habent in dez gunnen vnd verhengt vnd gunnent vnd verhengent in daz mit vrkúnd diz brieues v´ns vnd allen v´nseren erben vnd nachkomen an allen v´nseren rehten vnd gewonhaiten gantzlich vnscha^edlich. Vnd gabent o^vch do die vorgenemten Růdolf Weber, Ma^ehthilt sin elichi wirtinne, Elzbeth, Adelhait, Johans der elter, Johans der júnger, Hainrich, V^olrich, Steffan, Růdolf vnd Cůnrat irú kint willeklich vnd frilich daz vorgeschriben ain malter vesan vnd zwen mutt haber gůtes vnd vngeuârliches kornes dez vorgeschribenen messes ja^erliches geltes von den vnd vsser den vorgeschribenen gu^etern ze Bekkitwille vnd ze Mitmenswille vnd ab allem vnd vsser allem dem, so darzů vnd darin geho^ert, offenlich an dez riches strasse reht vnd redlich vf zv^o dez vorgenanten Cůnrat Vogelwaiders handen mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig warent vnd alz ez kraft vnd maht sol vnd mag han, mit so^elicher beschaidenhait vnd in dem rehten dinge vnd gedinge, daz die vorgenemten Růdolf Weber, Ma^ehthilt sin elichi wirtinne vnd die vorgenemten irú kint vnd alle iro erben vnd nâchkomen, in dero hant dv´ vorgeschribenen gu^eter iemer koment, dem vorgenanten Cůnrat Vogelwaider vnd allen sinen erben vnd nâchkomen aller ja^erlich ie ze sant Gallen tag daz vorgeschriben ain malter vesan vnd zwen mutt haber gůtes vnd vngeuârliches kornes sant Galler messes von den vnd vsser den vorgeschribenen gu^etern ze Bekkitwille vnd ze Mitmenswille dez ersten vnd vor aller ma^englichem ân fúrzug ân alle minrung ân allen abgang vnd ân allen dez selben Cůnrat Vogelwaiders oder siner erben ald nachkomen schaden ze rehtem ja^erliche(m) zins geben rihten vnd antwúrten sont ze sant Gallen in der stat. Die vorgenemten Růdolf Weber, Ma^ehthilt sin elichi wirtinne vnd die egenemten irú kint lobtent o^vch a^ellú gemainlich mit iren trúwen vnd lobent mit disem brieue fúr sich vnd fúr alle iro erben, dez vorgeschribenen ja^erlichen korn geltes von den vnd vsser den vorgeschribenen gu^etern vnd dez ko^vffes reht wer ze sinne vnd o^vch den vorgenanten Cůnrat Vogelwaider vnd alle sin erben vnd nachkomen darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wa vnd wie dik sv´ dar vmb an gesprochen geschadgot oder vf getriben werdent mit dem rehten. Vnd ze vrkúnd der wârhait aller der vorgeschribenen dinge vnd gedinge so haben wir die vorgenemten Wilhelm vnd Erhart die Blârrer gebrůder von ernstlicher bet wegen der vorgenemten Růdolf Webers, Ma^ehthilten siner êlichen wirtinnen vnd der vorgenemten iro kinden, won sv´ aigener insigel niht hant, v´nserú insigel offenlich gehenkt an disen brief. Wir die vorgenemten Růdolf Weber, Ma^ehthilt sin êlichi wirtinne, Elzbêth, Adelhait, Johans der elter, Johans der júnger, Hainrich, V^olrich, Steffan, Růdolf vnd Cůnrat irú kint veriehent ainer gantzzer warhait aller der dinge, so von v´ns an disem brief da vorgeschriben stânt. Vnd ze merer sicherhait der selben dinge so haben wir erbetten den erbern wolbeschaiden Johansen Hagenwiller, daz er ze ainer gezúgnust aller der vorgeschribenen dinge sin insigel o^vch gehenkt hat an disen brief im vnd allen sinen erben gantzlich vnscha^edlich. Diz beschach vnd ward dirre brief geben ze sant Gallen an sant Symons vnd sant Judas abent der hailigen zwelfbotten in dem jâr, do man zalt von Cristus gebúrt drúzehenhundert jâr, ahtzig jâr vnd darnach in dem andern jâre.

Source Fulltext: Chartularium Sangallense X, Nr. 5930, S. 102-103.