Allen^a) den, die disen brief ansehent lesent oder ho^erent lesen, kúnden wir die nâchgenemten fro Anna Gerwigs Paygers sa^elgen wîlunt burgermaisters ze sant Gallen || elichi husfro^vw, Gerwig vnd Lienhart die Payger ir elichen sún burger ze sant Gallen vnd veriehent offenlich mit disem brieue fúr v´ns vnd fúr alle v´nser erben, daz || wir mit ainberem willen vnd mit gůter vorbetrahtung nach v´nser frúnde vnd nach ander wiser lút rat den hof gelegen ze Oberndorf, den man nemmet der Payrinen hof, || die zehenden von den vnd ab den gu^etern ze Oberndorf, die zehenden von dem vnd ab dem gůt, daz man nemmet daz Rúdli, gelegen vnder Rosenberg, die zehenden von den vnd ab den gu^etern ze Schorantzhůb, die zehenden von den vnd ab den gu^etern ze Rain, die zehenden von den vnd ab den gu^etern ze No^echla vnd ze Mettendorf vnd von allen den gu^etern vnd schůppůssen, die darzů vnd darin geho^erent, mit hus mit hof mit stadel mit hofstetten mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^erent, ez sie genemptz oder vngenemptz gesůchtz oder vngesůchtz wissentz oder vnwissentz vnd mit namen alz wir den selben hof vnd die zehenden vntz her vff disen húttigen tag, alz dirre brief ist geben, gehept vnd genossen habent, redlich vnd reht aines sta^eten êwigen ko^vffes verko^vft vnd ze ko^vffenn geben habent dem ersamen wolbeschaiden Albreht von Ainwille hern Burkartz sa^elgen sun von Ainwille vnd sinen erben, ob er enwa^er, vmb vier hundert gůter Vngerscher vnd Behemscher guldin vnd vmb drú hundert phunt gůter vnd genger haller, der selben guldin vnd o^vch der haller wir gantzlich von im gewert sient vnd enphangen habent vnd an v´nsern offenn nutz bewendet, der selb hof die zehenden hus stadel vnd hofstett v´nser reht lehen warent von dem erwirdigen gotzhus ze sant Gallen, dannen wir im o^vch den selben vorgeschribenen hof die zehenden mit hus mit hof mit stadel mit hofstetten mit allen rehten vnd mit aller zv^o geho^erde, alz vor ist beschaiden, reht vnd redlich geuertgot vnd zv^o sinen handen braht habent, alz reht sitte vnd gewonlich waz vnd alz ez kraft vnd maht sol vnd mag han. Vnd darumb so habent wir v´ns willeklich verzigen vnd verzihent v´ns mit disem brieue gantzlich vnd gar fúr v´ns vnd fúr alle v´nser erben dez vorgeschribenen hofes zehenden hus stadels vnd hofstet mit aller zv^o geho^erde aller aigenschaft aller lehenschaft aller kuntschaft aller gewêr lút vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so wir oder v´nser erben an dem zv^o dem vnd von dez vorgeschribenen hofes zehenden hus stadels hofstett vnd waz darzů vnd darin geho^ert ie gehept habent ald hie nach iemer gehaben oder gewinnen mo^ehtint, vnd daz wir noch enkain v´nser erben noch nieman andre an v´nser stat noch von v´nsern wegen den vorgenemten Albreht von Ainwille noch dehain sin erben noch nachkomen von dez vorgeschribenen hofes zehenden hus stadels hofstett noch gu^eter wegen vnd waz darzů vnd darin geho^ert niemer súllent noch wellent ansprechen vf triben bekúmberren bekrenken noch in kain wis beswa^eren weder mit gaistlichem noch mit weltlichem geriht noch an reht noch mit enkainer lay ander sachen ân alle geua^erde. Wir habent o^vch a^ellú drú vnuerschaidenlich gelobt mit v´nseren trúwen vnd lobent mit disem brieue fúr v´ns vnd fúr alle v´nser erben, dez vorgeschribenen hofes vnd zehenden mit hus mit hof mit hofstetten mit stadel vnd mit aller zv^o geho^erde vnd dez ko^vffes reht wer ze sinne nach dez landes reht vnd o^vch den vorgenemten Albreht von Ainwille vnd sin erben darumb ze versprechenn vnd ze versta^enne an allen stetten gen aller ma^englichem ân allen iren schaden, wenn wâ vnd wie dik sv´ darumb an gesprochen geschadgot oder vfgetriben werdent mit dem rehten. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd nôtdurftig warent vnd alz reht sitte vnd gewonlich waz. Vnd ze vrkúnd der warhait aller der vorgeschribenen dinge vnd gedinge so habent wir die vorgenemten fro Anna die Payrin, Gerwig vnd Lienhart ir sún fúr v´ns vnd fúr alle v´nser erben v´nserú aigenú insigel offenlich gehenkt an disen brief. Der geben ist ze sant Gallen an sant Gallen tag in dem jar, do man von Cristus gebúrt zalt drúzehenhundert jar, ahtzig jar vnd darnach in dem andern jâre.

Source Fulltext: Chartularium Sangallense X, Nr. 5929, S. 100-101.